حاولي تكملين ثانوي مو لانك ماتسوين شيء بدونها لااااااااا !
بس لانك تحتاجين شهادة و لازم تأمنين مستقبلك الحين الدنيا بدون شهادة ماتسوى؟
لازم تشدين حيلك وتاخذين الثانوية

اما انك تقولين انك ماتسوين شيء لا ياقلبي مين قالك
كل انسان عنده نقاط ضعف و نقاط قوة !
تلقين عندك شيء غيرك يفقده والعكس صحيح ..
صحيح انتي ماعندك شهادة بس اكيد انك تتقنين اشياء ثانية ، اكيد ربي رزقك بمهارات اخرى
ابحثي بنفسك راح تلقين اشياء تحمدين ربك عليها كثير يكفي بس الصحة الي الكثير يفقدها

ثبتي نفسك بالمجتمع بطريقتك الخاصة
شوفي اي شيء انتي متمكنه منه واثبتي نفسك فيه ..
لو تشوفين لك حرف صغيرة بالبيت طبخ مثلا .. اي شيء تقدرين تبدعين فيه

لكن مسالة انك تقولين انا ما اسوى شيء فانتي غلطانه وراكبك الغلط من راسك لين رجولك
و لا تنسين تحاولين و تعزمين على انك ترجعين تدرسين وتاخذين الشهادة
انتي عارفة ان كثير من علماء الغرب كانوا اغبياء بالدراسة ؟ اذا ماتعرفين هالشيء ابحثي و راح تتعجبين
اذا كنتي فاشلة دراسيا هالشيء مايعني ان مالك قيمة اوانك غبية او خالية من المهارات وغيره
والمجتمع اتركيه خلف ظهرك واعتزي بنفسك اولا و اخيرا انتي تصنعينها وتثبتينها غصب عن الكل

اقرئي هالمقطع /
العالم نيـــوتن

طرده من المدرسه المعلم ووصفه بالفاشل والغبي ...!!
وجــلس تحت شجرره و سقطت عليه التفاحه ...
وفكر لماذا التفاحه سقطت للاسف لماذا لم تذهب للاعلى ..!


توماس اديسون

(مخترع المصباح - سؤل لماذا لم تيأس عندما فشلت 10000مره قبل اختراع المصباح فقال: لم افشل بل اكتشفت 10000 طريقه لاتؤدي إلى المصباح!!!!!!!!)

وفي صغره طرده مدير مدرسته لأنه لايصلح للتعليم بل هو متخلف عقلياً ولم يدخل المدرسه إلا 3 شهور.!!!



اخيرا :
تذكري ان رزقك مكتوب واجلك كذلك عند خالقك

صدقيني اذا بغيتي الشي بتحصلينه كملي دراستج ان شاء الله منازل ودرسي واكيد بتنجحين لا تعطين احد الفرصة انه يتشمت فيج

والله يعطيج على قد نبيتج يا رب

درسي وان شاء الله بتنجحين بالعزيمة وباذن الله

انتي كاره الدراسه ومستحيل ترجعين لها بس احسنلك زي ماقالوو الاخوات خذي دورات تعلمي انجلش بتلاقين وظيفه لأن اهم شي اللغه والحاسب لاتندمين ع اللي رااح حسسي نفسك انك مهمه لاتكوني حساسه لاتقارني نفسك بغيرك فلانه درست وفلانه تزوجت اعرف بنات تركو دراستهم وتزوجو وجابو عيال والحين كملوو حتى ماسلموو من الكلااام الكل عاارضهم شتبون بالدراسه ربوو عيالكم اصرف ومن هالكلااام والحين خلصوو دراستهم وحققو احلاامهم العلم ماله عمر اذا حسيتي انك ودك تكملي كملي وزي ماقلت خوذيلك دوراات الجلسه بالبيت والندب ع اللي رااح راح يجيبلك اكتئاااب ساعتها بتندمين
اسئل الله الكريم يفرج همـــــك ويسر امرك

السلام عليكم..
هلا فيك الدنيا حلوة..
أعتقد انه موضوعك زي موضوع آلاف البنات في مجتمعاتنا..

لكن فيه كثييييييييير قدروا يتخطون هذي المرحلة ويبدعون أكثر من الدارسين..
طبعاً وخلينا واقعيين الدراسة تبني الكثير في الإنسان،بس إذا ماتحققت الدراسة ولا الزواج ولا الوظيفة، وش الحل؟؟
هل نجلس ونقول أنا مافلحت في شي؟؟
الإجابة.. لااااااااا وألف لا..

