تعبت و الله ما عاد فيني اتحمل ..

السلام عليكم ...
كيف حالكن يا خواتي ..

يا اخواتي انا بس حابه افضفض لكن ..... صار لي متزوجه سنتين و نصف و ربي ما كتب لي حمل و لله الحمد ...
و زوجي كبير مو صغير لازم يصير اب ...

المشكله من زوجي عنده ضعف في العدد و لله الحمد ...
انا و زوجي قررنا في هذي الاجازه الطويله ( حيث انني ادرس في الجامعه ) نشتغل اكثر على موضوع البيبي و نروح عند طبيبة عقم و انجاب ..
و بالفعل ذهبنا عند الدكتوره سهام في مستشفى سعد التخصصي و طلبنا منها مساعدتنا على الانجاب بعد ما طلبنا العون من الله تعالى ...
شافت حالتنا و اعطتني في الشهر الماضي دوفاستون لتنظيم الدورة .. و في الشهر هذا اعطتني ابر منشطه و كلوميد و ابرة تفجيريه و سوينا التلقيح الصناعي ...
و انا حسب علمي ان التلقيح الصناعي نسبة نجاحه ضئيله :44:
صار لي 11 يوم من التلقيح الصناعي ... و طووول هذي الايام و نفسيتي تعبانه و غير الآلام القويه يلي احس فيها قطعت جسمي تقطيع و الله .. آلام مثل الدورة .. لدرجه انه قبل امس جاني الم فظيييع اضطررت ان افطر كي ااخذ مسكن ..... و الآن احس بالم قوي يروح و يجي و كانه الدورة تبغى تنزل .. انا اول ما حسيت بهذا الشعور ادركت بانني لست حامل و عرفت لما اترك الدوفاستون يلي اعطتني اياه الدكتوره كمثبت راح تنزل علي الدورة ...

و انا و الحمد لله استغفر كل يوم و اقرأ سورة البقرة كل يوم اللهم لا رياء ..

و اكثر شي قاهرني يا خواتي اني لما بديت الرحله هذي عاهدت نفسي ان لا اعطي الموضوع اكبر من حجمه و اعيش حياتي و اشتركت في نادي رياضي و صرت اهتم بشكلي كثيرا ... و لسه ما قلت يا هادي .. و لا فجاة طلع في جسمي كله حبوب حمراء و كبيره ... طلعت على ثلاث دفعات .. و كلها تركت اثر .. مع انو جسمي صافي بس خلاص تشوه و ما عاد صافي مثل الاول و ما صرت اقدر البس قصير عند زوجي بسببها ... يعني شفتوا كيف القهر قررت اني اتابع عند الطبيبه و تكون نفسيتي مرتاحه و اهتم بشكلي و اكون قدر المستطااع ريلاكس جاني شي نكد علي تشوه جسمي و صار عباره عن علامات سوداء لحبوب سابقه . و سبب هذه الحبوب كان المنشطات و قلت للدكتوره قالت لي اعملي فحص لوظائف الكبد و الكلى .. و الحمد لله عملت فحص و ما طلع معاي شي .. بس شكله جسمي المسكين تعب و صار يتحسس من المنشطات و الهرمونات و قالت لي الدكتوره معليش تحملي لازم تكمليها .. الحمد لله بطلت تطلعلي الحين .. و انا استغربت ليش طلعتلي مو اول مره آخذ منشطات فيها .. سبحان الله يلي ما عنده حظ لا يتعب و لا يشقى ..
و الله يا خواتي بعد ما طلعتلي الحبوب و تشوه جلدي بطلت اهتم بشكلي و حتى شعري ما امشطه و حتى زوجي لاحظ علي .. مع انني على قدر من الجمال و الحمد لله .. بس قلت بيني و بين نفسي خلاص هذي الدنيا راح نمشي ما راح نستمر فيها ... و لما جيت انسى موضوع الحمل طلعتلي حبوب و تنكدت ..

الحمد لله ما استفدت و لا شي من هذوله الشهرين يلي شفتهم غير الاجر باذن الله تعالى ... جلدي تشوه .. و ما حملت ..

و الله تعبت كثيير في هذوله الشهرين المشطات و الابر هدت حيلي و لعبت فيني لعب .. و الله كله راح يهون اذا سمعت كلمة مبروووك انتي حااامل ..

بس انا حاسه انو الدورة خلاص تبغى تنزل بس الدوفاستون موقفها يعني مو حامل ..
يا ربي اتوسل اليك ارضني بما قسمته لي يا الله
اللهم آجرني في مصيبتي و اخلفلي خيرا منها يا رب ..

يا خواتي بس حبيت افضفض لانه و بكل صراحه الشهرين الماضيين كانوا صعبين علي كثيير ..

و الحمد لله ما طلعت منهم بشي غير الاجر باذن الله ..
لا انبسطت بالاجازه ... و طلعتلي حبوب مؤلمه شوهت جسمي و جلدي ..
و نفسيتي تعبت ..
خلاص ما ابغى ادخل في هذا العالم مرة ثانيه ..

و ازيدكم من الشعر بيت سلفتي ما شاء الله تبارك الله حامل و توها متزوجه .. و اخوه اصغر من زوجي بخمس سنوات .. بس سلفتي اكبر مني و هذا يلي مهون علي ..
و انا في هذا العيد ما راح اروح عند اهل زوجي لانهم كانوا يقولولي مرات و يجرحوني .. كانوا يقولولي يلا متى تخلصين دراستك عشان تجيبين بيبي حرام عليكي زوجك كبير و نبي نفرح فيه و نشوف له اطفال .. ام زوجي ناشره للعالم يلي هناك انو احنا ماخرين موضوع الخلفه عشان دراستي ... و الله العظيم انا من زمان تاركه المانع و دراستي شبه انتساب ما اروح الجامعه غير مرة وحده في الاسبوع يعني مو مشكله اذا خلفت ...

بس اكيد خالتي ما راح تقوووول انه المشكله من ابنها فحطت السبب علي .. و انا يلي مآكلتها .. امي تقولي خذي حقك و اذا حد جرحك قولي لهم السبب و يلي يبي يزعل يزعل .. ما فيها شي .. و قالت لي انه الحمل ارزاق من رب العالمين و احنا مو عاتبين على زوجك .. حرام ما له دخل و الموضوع مو بيده و لا بيد حد غير رب العالمين .. بس ما يصير انه تظلمك و تخلي السبب منك بانك ماخره الموضوع عشان دراستك ..

و الله يا خواتي ما شاء الله تبارك الله امي مين يسالها ليش ابنك يلي هو اخوي ما جاب لحد الحين تقوله السبب من ابني عنده مشاكل الله يشفيه ..

بس خالتي مستحيل تقوول .. و انا زوجي ما شاء الله عليه متفهم قالي اذا حد جننك و جرحك قولي له السبب من زوجي ...

مستحيل اروح .. سلفتي الحين حامل و راح يآكلوني اكل بكلامهم و الله ...

و الله يا خواتي آسفه لاني طولت عليكم بس حبيت افضفض لكم ...

و السلام عليكم
:44: