تعبت من اسناني يابنات تكفون! هونوها علي💔

السلام عليكم ورحمة الله وبركاته!
كيف حالكم بنات؟
بالبدايه انا من صغري عندي نقص كالسيوم وهالشيء
( عدم لي سنوني يعني بس تسوس لين انعدمت)!
يابنات أنا تعبت من سنوني!!!!
قبل ٣ سنين ( أيام هبّة هوليود سمايل )!
قلت بسويها ورحت دكتور اسنان وقال طيب
ومارح انحت لك سنونك!!! والا اتفاجى انه نحت سنوني
اللي قدااام! العلويه،،وتعبت نفسيتي مره! وركبها
لكن الانياب لونها اصفر والتركيبه بيضاء مره!
و اذا ضحكت مره يوضح!! وبعدها بشهر صار الم فضيع
زي النبض!! ورجعت له قلت له من التركيبه؟؟ قال مستحيل
انا مسوي سحب عصب!! وخلع ضرسين من الفك العلوي
وقال منهم الالم! < الالم للأن مستمر!!! رجعت له قام ينخر
بضرس لي علوي وسوا له سحب عصب!!! والالم للان؟
استمريت شهرين وماخليت عياده الا واحد الله يسعده
ويوفقه وين مايروح ويفتح له ابواب رحمته يارب!
سوداني قال الاسنان اللي مركبه مانسحب العصب زين
وعشان كذا تعورها!! وسوا لي سحب عصب جديد
والاسنان مركبه يعني مانزلها!! وارتحت بعدها لكن
كان معقدني لون سنوني! واضح مره مره وكنت ابكي كل يوم على حالي!! واقول ( يارب ليه انا بس )!! المهم نسيت الموضوع ومرت سنه سنتين ٣ سنوات/ العام انخطبت
قلت اكيد لازم اسوي سنوني ( وصارت عندي عقده من دكاترة الاسنان)!!! رحت دكتوره وقالت الانياب نسويها حشوات تجميليه ولونها قريب مرررررره من التركيبه!! قلت طيب!
وسوتها لي حشوات وسوت ضروس مسوسه! وصار الوضع تمام وانبسطت قلت خلاص ذي اخر مره ادخل عيادة اسنان
وخلاص سنوني زانت! المهم بعد زواجي بـ ٦ شهور! عورني
ضرسي! ورجعت لها وقالت فيه خراج < بالضرس المسحوب عصبه! المهم وسويته! والحين صارت لثتي بس تلتهب!
ومقدر اكل ولا قدر اتكلم من الوجع الم الم الله وكيلكم!
رحت دكتور وعطاني مضمضه وقال ارجعي لي بعد ٥ ايام!
المهم يابنات الحين انا اكتب لكم وانا ابكي💔! تعبت من حالة اسناني! ورحت لدكتور العايله وقال اسوي لها تركيبات
لسنونها الباقيه! وامي رفضت! وانا نفسيتي جداً تعبانه
ودي بسنون نفس الناس والعرب! سنوني نعدمت فوق تحت صارت! ومشكلتي توي متزوجه! ودي انبسط واحمل! لكن اخاف احمل وتعورني سنوني! تعبت وربي اتمنى اموت ولا ذي الحاله💔! شيء لايطاااق،،والسؤال ( ليه ياربي انا بس؟ )!!
المشكله لو بسوي تركيب لسنوني كلها،صعبه احس انا للحين عمري صغير عمري ٢٣ ونفسيتي تعبانه! ياربي ليه كذا يصير معي ليه😭💔💔💔💔💔!!! كثير يقولون لي الاسنان امرها بسيط! الاسنان عادي بس انا اشوفها شيء ثاني💔💔! تعبت يارب ارحمني💔