بصراحة أول شي أنا فسرت أكبر سبب يساعد إنه البنت أو الإنسان بشكل عام يزيد في همه هو الشيطان..
يعني أحس أكثر مايعجب الشيطان إنه يشوف الإنسان فاضي..
يظل ينكد عليه ويصور له حاله الشين، ويزيد في همه، وهاتك ياوساوس وياهموم.. لين يوصل الإنسان لحاله قد يكون ميئوس منها..

قريبتي دخلت الكلية ورفضت تكمل بعد مارسبت أول سنة، وقالت أنا ماااااااالي في الدراسة..
طبعا انتوا هنا تختلفون شوي، انتي نفسك تكملين وهي كانت رااااافضة تماماً..
المهم، مشت السنين والبنات حولها زي ماقلتي، اللي تزوجت واللي توظفت واللي درست وكلٍ لاه بحياته
وهي حست نفسها ولاشي..

في خلال سنتين سوت انجازات، وخلاص انشغلت مهي فاضية تفكر..
وأحس الكل صار يتمنى صحبتها ولا يغبط أمها ولاخواتها عليها..
حالتها المادية تقدرين تقولين سيئة.. فماكانت تقدر تاخذ دورات مع انها بتموت وتاخذ دورات..

أول شي استلمت الكمبيوتر.. صارت تفتح دروس وتشتغل..
تفكفك فيه وتركب وتنزل برامج .. المهم.. صارت أكبر معلمة صيانة..
ومع اني خريجة حاسب آلي لكن هي مرجعي لمن يخرب علي الجهاز أو تصير عندي مشكلة..

ومع انها قسم أدبي بدأت تتعلم برمجة مواقع.. وشوي شوي سوت من وحدها منتدى..
كان هدفها منتدى "بلامنقول".. ويرتقي بعقول العضوات.. ولكن للأسف كله صار استهبال وبلاهدف.. وكلام فاضي
فقالت أنا ماأقدر أستمر كذا وقفلته..

راحت كلمت أخوها إنهم في مسجد حيهم يسوون نشاطات لبنات ونساء الحي..
كان فيه زي المبنى الصغير أظن تابع لأولاد التحفيظ..
وعطوها اياها.. وشوفي الإبداع..
صبغت المكان وسوتله ديكور، طبعاً من حالتها المادية عرفت كيف تدبر نفسها مهما كان المبلغ قليل..
وصارت مسوية برامج تحفيظ ودورات وكل شي، بمساعدة غيرها طبعا..
ومن هنا، الأولاد عطوهم ميزانية وهذا الشي خلاها تاخذ دورات فتحقق لها اللي تبيه لأنها زي مديرة أو نائبة مديرة التحفيظ..

وغيره كثييييير.. لمن صارت بتتزوج كانت زعلانة انها مابتقدر تسوي اللي كانت تسويه
وسبحان الله بعد 11سنة من وقفت دراسة رجعت تدرس الحين انتساب، لأنها تقول الشهادة مافيه زيها..

أقصد أنا انك ماتدرين كيف حتى لو بعد سنين كل شي ممكن يتغير، نظرتك للأمور وحكمك على سهولتها وصعوبتها يتغيرررر
بس مع العمل..

وأنا الحين أعطيك من تجربتي..
أحس فيه مية طريقة وطريقة تنشغلين فيها جداً جداً حتى ماتفضين بعدها لجمعات البنات..
بس مافيه شي يجي بدون جهد..
أولاً قولي إذا ماأفدت نفسي عالأقل أفيد غيري..

وقبلها.. والله لمن تدرسين تقولين متى أتخرج عشان أحفظ قرآن وأحفظ أحاديث وأطلب العلم الشرعي..
لذلك ابدأي احفظي.. ومدام انك مداومة على سورة البقرة ابدئي احفظيها..
وحاولي تدورين معاك أحد يتسابق معك.. بتكون النتيجة أفضل طبعاً..
اشتريت دفتر حلو وخصصت قلم، وصرت أحفظ قرآن كل آية أحفظها أقرأ تفسيرها ثم أكتبها بلون وأكررها كثير وبعدين أسجل صوتي..
وأسمع وأعدل إذا كنت أخطأت.. والشناقطة كانوا يكررون عشرات المرات وهذا اللي خلا الكثير منهم حفظة قرآن..
والحمدلله حفظت حفظ ماعمره رسخ في عقلي زيه..

ادخلي على مواقع ومنتديات التوحد أو صعوبات التعلم.. وشوفي كيف الأمهات يعانون..
وكثير يطلبون عرض بور بوينت يشرح شي معين أبنائهم مايفهمونه.. وتكون الأم أو الأب ماله في الكمبيوتر..
قولي أنا بساعدهم وبفرج عليهم عسى ربي يفرج علي.. حتى لو ماتعرفين، لازم تتعلمين منها لك ومنها لهم..
وإذا ماعرفتي شي بكل بساطة ادخلي مواقع التقنية المتخصصة واسألي والنت أكبر مدرسة
واشتغليه لهم.. واطلبي دعوة..

