تعبانه نفسيا ساعدوني

تحيه وبعد..

احترت كثيرا وانا أكتب مشكلتي لأني انا مو عارفه وين المشكله ...

انا متزوجه من سنتين وحامل في طفلي الاول ولله الحمد... زوجي طييب جدا واخلاق والحمدالله يفعل الكثير لاسعادي وهو الولد الوحيد والكبير :)

اهل زوجي طيبين وان شاء الله انهم يحبونني .... الى الحين بتسالون وشو المشكله.... وانا مره كتبت لكم عن مشكله من مشاكلي والحين اكتب لكم الثانيه ...

زوجي كل شي يسولف لاهله ... انا صرت لما اقوله اي سالفه اقوله لا تقول لاهلك واحس الجمله ابداا مو حلوه واحس انه يتضايق بس هذا الحل الوحيد ما لقيت حل بديل بالنسبه له لأني اذا ما نبهته لازم يسولف لهم .. هو مو قصده شي بس من باب السوالف خاصه انه يروح لهم كل يوم .. والاشياء تكون سخيفه بس تعرفون احنا الحريم في اشياء ما نحب نقولها ... صرت اتنازل عن اشياء كثير واخليه يسولف عنها مثلا وين رحنا اليوم ووش سوينا هذا لازم طبعا وانا هذا عادي عندي ما يهمني بس اكثر ما يقهرني اذا رحت كوافير والا اشتريت فستان يقولهم انا بصراحه مااحب لكن خلاص صرت اطنش الموضوع.. المشكله ان هم ما يسولفووووووووون لزوجي شي اببببببببببببببببببببببببببببببببببببببببببد.... زواج اخته ما قالوا لي مين بيعزمون وايش راح يسوون ... الملكه ما قالوا لي شي ... يوم حملت اخته ما قالوا لي ... بصراحه شي يقهر هو يسولف لهم كل شي وانا ما يقولون لي شي .. واستحي اقول لزوجي كل شوي لا تقولهم ما ادري ايش اسوي :(

المشكله الثانيه ان زوجي يستحي من اهله يعني ما يحب يطلب منهم شي ... مع ان ابو زوجي حالته الماديه كويسه .. وانا اعرف انه هو مو ملزوم يصرف علينا .. وهو ما يقصر والله ...

الحين جالسين يبنون بيت احنا وهم في نفس البيت طبعا التصميم ما خذوا رايي فيه اببببببببد وما قلت شي وسكت...

جينا على الحمامات الله يكرمكم غرف الاطفال ما حاطين لها بانيو حاطين لها زي الدش الواقف والله مااعرف وش اسمه وقلت لزوجي انه ما عجبني .. خاصه بعدين اذا جونا اطفال ان شاء الله اكيد يبغون بانيو قال خلاص احنا سويناها وعيب اقول لابوي وسكت وما قلت شي....

المهم ان البيت اسم انه بيتي وانا ما سويت فيه ولا شششششششششششي ... والى الحين هذا عادي ...

جينا على الشغاله وهذي هي المشكله ... وهي الي مضايقتني بصراحه... بيت اهل زوجي عندهم شغاله وسواق وقدمولنا على شغاله ثانيه على اساس لي... بس اسم انها شغالتي

المهم هذا كان اول ما تزوجت طبعا ما كأنها شغالتي ما تنام عندي وهذا انا راضيه فيه لأن بيتي اصلا ما يكفي ... اذا صار اي شي في البيت راحت تنقل الاخبار لام زوجي وهذا الشي نرفزنننننني بالمره ... طبعا هي على اساس شغالتي ما تجيني الا كل يومين والا ثلاث ... ما صارت شغاله وحمدالله انها سافرت وافتكيت منها لانها كانت تعاملني على اني بزر...

المهم الحين انا حامل بالسابع ومن زماااان اقول لزوجي ابي شغاله وهو يقولي ابوي قدم يمكن من اول ما حملت وهو مقدم على شغاله .. واذا قلت لزوجي خلاص انت قدم ابغى ادربها قبل لا اولد يقول انا ماعندي فلوس وقلت لك ابوي قدم ولا تفتحين هذا اموضوع مره ثانيه ... لما خلاص حامت كبدي من ذا السالفه ....

واخيرا وبعد انتظار 7 شهور على الشغاله جت بسلامتها امس وكلمتنا ام زوجي تبشرنا ان شغالتنا وصلت وتحسبوني شفتها :)

خاله زوجي شغالتها مسافره ودوها لها وانا ما كن صار لي 7 شهور استنى ضاااق صدري مرره .. ولما كلمت زوجي وقلت له اني ابغاها قالي ان اهلي ما يبغون يجيبونها البيت لأنهم ما يبغونها تسولف مع شغاله اهل زوجي لأنهم متهاوشين مع شغالتهم والحين شغالتهم بتسافر وما راح يبقى غير شغالتي :( وفي طبيعه الحال الشغاله بتصير مو فاضيلتي...

المهم انا بالاخير قررت اني ما اعتمد على زوجي لان ماعمري قلت له شي يسويه عند اهله الا رجع ولا سوى شي .. لأنه يستحي من اهله .. فقررت انا الي بتصرف هذي المره ...

انا ما كلمت خالتي من يوم جت الشغاله ولا شفتها.... ابغى اقول لخالتي الحين اني ابغى الشغاله تجي عندي وتنام عندي لما اسافر بعد 10 ايام تقريبا ... وابغى اقولها اني ابغى الشغاله على طول تنام عندي ما ابغاها تنام عندهم واني ابغى الشغاله تنام معي في بيت اهلي في النفاس عشان تتعود على البيبي... بس ادري اني ما اقدر ولا تجيني الجرأه .. الله يخليكم ساعدوني قولوا لي كيف ابدا معها لأن بصراحه انا تعبت بموضوع الشغاله السابقه وما ابغى المأساه تتكرر وخاصه ان في بيبي بالطريق...

والجهه الثانيه الحين كيف افهم الشغاله انها شغالتي ... واني انا الي اقوله يمشي كلامي وانه ما تنقل كلام لاي احد برى البيت ... وخاصه اني بسافر بعد 10 ايام وخايفه اسافر والشغاله ما جت عندي وراح اسافر شهر يمديهم يكونون فهموا الشغاله كل شي... وتحسب الشغاله انها مو شغالتي :( :( وتقعد تمن علي بالشغل ,,,

يا كثر هرجي بس والله من جد تعبانه من هذا الموضوع.. اي شي ما يستشيروني فيه.... كنت اققول لزوجي ابغى شغاله فلبينيه قالي لا امي ما تبي فلبيبنه ... الحين الشغاله لي والا لخالتي عشان تقعد تتحكم ... وقلت لها اني اعرف شغاله كويسه تبي تجي تشتغل ولا اهتمت لكلامي... والحين عشان شغالتهم وسواقهم بيسافرون بيقدمون لهم هم على فلبينين... انا يوم قلت قعد يتفلسف زوجي وامي تقول مو كويسين ومدري ايش وهم عادي ... بس هذا كله الحين ما همني هم ما قصروا وجابوا لي شغاله ... بس ابغاهم يكملون معروفهم واحس انها شغالتي مو يمنون علي فيها :(