تعرفي على العقد الخمسة لسلسة الـ <ليــش؟> !! ... اعطينا رايك

مساء الخير والفل والورد والياسمين والجوري والعنبر والريحان

كيفكم يا صبايا.. ان شاء الله بخير
اليوم في موضوع حابة اننا نفتحه ونتناقش فيه ونتجاذب اطراف الحديث
علنا نجد مبرر وعلنا نعثر على سبب العقد الخمسة لسلسلة الـ(ليش؟)

عارفة انه العنوان غريب ولكن اذا كملتو قراءة سطوري ستكتمل الصورة... الموضوع طويل شوي بس يستحق القراءة صدقوني..

بدأت عقد سلسلة الـ(ليش؟) عندي من بداية دخول الجامعة في احد الدول العربية

بحكم ان الجامعة مختلطة وشباب على بنات ودكاترة على دكتورات وفراش على فراشة و...و....و..........الخ
فكان في وحدة (وتلتها الكثيرات) سالتني عن (عندك بوي فرند؟)
جاوبتها بكل تلقائية واشمئزاز (طبعا لا)
تجمعت كل ملامح الاستغراب على محياها وقالت لي بكل تعجب واتسنكار(ليش؟)

==< كان مبدأي انه اهلي ارسلوني ادرس واتعلم واخذ شهادة.. مو اصاحب واتصاحب واعيش حياتي بالطول والعرضواغضب ربنا واهلي واستهين بثقة اهلي فيا... اوكي نطلع ونمزح ونتفسح ونعمل حفلات وننبسط... بس مو شرط يكون سبب سعادتي وارتياحي انه يكون لي بوي فرند ومو شرط انه حتى يكون لي زميل... زميلاتي وصحباتي يكفو ويوفوا... حتى شباب دفعتي قافلة عليهم الباب>==
المهم... والكثييييييييييير من البنات كانو يسألوني نفس السؤال والكل كان يستغرب من الجواب..

فلماذا الاستغراب؟... لماذا اصبح البوي فرند شيء اساسي ومهم... لدرجة انه اهم من الدراسة واهم من احترام وتقدير الذات ومن الكرامة؟؟؟
وهذه اول عقدة في سلسلة الـ(ليش؟)

ثاني عقدة في سلسلة الـ(ليش؟)
كان السؤال الذي يلي البوي فرند...(حبيتبي قبل كدة؟)
الجواب بكل بساطة(لا)
بكل استغراب واستهجان (ليش؟)

==< يعني خلصنا من البوي فرند طلع لنا الحب... وكان لي مبدأ ما عجب الكثير....انه اولا واخيرا انا ما راح اتزوج من غير رضا اهلي على العريس وظروفه وشخصيته... فما الداعي من انشاء علاقة عاطفية اخرتها الرفض من الاهل لاي سبب قد لا اكون ملتفته اليه قبلا بسبب الحب.. ودائما الاهل لهم نظرة في العريس... فليش اتعب نفسي واعصابي واستهين بمشاعري واعطيها لشخص يمكن ما يكون يستاهل الكلام العادي... مو الحب بحد ذاته... غير انه الشباب اليومين هذول كلهم طينة وحدة وقليييييييل اللي طينتهم نظيفة....وبعدين كل شي بالنور ورسمي يكون احسن وأأمن>==

مو اجباري ...الحب غصب؟؟... لا وبتجارب بعد!!!!
طبعا كلامي ما عجب احد بس انا مقتنعه انه هذا هو الشي الصح...