ماتتخيلين سويت عرض زي ماقلتلك لأم عندها طفل توحد..
أرسلتلي رسالة خاصة ودعتلي دعوات خلتني أبكي..
وقالتلي ولدها صار مايفك العرض كل شوي يفتح عليه ومبسوط عالأخير..

ولو قلتلك وش كان العرض مابتتخيلين.. بسيط جداً
بديت بأدوات المطبخ..
جمعت كذا شي من الأدوات والأشياء العامة في المطبخ..
وسألتها إذا عندها شي تضيفه أو تلغيه.. وبعدين سألتها عن مسمياتها عندهم..
لأنه كل عنده مسمى مختلف..
كل صورة أمامها مكتوب كلمتها وأمامها زر صوتي.. خليت أخوي الصغير يسجل اسم كل صورة..

وبس.. بالله شتبين أكثر من كذا..
دعوة في ظهر الغيب.. كل ماشافت ولدها تعلم ينطق..

وعرض ثاني كان عن الفرق بين البنت والولد، تقول ولدها مايفرق هذي بنت أو ولد
سويت العرض عبارة عن بنت وولد.. وحاولت تكون ملامح الوجه نقط عشان ماأدخل في رسم الأرواح..
البنت لبستها فستان وسلسلة ومناكير وظفاير وحطيت معها عروسة وووو، والولد بنطلوت وشعره قصير ومعاه سيارة ووو

والشريحة الثانية البنت لابسة عباية والولد ثوب وبشت وشرقي..
والصوت.. خليت أختي الصغيرة تسجل مقارنة بين البنت والولد..
انه أنا بنت لأن ماما تحطلي مناكير بس ملوكي (اسم الولد) مايحط
ماما تحطلي بكلة في شعري بس ملوكي مايحط بكلة في شعره لأنه ولد..

وزي كذا.. لمن بديت في الشغلة ماتتخيلين.. كيف أهرب من شغل البيت وأي لحظة صغيرة أجلس أشتغل عالعرض..
ولاحظي بعد شغلت أخواني، يعني دخلت فيهم حب مساعدة الغير..
لو بديتي صدقيني مابتنهييييين..

تعلمي التصميم بصدق، ولو احتجتي مواقع قوليلي، بصراحة عندي موقع خيالي..

جات فترة قلت لااااازم أتعلم تصميم مواقع، ولمن أخلص أروح لأي جهة وأعرض عليهم أسويلهم موقع مجااااناً
لأني كذا ماألتزم بوقت وأضطر أتعلم وخبرة تنحط في سيرتي الذاتية..
بس ويدي على خدي ولا شديت حيلي.. أفكر وأفكر وأتمنى بس صدقيني اذا مافيه عزيمة مابتسوين شي..

لين ربي والحمدلله، خلاني أدخل الموقف غصباً عني..
تعلمت برمجة مواقع بسيطة بلغة اسمها HTML
وكنت فترة أفتح كم درس فوتوشوب يومياً وأطبقها، مع اني كنت أقول أنا ما بستخدم هذا كله..
بس كثرة التمرن تخليك على الأقل تتعاملين مع البرنامج بسهولة.. وبس عاهالحالة ولا صممت موقع متكامل..

المهم .. وحدة من قريباتي طلبتني أسوي موقعها لأنها أستاذة في الجامعة..
وأنا خريجة حاسب آلي زي ماقلتلك ومع كذا ماااااأعرف أسوي مواقع لأننا في دراستنا ماتطرقنا أبدا للتصميم..
كانوا يقولون هذا شغلكم انتوا تتعلمونها مو شغلنا، لأن دراستنا عن الكمبيوتر وتطبيقاته والعمليات اللي تصير داخله وزي كذا..
أنا رحت فيها، مستحيل أوافق وأتورط وفي نفس الوقت مستحيل أقول لا وأتفشل في العائلة، خريجة حاسب ولاتعرف!!
توكلت على الله وقسم بالله ماتتخيلين الخوف والحالة اللي مريت فيها..
ومن هنا ومن هنا.. سويتلك موقع كان حديث كل زميلاتها .. الكل تجنن عليه..

وصار يجيني كذا عرض وسويت الثاني وكان فعلاً خيال .. لدرجة قريبتي تقول مالي دخل يلا الحين سويلي واحد جديد..
فررررررق بين موقعي وموقع زميلتي.. لأني دخلت في الشغلة فأتقنتها أكثر..
وجاني الثالث والرابع بس للأسف ماقدرت لأني انشغلت جداً..

