ملايين النساء من حولنا متزوجات....
لكن لو حسبنا ...
كم وحده ناجحه في هذا الزواج....
كم وحده قادره تعيش باستقرار وتخلي عيالها يستقرون معها
كم زوجه قادره علي ادراة حياتها تحت كل لضروف
(اكيد في رجال مستحيل الحياة معهم والا كان ما جعل الله
الطلاق...زوجات هذا النوع اسال الله ان يجعل لهم فرجا)
لي سنين مهمومه بامر الاسره ولا املك الا المواضيع
اللي اكتبها...
تستميت الفتاة عشان تعرس وهذا ابسط حقوقها
لكن هل تفهم معني زواج....
زواج يعني.....
تكونين مسؤوله عن شخص من الالف الي الياء
دوامه ملابسه اكله نظافة المكان اللي يعيش فيه...
ضيوفه...
زواج يعني.....
تتحملين اهله لانهم جزء منه....
وانتي وحظك ممكن تكونين مكروهه من البدايه
لو انك ماسويتي شي...
يحسون انك اخذتي ولدهم والاخوات يحسونك اخذتي اخوهم
وانك انسانه غريبه اجنبيه عنهم....
جايه تشاركينهم حياتهم...
ان سكنتي عندهم فانت محاسبه علي طلعتك ودخلتلك
ومواعيد قومتك...
والله يعينك علي العذاريب اللي بتطلع فيك
(لو كنتي كامله والكامل وجهه سبحانه)...
لابد من المقارنات مع حمواتك (زوجات اخوانه)...
هذا ان ما جابولك وحده....
من العايله الكريمه من بعيد وقارنوك فيها...
وطبعا معروف ان المقارنه بتكون لصالحها
وان سكنتي بري لحالك...
لابد ينولك من الحب جانب
(خصوصا باول الزواج)...
يعني اول عشر سنين وممكن اكثر
هههه يعني ابي اهونها وصعبتها
زواج يعني.....
حمل ومتاعبه وولاده وسهر وتربيه...
وهذا اهم شي تربيه ثم تربيه ثم تربيه
بكل مافيها من تعب وقهر ووجع قلب وروح
(واجر عظييييم)....
او حرمان من الامومه وتعب فالبحث
والعلاج وياهونه اذا طلع العيب من المره
بتصبر علي العلاج والعمليات...
اما ان كان من الزوج انتي وحظك بعد
ممكن يكون متفهم ويتعاون معك...
وممكن يكون مكابر ويحس هالشي يجرح رجولته
فيتعبك بالترجي والاقناع.... الي اخر هالطريق
والله يعينك علي ما يجيك من كل اللي حولك من
كلام وتعليقات...
والبعض منهم يقوم يفتي بحياتك
زواج يعني.....
ارتباط مصيرك بشخص...
ممكن يكون مايتحمل المسؤوليه....
او بارد لامبالي...او عصبي
او بخيل...او كريم علي غيرسنع
او مستبد برايه...الخ
زواج يعني.....
ممكن غربه...او ينقلونه بحكم عمله
فتنطرين تتركين كل شي وتتبعينه
يتبع.....
زواج يعني.....
ظروف الحياة.... نقص فالماده مثلا
شقه صغيره..بعد العز اللي كنتي فيه
تقليص المصروفات بعد ماكنتي تصرفين بدون حساب
ممكن بسبب هالضروف يتركك عند اهلك او اهله
او تشوفين التقصير علي عيالك
في حين عيال اللي حولك غارقين فالنعيم
زواج يعني.....
عيال لازم تكونين انتي اهلهم مثل منتي
لك اهل... واهلك لهم بيت وكيان...
تروحين لهم اذا بغيتي الراحه......
لازم هم يلقون الراحه عندك في بيتهم...
حتي لو كنتي مضغوطه من اي امر من امور الحياة
هم مالهم ذنب كل يوم لهم بيت وفراش....
مره عند اهلك ومره اذا بغي يقهرك خذاهم عند اهله
وهم مساكين وين اهلهم....
زواج يعني.....
زواج يعني.....
زواج يعني.....
ويعني ويعني ويعني...
الكثير من الامور حياة كامله وكيان كامل انتي
المسؤوله عنه...
(كل هذا يحتاج وحده يعتمد عليها
قادره تعتمد علي نفسها)...
عندها الكثير والكثير من الصبر والحكمه...
صدقوني يا اخوات انا ما اسود الحياة...
انا اتكلم بواقعيه....
كم زوجه فشلت في مؤسسة الزواج...
بعد فتره بسيطه لقت نفسها مهي قادره
تتحمل اهله ...او غربته
او ضروفه الماليه...او بروده او ضيوفه
او او او
انا هنا اتكلم عن الحياة العاديه
والازواج الطبيعين اللي ضروفهم مثل ما ذكرت
بموضوعي....
ما اتكلم عن الازواج الوحوش السفله....
لكن حتي هؤلاء كثير من الزوجات ما تتحملهم
صعبه الحياة عليها...
ما تعودت تتحمل المسؤوليه....
صحيح في تعب وتعب مضاعف في بعض الاحيان
لكن عادي هذي سنة الله في خلقه...
(لقد خلقنا الانسان في كبد)
الاكثريه من بناتنا ونساءنا صايرات هشات
ما تتحمل ....وان تحملت يكون علي مضض
ونفسيه تعبانه...
تعبانه ومتعبه اللي حولها...
كثيره الشكوي...
والتذمر واكبر دليل نسبه لا باس بها
هنا فالمنتدي تشتكي من امور عاديه...
صحيح اشياء تضيق الصدر وصعوبات فالحياة...
بس ما تاصل انها تقول بروح لاهلي...او بطلب الطلاق
وان ما راحت لاهلها...
تلقينها دايما تشتكي محد يساعدني....
الكل متخلي عني...محد حاس فيني
دايما تكون محتاجه للعون وللمساعده...
ما تقدر تعتمد علي نفسها...
بعد الله سبحانه طبعا....
(ما يمنع من الفضفضه لبعض الامور...
في بعض الاحيان)...
من كثر حنتها وشكواها واحتياجها للغير....
اللي حولها حتي اهلها يا اما يبينون انهم طفشوا
منها كذا كاش فالوجه...
(وهذا والله كلام وحده اعرفها فالثلاثينات
تقول اهلي طفشوا من كثر مشكيلهم
معاد احد يقعد معي)....
والا بالعينها غصب ويبين عليهم بشكل او باخر...
لانهم حتي هم مساكين عندهم امورهم الخاصه
وان ما تكلموا...
وانا اعتقد ان هالشي راجع لنوع تربيتها....
في الجزء الثاني ان شاءالله...
بذكر الطرق اللي تقدرين تعودين عليها عيالك
من الصغر انهم يعتمدون علي انفسهم...
اللهم لا تكلنا الي انفسنا طرفة عين
وكن عونا لنا لا علينا ....
واعطنا القوة علي تحمل صعاب الحياة
تم بحمد الله...