تعديل نوم الاطفال على قبال المدرسة بعد الانقطاع 😍 مبروك وعودا حميدا

السلام عليكم


المقدمة "" ((تقدور تتجاوزوها ))من زمان مانزلت مواضيع وهذا الموضوع كاتبته قبل سنتين تخيلو كان عمر بنتي ٦ والحين ٨ يارب احفظهم وتوي اقلب بين ملاحظاتي عشان المدارس جايه ان شاء الله وابي اضبط امورنا ونظامنا وصراحه حبيت الجدول هذا لانه فعلا فادني وماشيه عليه بس رجعت اقراه عشان عشان اكون مغطيه الموضوع واطبقه بحذافيره ومااكون نسيت شي تعرفون حماس العودة للمدرسة بعد انقطاع طويل 😂🤣… فقلت لازم انزله لاخواتي اللي دايم استفيد منهم حتى ولو كان فيه سناب واستقرام وكلش مالنا غنى عن عالما الاول الجميل واكيد له الوفاء " الحب الاول" …. ")))




يلااا نخش في "(((( الموضوووووووع ))) على طول
طول عمري مشكلتي مع بنتي هي النوم النوم النوم
كنت انحرم من الخرجات لان نومنا دايم متلخبط ومااقدر اتحكم فيه ماقدر مستحيل انسى .
مدري انا كيذا حصل معاي ممكن غيري ماصار له هذا الشي ولكن انا نزلت هذا الموضوع للفائدة للي عانت مثل معاناتي وان شاء الله يفيدها
طبعا هذ الموضوع اجتهاد شخصي وملاحظة طويلللة وسؤااال دايم اسأل الامهات اللي زيي كيف تنظموا نوم أطفالكم وكلهم يعطوني طرقهم السهله وماضبطت معاي صراحة
فكرت ولاحظت واستنتجت وتكتكت المخ حقي ومخمخت على هذا الموضوع مخمخه<< اخلصي علينا بس خخخ
كنت كل يوم مع بنتي تنام على مدار الساعة انا اشرح لكم كيف يعني مثلا اليوم تنام ٨ بكره تسعه بعده عشره بعده ١١ وهاتك يالطويلة شهريا وانا على هالحال مالي ميعاد محدد للنوم.
لكن انا اقولكم ايش سويت اول شي
دخلت لجدول عدد ساعات نوم الطفل بحسب عمره. انتم قوقولها وتطلع لكم من حساب سوبر ماما أو شي زي كذا
وحسبت كم تحتاج ساعة في اليوم
والحين جينا للجد
صرت اخليها تنام بحسب حاجتها فقط واذا شفتها ماصحيت اصحيها انا عشان تنام الليل نفس وقت الأمس
وطبعا اهم شي اهم شي الوجبااااااااااااااات لازم ياكلو وجباتهم كلها عشان ماراح ينامو جوعانين وراح يزعجوكي ماما نبغى ماما جوعانين
وأهم شي تكون لها وقت محدد بالذات العشا قبل النوم بساعة
وروتين النوم اخفف إضاءة تفريش اسنان حمام قصة
..
الحين ابي اكلمكم عن الويكند وماادراك مالويكند
ينامو فيه ٢ ونص او ٣ مع سهرات الزوارات والخرجات ونشيل هم كيف يتعدل نومهم بعد العك هذا والهيلمة العجيبة في الجدول .
جبت لكم طريقة اضبطكم فيها تضبييط
ينامو الجمعة ٣ اتفقنا
يوم السبت مربط الفرس
يصحون ١٠ أو ١٠ ونص تمام التمام يصير لهم ٧ ساعات نايمين
الليل ندخلهم ينامو من ٩ عشان ماتجي عشره الا وهم نايمين ان شاء الله.
الأحد يرجعو من المدرسه النوم ممنوع منعا باتا
لين ٧ ونص يتنومو وخلاااص كذا تعدل نومهم الحمدلله.
نجي ليوم الخميس كيف اسهرهم وهم صاحين من الصباح
تعااالي اقولك الطريقة اول شي نشتغل على اليوم اللي قبله يوم الأربعاء نرخي شوية ونخليهم براحتهم مانننومهم زي كل يوم ننومهم ١٠ كذا تمام
عشان يجو من المدرسه الخميس تعبانين وينامو قيلولة لين يشبعو ويصحو من نفسهم وبكذا سيطرنا على الوضع تمامااااا
والحمدلله هذي اللي استنتجت بعد ٦ سنين ملاحظه وعنااااء ومحاولات قد ايش اقولكم لاتعد ولا تحصى باءت بالفشل لكن بعد هالطريقه الحمد لله الحمد لله الحمدلله نجحت نجاحا باهر وان شاء الله راح يكون هذا نظامي مع أطفالي الجايين. بكل راحة بال واستمتاع اني اقدر اتحكم في نومهم بعد الله عز وجل...


عشان كذا اكيد فيه امهات زيي يعانو ومو عارفين كيف يتصرفوا قلت افيدكم وان شاء الله احد يستفيد من موضوعي عسى ربي يكتب الاجر ولاتنسوني من صالح دعاءكم 🙏

هذا وصلى الله وسلم على نبينا محمد وعلى آله وصحبه أجمعين. إن اصبت فمن الله وان أخطأت فمن نفسي والشيطان.
والسلام عليكم ورحمة الله وبركاته.. .