تعبت والله تعبت من السمنه ماني لاقيه ملابس تكفون ساعدوني

باين انك صغيره من اسلوبك

معليش بعدل على كم كلمه بعد اذنك حبيبتي

تقولين محرومه من القصير عند اخوانك كيف تلبسين قصير وانتي كبيره ماشالله الستر والله زين للبنات

يعني ممكن تلبسين ميدي او قصير لين الركبه وتحته كيلون المهم ساتر اما بتنحفين عشان قصير صدقيني ماراح تتوفقين

تحمليني معليش انا مثل امك :)

ثاني شي قولت ليييه ياربي ماتجوز لازم نتادب مع الله انتي مثل الي تتذمر وتجزع مع ان السمنه انتي الي جبتيها لنفسك

وقولت مالي الا انتم عيدي واكتبي مالي الا الله ثم انتم :)

وكلمة امانه برضو ماتجوز :)

وبعدين ليش الياس حتى لو توصلين ميه بالاراده كل شي ممكن يصير وسعي صدرك

واتكلي على رب العالمين اول شي

وخلي ماما تتابعك بالاكل وتوقف فوق راسك تراه بنتي بعمرك صغيره ولولا الله ثم متابعتي لها كان فرطت

بس مسويه لها كنترول بالاكل وهي مرتاحه يعني تجي تلاقي اكلها جاهز وصحي وممنوعه من اللخبطات كل الاسبوع يوم واحد بالاسبوع اكافئها بشبس وحلويات

انتي اتركي الخبز والرز والحلويات وكولي خضار وفاكهه ولحوم صدقيني بضرف اسبوع بتنقصين كيلوين مع الرياضه

امشي نص ساعه يوميا مو شرط رياضه عنيفه اهم شي تتحركين

سوي لك وجبات خفيفه مثلا توست بر فيه شريحة لحمه او بيض مسلوق وحطيه بالتوستر

لازم انتي تقررين وتبدين وحنا معاك بنشجعك

لاتمشين على رجيم امشي فقط على تخفيف واكل صحي توك صغيره على الرجيمات ووزنك بينزل بسهوله لانك مادخلتي لسى العشرين

فكري ببعدين انك ممكن تكبرين وجسمك ماتغير قهر صح؟؟

خلاص ابدي من اللحظه وسوي لك وجبات منوعه صحيه فطور غدا عشى عشان ماتحسين بجوع

واتركي الي قلت لك عليه هالشي مو صعب اذا بديتي خلاص بتتحمسين

وسامحيني حبيبتي اذا قسيت عليك بس لازم ننبه على اشياء حنا قبلك كنا نغلط فيها :)

بالتوفيق