وحدة من زميلاتي في الجامعة كانت توظفت وكانت مديرتها طلبت منها اذا تعرف أحد يبرمج ويصمم مواقع عشان يساعدها في شغلها
وهي كانت تدري اني بديت أتعلم تصميم.. فكلمتني واستخرت وتوظفت.. يعني شوفي النتيجة.. بس بعد ايش!!!
الشاهد انك لو بديتي بصدق مابتنتهين..

كل يوم في الحياة مدرسة، وكل شي تعلمته ألقى له استخدام ولو بعد سنين..
الحين وش أحلى منها يكون عندك انجاز تتكلمين أو يتكلمون أهلك أو أقاربك أو صديقاتك عنه..

طيب رمضان قرب وعندك شغلة مرة حلوة.. ابدئي جمعي من عندك ومن أهلك وصديقاتك..
وسوي مشروع كرتون رمضان..
اللي تقدرين من فلوس.. جيبي فيه كم حبة مكرونة على شوربة على دقيق وسكر وزيت..
وعطوها إمام المسجد أو أي شخص ثقة يوزعها عالأسر المحتاجة.. تخيلي كم لقمة تدخلينها في جوف صايم ومحتاج..

واذا تقدرين بعد سوي كسوة العيد..
اشغلي أهلك خواتك أخوانك جيرانك حبايبك.. وشوفوا كيف تسوونها..
مثلا تروحون سيتي بلازا.. ماأدري إذا عندهم كوبونات.. مثلا بمية ريال...
وعطوها للأطفال المحتاجين مع مجموعة حلويات أو لعبة صغيرة..

وأحلى شي بعد تجهيز العودة للمدرسة حسب المراحل..
اشتري من محلات الجملة دفاتر وأقلام وشنط ومستلزمات الدراسة عموماً..
حتى لو تجهزين طالب واحد أو طالبو وحدة.. تدرين انه فيه واحد ماشاءالله دايم يوزع عالمحتاجين يقول فيه بنات ماقدروا يروحون المدرسة لأن أبوهم ماعنده فلوس يشتريلهم مريول جديد!!


طيب وأهم شي بعد، خذيلك دبلوم مو دورة، دبلوم أي شي، فيه حاسب فيه خياطة وفيه طبخ بعد..
هذا شي مرة حلو ينضاف في سيرتك الذاتية إذا جيتي تقدمين على وظيفة.. زي البكالوريوس أحياناً..
معهد التدريب الفني والمهني.. لمن أعلن المسابقة الوظيفية كان ممكن ثانوية عامة بس مع دبلوم..

وإييييييييييييه بعد، لمن تخرجت ورحت أقدم على وظيفة، حسيتني متفشلة، العالم تجي ومعها ملفات وملفات وملفااااات من الدورات والخبرات..
ومحدثتك مامعها إلا دورة وحدة ومدري كيف أخذتها..
فطبعا أكيد مابيطالعون في وجهي إذا ماعندي شي يثبت كفائتي..

حاولي تجمعين أكثر قدر من الدورات وشكليها.. خذي انجليزي وحاسب وإدارة وسكرتارتية وبعد الدورات التربوية..
أقولها بصراحة، إذا ماعندك خبرة ولاشهادات، مين يبغى يوظفك؟؟ ( ماأقصدك انتي، ولكن عموماً أقصد تفكير هيئات التوظيف وين ماكانت)

تذكرت شي بعد.. بعد ما تخرجت وجلست في البيت كنت يوميا أصحى من بدري وأتفنن في الطبخ..
كل يوم نوعين رئيسي وأسويلك من هالحلويات..
وشوفي الفخرررررر.. أبوي ينبسط وأمي تعلم صديقاتها وش كان غدانا..
وأخواني يكيفون.. يعني تحسين انك سويتي شي..
خلي أمك تفتخر فيك..
أي مجال تقدرين تتميزين فيه لااااااتترددين فيه..

ما أدري فيه أشياء كثير، أهم شي تنشغلين ولاتخلين للشيطان طريق..
وتتقربين لله وتفيدين نفسك.. وتمسكين شي في يدك ينفعك مستقبلاً..

أحس اني طولت..
الله يعوضك خير ويفتح عليك فتوح العارفين.. والله يرزقك بكل ماتتمنين من رضا الله تعالى ومعرفة و زواج..
بالتوفيق ياقمر.. :heart:

يسلمو حبيبتي وان شاء الله تفرج والله يجعل الخير بوجهك انتي بعد :>