ثالث عقدة في سلسلة الـ(ليش؟)
اتخرجت والحمدلله واهلي فرحوا بتخرجي والكل فرح معانا
وجينا لأسوأ نوع من أنواع الـ(ليش؟) بعد التخرج (العقد الثلاثة الاخيرة اسوأ ما يمكن)

انا بعد التخرج قررت اني ما اشتغل لاسباب كثيرة (قلة الفرص .. عدم احترام الاشخاص لبعض في العمل... قلة الرواتب التي تكاد تكون اعانات اخر الشهر...............الخ) وغيرها الكثير قفلت بيت ابوي اولى فيا غير اني اصلا بيتوتية فما راح تفرق معايا كثير

وانهالت عليا الاسئلة بعد التخرج وبعد قرار عدم العمل..
ما اشتغلتي؟.....(لا)
(ليش؟)

==< وكأن الواحد حيموت من غير الشغل... او لازم يذل نفسه للي يسوى واللي ما يسوى يقولوا والله فلان حقق كيان نفسه... طيب اذا انا مو محتاجة للشغل والله يخليلي اهلي والوالد قالنا اذا الشغل ما حيحترمكم وتتبهدلوا اقعدوا بالبيت احسن ومو محتاجين الشغل(والحمدلله يارب على نعمك)..فليش انتو مستغربين؟>==

حرين احنا ما نبغى نشتغل... لايكون بنصرف عليكم وبينقطع عنكم الخير؟؟!!

العقدة الرابعة في سلسة الـ(ليش؟)
خلصنا من الشغل جينا للهم الاكبر اللي بعده
انا متخرجة من سنة الا كم شهر تقريبا... والسؤال هذا انسألته 700 الف مرة
ما انخطبتي (للحين؟؟؟؟؟؟؟؟).......
(لا)
(ليـــــــــــــــــــــــــــش؟؟؟؟؟؟؟)

==< وكأن العريس احنا اللي بنجيبه من قفاه او احنا اللي بنروح ننقي... بعدين مو اي واحد جا دق الباب زوجناه يا جماعة الخير...!!!!>==

فليش الاستنكار والاستغراب؟....مو بايدنا الموضوع وكله نصيب واللي ربنا كاتبه حيصير بوقته

خامس عقدة في سلسلة الـ(ليش؟)
وهذه اللي لسة ما مريت فيها ويارب ما امر فيها ابدااااااااااااااًً والله لايحط احد فيها
صديقتي الانتيم انحطت في هالقعدة ومو عارفة تطلع منها

بعد ما الوحدة ربنا يفتح عليها ويرزقها الزوج الصالح وتتزوج وتنستر...
بعد اسبوع من الزواج او حتى بعد كم يوم
(ما حملتي؟؟)
يجي الجواب..(لا)
(يووووه........ ليـــــــــــــــــــــــــــــش؟)
وياسلام لو مر شهر ولا شهرين وما سمعو خبر...
واحلى حاجة لو مر على زواجهم خمس ست شهور..
وتسمعو كلام الحريم (فلانة اتزوجت بعدك وهالحين قربت تولد وانتي لسة؟؟)
الكلام اللي يحبط النفسية ويوجع الراس حتى لو ما اهتمت لهم بيجي عليها وقت وتقعد تفكر في هالكلام

==<ياجماعة الخير كله بايد رب العالمين... كله مكتوب في اللوح المحفوظ... وكله حيصير بوقته عله خير وعله لحكمة ليش مستعجلين؟>==


يموتونا بهالاسئلة وخااااااااااااااااصة الحريم اللي مالهم شغلانة اللي يحكو على فلانة وعلانة وصار وحصل...

بنات قولوا بالله ايش رايكم في هالـ(ليش؟)؟؟
موتتني ... صار كل ما احد يسالني عن حاجة اجاوبه واقوله ما تقولي لييييييييييييييييييييش!!!

واكيد في غيرها كثير وكثير ... بس هذه اللي تحضرني الحين من واقع تجربتي

بالله مو شي يضيق الصدر ويحبط المعنويات ويكئب الواحد؟
انا الحمدلله تخطيت هذه الليشات كلها الا الرابعة والخامسة لسة..
وان شاء الله قريبا باتخطى الرابعة واخلص منهم وبتبقى عليا الخااااااااااامسة الله يستر..

يالله خبرونا عن تجاربكم مع هالليشات.. وكيف تخطيتوها

يالله مستنية ارائكم وردودكم
خلونا نستفيد