تعبت وانا ادور تجربة للولب مالقيت تعالو شوفو تجربتي

السلام عليكم ورحمة الله وبركاته
أخواتي مثل ماهو واضح فالعنوان
كنت أبحث عن تجربة للولب و عن أفضل دكتورة
طبعا كل التجارب قديمه أكثر من سنتين ومافيه أحد ذكر تجربته بالتفصيل


وانا كنت خايفه مووووت من اللولب
توكلت على الله وقلت بروح للحبيب أو الأسرة
قال زوجي حددي عشان نأخذ موعد المهم قلت بأخذ فالحبيب ولا كان عندي أدنى فكرة عن الاستشاريات ولا عن شغلهم وماعرف حتى أسمائهم ف اخترت استشاريه لأن موعدها ناسبني وقته وقلت ببحث عن اسمها في قوقل بعدها قلت لا حجزت وخلصت وبجرب بنفسي واتكلت على الله قالت لي منسقة المواعيد لازم تكونين خامس أو سادس يوم فالدورة قلت اوكي


رحت لهم ونادو على رقمي قمت ارتجف أخذت تاريخي العائلي والمرضي وسئلتني وش ابي قلت ابي لولب ف قامت تشرح لي بكتب كلامها بالتفصيل لأن شفت كثير يتفلسف من راسه
اللولب نوعين
الأول النحاسي أو العادي
هذا على حسب غالبية الناس كثر الدورة عندهم
كثر الدورة من ناحية الغزارة أو من ناحية عدد الايام
وناس ما أثر عليهم ابدا وقليل منهم قلل الدورة عندهم
النوع الثاني الهرموني فيه هرمون واحد فقط
مايسبب عصبية مثل حبوب الحمل والأغلبية قلل الدورة عندهم لدرجة أن البعض ماتشوفها إلا لون خفيف بس
وناس قليلة ماتغير شي عندهم


ف سئلتني عن غزارة الدورة قلت غزيرة قالت أنصحك ب الهرموني قلت ماقتنعت فيه ابي العادي قالت اوكي
ف سئلتني اذا حسرانه أو لا قلت لا جاية على الريق ماشربت شي قالت اذا كانت المثانة مليانه بيكون التركيب أسهل ومايألم ركزو على هذي النقطه
قالت اشربي موية وتعالي قلت اوكي رحت اشرب موية وامشي
لما حسيت أن المثانة امتلت شوي رحت لها نومتني على سرير الولادة 😓
أخذت حديدة الكشف وثبتتها فيني وقامت تنظف عنق الرحم وركبت اللولب والله ماحسيت بأي الم دقايق قالت خلصنا ماصدقت ماشاء الله
طلبت مني اسوي اشعه عشان تتأكد من مكانه سويتها وقالت كل شي تمام ارجعي بعد ثلاثة أشهر اتأكد من مكانه وبعدها كل ستة أشهر
وبما أن دورتك غزيرة اذا شفتيها كثرت شوي عادي لكن إذا نزيف تجي فورا اشيله قلت اوكي


يارب يناسبني وافتك من حبوب منع الحمل تعبتني


وشكرا لكم 💖