اسعد الله ايامكم بالمسرات حبيباتي
طبقي اليوم يمكن كثير يعرفه هو طبق شعبي سعودي من نجد بشكل خاص
المهم اليوم سويته بدون لحوم والسبب لان ولدي الكبير يعاني حساسيه منها والاوسط مايحب اللحم ابد
وابوهم يحاول يخفف من اكلها تعرفون مع الكبر كثر اللحم مو زين>>>>احلى تعتذر :angry2:اخلصي
مقاديرنا هي >> مجموعه من الخضار المشكله (جزر+قرع +كوسى +او جبى +بطاطس +فاصوليا)
المهم الموجود عندك والي تحبونه ابدا ما في شي الزامي لكن يكون التقطيع كبير
مثل الفاصوليا بالنص والجزر اذا صغار مثل ماهم والكبير تقريبا بطول الاصبع
بعدين في القدر نحمس البصل شوي لين يصفر وبعدين نحط الخضار تتشوح في الزيت عشان تاخذ شوي
طعم الدهن ما يكون طعمها ماصخ كأنه مسلوق, نحط الجزر والكوسى اول شي وبعدين البطاطس
بعدين نضيف الطماط المعصور مع الصلصه ونضيف الماء عليهم ومعها نضيف قطع القرع +والبهار المشكل+
والملح والفلفل الاسود +والفلفل الحار حسب الرغبه +ليمون اسود بكبره كمان حسب الرغبه
<<<< انتبهي لاتحطين القرع قبل الطماط لانه بسرعه يذوب ويصير شكله شين في التقديم
نجيب هالحين قطع المطازيز من السوق جاهزه او تصلحينها في البيت وهي ما تحتاج غير
دقيق بر او اسمر+قليل زيت+ملح +ماء حتى تصبح تميل الى اليونه قليلا خليها فتره ترتاح
وبعدين افرديها على الطاوله وقصصيها بفنجال الشاي او اذا كانت عندك التها الخاصه اسفه ما
عندي ولا كان صورتها لكم المهم بعدين ترمين القطع بأماكن متباعده عشان ما تلزق مع بعض وتكون النار
عاليه شوي حتى مع فوران المرق ما تلزق القطع مع بعضها , بعد ما تنتهين تذوقين الملح كالعاده طبعا
بعد كذا نرخي النار ونغطي القدر ونخلي يطبخ لين تستوي قطع المطازيز, اثناء السكب او الغرف نميل القدر
يعني كأنك ودك تكبينه في الصحن حتى ما يتقطع مع الكبشه ويصير شكله مو زين
هذا شكله النهائي صورته قبل الغرف معليش نسيت اصوره بعد الغرف
اتمنى انه يحوز على رضاكم واعجابكم
ودمتم بصحه وعافيه