تعبت

السلام عليكم


بدخل دايركت على طول، انا مشكلتي ان زوجي عصبي جداً ، مو العصبيه اللي لسبب .. لا
يعصب على اتفه الاسباب يعني عطيه دقيقتين ويصارخ
حرفياً دقيقتين! مايحب ياخذ رأيي في شغله ..
على سبيل المثال: اكلمه باسلوب حلو ، يافلان وش رايك نروح مطعم؟ يقول لا بنروح المطعم الثانيه . واقول له باسلوب محترم وبروقان: يافلان يمدحون ذاك المطعم. (هنا يصارخ!)
؟؟؟؟؟؟
يابنات هل هذا شي طبيعي؟؟ انا جاني القولون العصبي من تزوجته بسبب المشاكل هاذي والعصبيه الزايده والصراخ بدون سبب؟
يعني ليتني انا غلطانه او قلت شي ينرفز بقول استاهل هالصراخ كله! بس انا ما احب احد يغلط علي كذا واسكت! يعني اذا صرخ علي انصدم واقول له وش فيك انا ماقلتلك شي عشان تصارخ؟ يجلس يسبني ويسب اهلي واذا ما سكتتي اللحين ياويلك؟
صار لي ٣ سنين متزوجه وعندي ولد وبنت، وانا انسانه جداً ما احب المشاكل ولا عمري تهاوشت مع احد ودايماً محترمه نفسي واللي حولي
تعبت جداً.. احس ان ماعاد فيني طاقه
الكلمه الحلوه مايقولها لي الا لما اطلبها .. اما الكلمه الشينه او السب و سب اهلي على طول
ولاتقولون انتي ساكته .. لا
ارد عليه وما ارضى يسب اهلي بس لما ادافع عن نفسي سواء بوقت المشكله نفسه او بعد المشكله هاذي بيوم او يومين ابغى افتح نقاش ان يافلان انا ما ارضى تسبني وتسب اهلي وتهاوشني
وما وقف عند السب بدون سبب، حتى الضرب يابنات!
والله اني اكتب ودموعي ع خدي، يضربني ضرب مبرح، على راسي و جسمي و تكون فيه كدمات ماتروح الا بعد اسبوع
مره كان على رقبتي واضح، وقال لي ماتروحين عند اهلك لين ما يروح الاثر
رحت لاهلي كم مره وانا ابكي انه هاوشني لسبب تافه وسبني وضربني واقعد كم يوم عندهم بعدين ارجع عشان عيالي
انا اللي دايماً احل المشكله بتنازل مني، على كثر السب والاهانه ماعمري سمعت منه كلمة اسف او حسيت انه ندمان
احس قصتي غريبه، مالقيت مثلها بالنت، اقرى مشاكل ان هاوشها زوجها او سبها بس بعدين اعتذر وقال يافلانه ما اعيدها
طيب انا ليه مايعتذر؟؟ مع اني اتخذ موقف بس هو شخصيته كذا حتى عند اهله
الكل يعرف انه عصبي ويثور لاتفه الاسباب
اليوم الصبح صحيت عشان ولدي الرضيع يعني اعطيه حليب واغير حفاظته تكرمون
قام من نومه ، غيري الحفاظه يمكن مليانه ، رديت عليه : لا توني من ساعه مغيرتها ، بعطيه حليب وبينام
عصب؟؟؟ وقام كانه ابليس عند السرير غيري له اللحين؟؟
يافلان وش فيك؟؟ خلاص بعطي حليب واغير ؟
عصب وصار يهاوش ويصارخ .. وانا انقهرت يقول لي اللحييين تغيرين صرت اعاند بعد و قلتله خلاص هاذي شغلتي اعطي حليب اغير حفاظه انا اعرف متى اغير ومتى لاا!! لان تووني من شوي مغيرتها!
صار فيه شد كلام و ضربني ضرب على الراس وجسمي ..
ما ادري وش اسوي؟ هو فاهم فكرة ان المراه تطيع زوجها غلط ياجماعه
يبي اول ما يقول لي شي انقز و اقول له سم ابشر
مثال ثاني.. كنت انشف شعري بعد الشاور
وينادي يافلانه جيبي رضاعه الولد. ( عشان الخادمه تعطيه، وعادي يعني طاولتي عند الباب، دايم تطق الباب الخادمه واقول لها اخذي الرضاعه وعادي!)
قلتله طيب خل تجي الخادمه عشان اعطيها جالسه اسوي شعري
قال لا جيبيها انتي ،قلت دقيقه ( ع اساس ان بجي بس بربطه) جات الخادمه وطقت الباب مدام ممكن اجي اخذها؟ قلتلها اي
ماااااات من العصبيه جا واخذ الاستشوار و كسره..


ادري كثرت كلام بس عشان تعرفون انا مع ايش اتعامل وتعطوني النصيحه :(.