مو على كيفها
تبغى عيالها تقابلهم زي الناس

انتو لا تتدخلون
بس ضروري امك وابوك يكلمونها
يا تمسكين عيالك وتهتمين فيهم
يا بنكلم ابوهم ياخذهم

ولو مافي فايده فعلا يكلمون ابوهم

هلا فيك

أولًا الله يكتب العافية لوالديك
و يجزاك خير على حرصك على راحتهم

ثانيًّا بأعطيك رأيي في موضوع أختك بكل صراحة … بالنسبة لأخواتك لا تلومينهم لأن إذا هذا حال أمهم فكيف نطالبهم هم بالاهتمام !
و غالبًا إذا كانت الأم حريصة بتعاملها مع أطفالها حتى اللي حولها يتعاملون مع الأطفال بنفس الحرص ، و العكس صحيح .

أما بالنسبة لك من رأيي أنه ما تتكلمين معها بالموضوع ✋🏻
ممكن تستغربي ، لكن هذه نصيحتي
لأنه يا قلبي مو صح كل ما اجتمعتي مع أهلك و أخواتك كررتي نفس الموضوع و ذكرتيها بتقصيرها ،
اعرف إنها مستفزة و مقصرة
لكن هل هذه الطريقة نفعت معكم ؟ لا
بالعكس عملت فجوة كبيرة بينك و بينها
، يعني صار فيه مشكلة إضافية

طيب الحل …
مثل ما أمك جلست معك و تكلمت عن اللي يزعجها ، أمك تقدر بنفسها - لو عندها رغبة طبعًا - تتكلم مع أختك و توضح لها أنه يا بنتي ما يمديني انتبه لأطفالك بالمساء كل يوم فشوفي حل ، ممكن يتفقوا على يوم أو يومين هي تهتم بنفسها بالنادي مقابل أخواتك يمسكونهم بمبلغ و يعملوا لهم أنشطة …
أو تسجلهم بمعسكرات صيفية الآن موجودة بكل مدينة تقريبًا ساعتين ثلاث يستفيدون و يستمتعون فيها بدل البكاء و التضييق عليهم ، و منها أختك تتحمل جزء من مسؤوليتهم.

و أنت يا عسل الله يرضى عنك يصير دورك لما تروحي لأهلك ،
>لما تشكي لك الوالدة ، بس قولي الله يعين يا أمي و بإذن الله فترة و تعدي و ترجع تهتم فيهم..
أو قولي يا أمي كلميها بنفسك عشان ما نحس أختي أننا كلنا ضدها و أنه تغيرنا عليها بعد طلاقها.
و غيري الموضوع مع الوالدة حتى ما يصير جلستكم كلها فلانة و عيالها ،، لأن طبيعي بتنشحني عليها و تقومي تتكلمي و تشد بينكم.

و حتى الوالد الله يحفظه ، لو انتقد أنها تطلع و ما تعطي خبر ، قولي : الله يهديها ، و صادق لك قدرك ، بس أنت كلمها بنفسك حتى تعرف أنك خاطرك تستأذن منك .
و هكذا
داري خاطر والدينك ، و صبريهم
و سولفي معهم بمواضيع ثانية تسعدهم و تغير من جوكم

و أولاد أختك تعاملي بالحسنى و أكيد مو مقصرة أنت معهم لكن زيادة تأكيد ، ضميهم و امدحيهم والله أنهم بيذكرون الكلمة الحلوة منك لو كبروا و ربي بيجازيك بإحسانك.

و أختك نفس ما قلت ……. وقفي كلام عنها أو عن تقصيرها
تقدري تفتحي أي موضوع ، لو تحكي عن حركة حلوة عملتها بنتها / ابنها …. تحكي عن طلعة عائلية بنهاية الأسبوع تغيرون جو فيها ،،
عن أي موضوع حلو يريح نفسياتكم

معليش أنتم متضايقين
لكن واضح أنه حتى هي تعاني لكن ما أحسنت التصرف
فبإذن الله فترة و تعدي

و صدقيني لو استمريتي فترة مع أختك بهذه الطريقة ( بدون نصائح ، فقط مواضيع عامة أو مواضيع حلوة ) هي بيلين قلبها لك و تبدأ تتأثر فيك و في كلامك اللي تقولينه أو قلتيه ♥️

خليه حدا كبير يوقفها عند حدها