مرة ثانيه لو تسهلت امور زوجك الماديه
خبي قرشك الابيض ينفعك ليومك الرمادي
صراحه مااشوفه اسود ماشاءالله والحمدلله
وضعكم احسن من غيركم.

استغفر الله
تبكين عشان ماتقدرين تشترين جلابيات لرمضان وملابس العيد واكسسوارات ؟!
اجل اذا كان حالك مثل غيرك اللي مايقدرون حتى يشترون الاساسيات الضروريه وش بتسوين بعمرك ؟
خذي لفه على مواضيع القسم شوفي اللي لها سنوات تكتب مواضيع عن مشاكلها مع زوجها وزعله عليها بالشهور بس لانها تطلب منه مقاضي البيت !
ومو بس كذا في عوائل حتى فوط صحيه او حفايض للاطفال مايقدرون يوفرونها
وانتي تبكين على زينه وملابس بس للكشخه مو اساسيه !
ولا تفهميني غلط انا ما اقلل من شعورك وضيقتك لكن صدقيني انك تملكين كنز ربما غيرك يتمناه اللي هو الصحه والعافيه ومايعرف معنى كلامي الا اللي فعلاً ذاق مرارة المرض والألم
والله ثم والله ان قوة الألم تخلي كل شي يصغر في عينك وماتدورين الا العافيه بس
تعوذي من الشيطان وتقبلي العسر والضيق وارضي به واحمدي الله واشكريه ان الضيق بالمال مو بالصحه ولا الاهل
والحمدلله ان زوجك مو مقصر معاك اذا كان عنده فلوس
ولا اجل وين شخص محتاج فلوس ويجدد كنب البيت ؟
تعلمي انتي وزوجك كيف تحسنون التصرف باللي يبقى لكم من الفلوس بعد سداد اقساط القرض كل شهر وراح تعيشون مستورين وهي كلها فتره مؤقته وتعدي

طيب بدري ع العيد يمديك تشترين
ورمضان انتي وولدك
مارح تكلف كثير

وحمدي ربك غيرك ملقو لقمه يكلونها

وعليكم السلام

تقولين بيتكم ايجار وعايش على راتبه
المفروض لما كان الوضع كويس وفرتوا منه لو ٢٠٠٠ او ٣ كل شهر للظروف لان وضعكم ماكان مستقر

دام انه مو مقصر و شي غصبا عنه خلاص وش تسوين ؟ اغراض رمضان خذوا كل يوم بيومه لو يستغل اوبر اي شي

و لبس العيد مو لازم تاخذين غالي دام ظروفكم ماتسمح خذي ب ٥٠٠ لك انتي و ولدك و جلابيات رمضان ترا ماهي واجب
الناس رابطينها برمضان كأنها فرض ؟

وليه ماطلعتوا من شهرين؟ فيه حدائق فيه منتزهات وطلعه بالسيارة وتمرون تاخذون قهوة او عصير ترد الروح مع الأجواء الحلوة
والله امس فرفرنا بالسيارة ومرينا أخذنا عصير فرش كانت احلا طلعه بهذا الاسبوع

الحمدلله...