تعبت من التفكير وقلت اتعبكم معاي ممكن ؟

والله يابنات لي فتره طويله معاكم بالمنتدى واعرف اغلبكم من كثرة قرائتي لمشاركاتكم بجميع الاقسام والقى بمتابعتكم متعه وفائده كبيره جدا لكن مشتركاتي تعد على الاصابع ولا تتعدى ردود وتشجيع او اشياء بسيطه ولا مره نزلت موضوع مستقل بس اليوم نويت اشارك بعد مااخذ مني التفكير ماخذ وتسببلي بصدااااااااااع ولا وصلت لنتيجه مرضيه

ادري مصختها بس حبيت اشرحلكم الوضع شويه

انا ياحبيبات قلبي ساكنه في بيتي صارلي 5 سنوات ماعدلت فيه ولا وسعت ولا غيرت والحين ياربي لك الحمد ان الاوان اننا نغير ونوسع في البيت ونغيره تغيير جذري ادعولي ربي يتمه على خير

بس المشكله اني ماعرف شنو الشي الجديد والدارج والي يمشي هالحين وبعدين ولا يطيح بجبدي عقب مده وكل من شافه قال شخباري قديم مابي اسمع هالكلمه يعني ابي شي موضته تبقى حلوه وجذابه حتى لو مر عليه سنين وانا عندي مساحة الصاله باذن الله راح تكون شاسعه كبييييره جدا وانا احب الوسع وابي لون يوسعها زياده ويكون حلو ومريح للنظر والنفس ومابي ترخيم وتعتيق .....الخ لاني مليت من كثر ماشوفه عند الناس وابي ديكور الي مثل القبه الي يجي مثل الحفره وداخله الثريا بس مادري حلو بالتطبيق ولا لا ؟ يعتبر قديم ولا جديد ؟ محتاره اخلي الديكور ناعم وبسيط ولا فخم وفيه حركات ؟ اخليه ابيض ساده ولا ملون ؟وزوجي يقول خليه ناعم واضائته مخفيه طالعه لفوق عشان يبرز اكثر وانا متردده ؟
السيراميك ابيه يكون مثل الباركيه بس على سيراميك لمعه ومتردده اخاف تروح موضته ويصير شي بايخ بعد مرور فتره ومادري اخذ سيراميك بلمعه عشان تبين فيه النظافه ولا نص لمعه ولا مطفي ؟ واذا عندكم سيراميك لونه حلو ويعطي وسع للمكان اكثر ويمشي مع كل الالوان وجربتوه في بيوتكم العامره شوروا علي :(

والصاله عندي راح تكون كبيره مثل ماقلتلكم زوجي يقول اقسمي نصها وخليها مرفوعه عن الثانيه بدرجتين وخلي الجلستين مختلفتين والوان سيراميكهم مختلف وانا مرات اقول حلو ومرات اقول لا بتصير لخبطة الوان ومرات اقول اخلي صاله مرفوعه عن الثانيه اوكي بس السيراميك والالوان وحده وربي محتاره ولا ادري وين الخيره ؟؟؟ :42:

ادري طولت عليكم بس هذا انتم عرفتوا قصتي ممكن تساعدوني ربي يوفقكم ويحققلكم كل ماتتمنون يارب