كيفكم يااحلى امهات
ان شاء تكونوا بااحسن حال
طبعا اغلب الاطفال اللي بالمراحل الاولى
عندهم صعوبات بالقراءه والاملاء ولكن تتفاوت درجتها على حسب الطفل
بعضهم عنده صعوبه لاتذكر وبعضهم التاسيس عنده الله يرحم حاله
المووووووهيم يااخوات عندي بنتي عندها صعوبه بالقراءه
وكنت دايما افكر ليه انا واخواني زمان كنا متفوقين بالقراءه
واطفال الزمن هذا يبهذلك ويطلع عيونك ويقطع جهدك حتى يدرس كلمتين
اول شي لاحظته
التأسيس
اذا كان تأسيس طفلك ممتاز انتهت كل مشاكلك ومعاناتك
واما اذا كان التأسيس لك عليه الله يعييييييييينك
وثاني شي
تقسيم الوقت
زمان كان عندنا نص ساعه للتلفزيون لاغير كراتين العصر
لا وبعد الا جا وقتها يجي حفل تخريج الدفعه العسكريه
او حفل استقبال او مباره للمنتخب والخ الخ
وأما جيل اليوم كل أنواع التكنولوجيا تحت أمره
تلفاز حاسوب سوني والعاب القيم والخ الخ
يعني منعتيه من شي راح للثاني
هذه بعض الأشياء اللي دارت بذهني
لكن فيه شي بعد كنت اكلم خواتي واقول سبحان الله كنت بصف اول ابتدائي وكنت اعرف اقرا كتاب كليله ودمنه
طبعا كلكم تعرفون هالكتاب
الكتاب كان في مكتبة الوالد هو ومجموعه من كتب التفسير
وكتب الاخوان المصريين احمد شوقي ونجيب محفوظ
كتاب كليله ودمنه كان كله صور حيوانات
ويشبه قصص الاطفال
كنا نحب نقرا فيه ونتهجى طبعا كنا نقرا ونبغى نفهم شي بس ماكنا نفهم كنا نفكر ان القصه ناقصه
ونقرا اللي بعدها نبغى نهايه لكن مافي طبعا عقولنا الصغيره ماتقدر تفك رموز القصه
اللي استنتجته لما تذكرت هالكتاب
ان احنا ماكنا نوقف عند المنهج وبس
لا كان عندنا شغف للقراءه
كنا نقرا ونقرا ونقرا
وهذا هو الحل عند اللي يعانون من صعوبة القراءه
خليهم يقروا ويقروا على قد مايقدروا وطولي نفسك معهم وبالك عليهم
اعطيهم قطعه فوق مستواهم لاتجي تعطيهم جمله بنفس مستوى المنهج اللي يدرسوه
لا كذا كأننا ندور في حلقه مفرغه
لازم عشان الواحد يتطور يطلع السلم درجه درجه حتى يطلع للقمه
وتذكرت مثل يقول من طلب العلا سهر اليالي
وين هذا المثل ماعدنا نسمعه
المهم بحثت بالنت لقيت تحميل للكتاب حملته
وخليت بنتي تقرا كل يوم 3 او 4 سطور
النتيجه
اتحسن مستواااها بشكل كبير وملاحظ
والحمد لله
هذه تجربتي وحبيت احطها لكم لعل احد ينتفع بها
طبعا انا مااركز على الكتاب هذا بالذات انا اركز على مبداء الفكره
اللي هو التدرج بالصعوبه
وان شاء الله تكون فكرتي وصلت