تعطون ازواجكم هدايا في العيد ؟ (موضوع للنقاش )

السلام عليكم ..

كيفكم بنات وش مسوين مع رمضان والكرف والطبخ 😢

اليوم جيت لكم بموضوع كان محور نقاشي انا وامي وخواتي الفاضلات امس .
جيت بكل براءة وقلت لهم ودي اشتري لزوجي هدية في العيد وشرايكم وش اشتري *ملاحظة ترى هذا اول عيد يمر علينا سوا *
قالت الوالدة خلي فلوسك لك واشتري فيها شي انتي محتاجته زوجك ما يستاهل دايمما تهدينه ولا عمره فكر يهديك < وهي صادقة هذا الواقع المر 😪
قالت اختي الكبيرة صاحية انتي تشترين له هدية بمبلغ وقدره نسيتي يوم سوا التصرف الفلاني ؟ نسيتي يوم طلبتي منه هاذيك الشغله وما جابها لك ؟
بعدين تخيلي تجين فرحانة بهديتك وما يعطيك هو شي بتنحرجين وبتحرجين الرجال وبتكرهون بعض *ترى بالغت في نقل كلامها شوي بس احس هذا اللي كان يجول بخاطرها ولا قالته *
المهم ما رح انقل لكم النقاش كامل لكن صار فيه اختلاف في وجهات النظر وانتهى النقاش بصرخة من امي وهي تقول بسسسسسس انتي وياها بتشترين بالطقاق اشتري جبتوا لي الصداع حسبي الله عليكم من بنات 😂
وانا للحين محتارة فقلت يا بنت ليش ما تنقلين حلقة النقاش هاذي من بين خواتك الحقيقيات لخواتك في العالم الافتراضي وتشوفين وش ينصحونك فيه


اشتري له هديه حتى لو انه ما قد تذكرني بهدية ؟
تخيلوا لو ما اشتري له وتحصل معجزة ويطلع هو شاري لي هدية كيف اتصرف احس احرااج *للحين ما فقدت الامل فيه *
علما بأني مطفرة حاليا لاقصى درجة ومستواي المادي متدهور يعني لو قررت اهديه رح اضحي بتضحيات مادية كبيرة :(

المايك لكم عزيزاتي اتحفوني بارائكم :luvkiss: