تعبت من حياتي مع زوجي

سلام عليكم و رحمه الله بركاته
اخواتي العزيزات يارب تكوني جميعا بخير وصحبه و عافيه...
حبيًا أشارك مشكلتي معاكم لعل وعسى أوصل لحل معاكم و بمساعدتكم
أنا تزوجت لي سنه تقرييا و عايشه في فرنسا تزوجت و استقريت مع زوجي وحياتي في بدايتها كانت مستقره امورنا تمام لين قبل شهرين بدأت مشاكل بيني و بين زوجي على عده مواضيع نظرا لاختلاف وجهات النظر و عدم قبول طلبات
لكن سبب المشاكل حاليا بدا من موضوع الإنترنت في البيت كان عندي شريحة فاتورة و كنت استخدمها للإنترنت طبعا بحكم الغربة و الوحدة و الطفل اغلب وقتي على الجوال طبعا بعد ما أكون خلصت شغل البيت و واجباتي قبل رمضان جات لزوجي فاتورة جوال بقيمه ١٠٠ يورو طبعا هو استغرب من المبلغ انه كبير و صار يسألني إيش عملت علشان يجي زي دا المبلغ وأنا طبعا بحكم انه الرسائل و التنبيهات توصل بالفرنسية فما كنت اهتم بحكم انها كانت تيجي من ارقام مو باسم الشركة زي ما متعوده في السعودية ولما زوجي شيك على التفاصيل طلعت مجاوزة الحد و صار يحسب على الفاتوره هنا زوجي انجن وبدا يلومني انه أنا السبب واني ما أراعي جيبه واني أنانيه و و و .... مع العلم أني شرحت له وقلت له أني ما اعرف ان الشريحة فاتوره و النت فيها باشتراك مش مفتوح و انه كانت تجيني رسايل ولا فكرت انه من الشركة احسبها اعلان لكن ما صدقني و بعدها بكم يوم أصحى من النوم ألاقي زوجي شايل الشريحة و طلب ايقافها على أساس ما تجيه فاتوره جديده ولما رجع من الشغل سالته ليش شلتها تحجج انه أنا رح ارجع استخدمها بدون ما أراعي جيبه و رح يزيد المبلغ و كذا و جاب لي شريكه ثانيه مسبقه الدفع لكن بدون إنترنت على أساس يقدر يتصل علي ظليت فتره بدون إنترنت و مليت لحالي لا تلفزيون ولا إنترنت فكلمته بالموضوع وكان رده (أنتي مخسترني فاتوره مبلغ فلأني المفروض تستحي على نفسك وما تطلبي ) مع أني شرحت له أني مالي ذنب وكله صار بدون ما اعرف وأنه المفروض هو يلوم حاله هو ماقالي ان الشريحة بباقه مو مفتوحه و انه الرسائل تيجي من ارقام غريبه لكن ظل مصر على كلامه و ليومكم هذا ماعندي نت غير شبكة وآي فاي ضعيفه ما تشبك الا عند باب الشقه اطر اشبك علشان ارسل لاهلي و اتطمن عليهم و كانو هم اخر سلاح عندي علشان يجيب لي نت لكنه رد علي و قال كلميهم من جوالي عادي مو لازم ٢٤ ساعه معاهم بس تطمين هذا لو صدق تبغي تتطمني عليهم مو علشان النت ما خلى لي أي عذر وكل ما فتحت معه الموضوع يكون رده إلى قلت لكم عليه (أنتي ما تستحي مخسترني .........) تعبت والله و طفشت في البيت وحتى تلفزيون ماعندي بحجه انه العماره ما فيها أنابيب للسطح علشان الأسلاك توصل للصحن لما نحطه هناك وما نقدر نطلع الصحن من الشباك لانه ممنوع فماعندي لا إنترنت ولا تلفزيون اسلي فيهم نفسي وتكلمت. معه اكثر من مرة لكن بدون فايده يقولي اسطوانته وبعدها اللهي نفسي برياضة طبخ تنظيف البيت مع أني والله مو مقصره أبدا البيت نظيف واكله جاهز....
تكلمت معه على موضوع المصروف لكنه رفض تماما بحجه انه لو ابي أي شئ اطلبه ليش يعطيني مصروف الشكوى لله وما اقدر اكلم اهلي أو اطلبهم لان رح تيجي اساله ليش و علشان إيش ليش ما يعطيكي زوجك و و و و و و ويكبر الموضوع و تصير مشكله ولا حلوة بحق زوجي




ابغا الحل يا بنات إيش اعمل ابغا آراء ناس فاهمه و فعلا تقدر تحل الموضوع لي و تنصحني
أسفه على الاطالة انتظر ردكم بفارغ الصبر