السلام عليكم ورحمة الله وبركاته
ربي منعم علينا بنعم كثيرة كثيرة مايحس بها الواحد الا اذا أفتقدها لاسمح الله
يعني خليني اسهلها لكم بمجرد أنكم تقرون هالموضوع .. تذكر ان ربي منعم عليك بنعمة النظر
نعمة القراءة نعمة التكونولوجيا ( النت ) نعمة الوقت
والنعمة العظمى من وجهة نظري ..
أنك رحت تقرا موضوع ديني وياليت يكون للنهاية
تتخيلون معي ؟ هذا بس وانت جالس تقرا الموضوع يعني بدقيقة وحده ! أجل يومنا كله وحياتنا كلها !
بنظركم كم ربي أنعم علينا من نعمة ؟
اللهم اعنا على شكرك وذكرك وحسن عبادتك :
عشان تحمد ربي على نعمك هذي كلها .. وعشان تستمر وتتزايد هذي النعم ,, لازم تشكر ربي عليها
زي ماقال في كتابه ( وإن شكرتم لأزدينكم ) .. :
وسائل الشكر كثيرة وطرقها متتعددة ونقدر نشكر ربي بوسائل عدة بس هل السؤال الاهم هنا هل احنا
نشكره ؟
صندوق الشكر
هو من الوسائل اللي عن طريقها نقدر نحمد ربي على نعمه ولو جزء منها
صندوق الشكر هو ببساطة مجرد صندوق زي الحصالة مفتوح من فوق حاطينه في الصاله ..
ومغلق موب كل ماأحتجت فلوس قمت فتحتاه صندوق شكر موب جمعيه
المهم اعضائي ياما حصل لك موقف فرحتي منه كثير ودك تشكررين ربي بس مااتدرين كيف !
يعني لو موقف بسيط أبسطك .. خبر مفرح .. أختبار سهل .. نجاح مادة .. وغيرها وغيرها
كل مافرحنا بشي يسر لنا ربي شي نروح نحط في هالصندوق لو ريال !
يعني ربي سهل علي في الاختبار أروح احط ريالين !
فاز الهلال في مباراة احط خمسة !
يعني انا حطيت الماكسيموم عشرة ريال عشان ماأتثاقلها ..
وبيني وبينكم عشان ماأطفر آخر الشهر :
يعني تدفع على كل خبر ريالين دايم ولاتدفع عشرة على خبر ثمن تنقطع..
(فالقليل الدائم خير من الكثير المنقطع ):
أي شي يفرحنا في اليوم , موقف , خبر , نحطه في هذا الصندوق
يعني مثلا مشيت انا حول البيت ساعه عشان أنحف أتصدق عن كل يوم ريال !
عشان ربي يعيني أني أمشي باقي الايام ! < مثال دببة
رحت لأمتحان وانا خااااايفة أني أزفت فيه بحكم جلوسي على خفوق الروح وتطنيشي المذاكرة
وجاوبت زين أحط ريالين
رحت لعرس وانخطبت أحط ألف
المهم أقولكم حطينا الصندوق هذا في رمضان مو اللي راح اللي قبله .. ولما جا رمضان اللي فات ..
تصدقنا باللي فيه كله والله إنا أنصدمنا من كمية المبلغ الموجود !
وهذا ان دل على شي يدل على كثر نعم ربي علينا وإحنا مانحس ّ!!
الله يديمها والله يديم شكرنا له
تصدقنا بالمبلغ في رمضان عشان الكل عارف عن فضل الانفاق والصدقة في رمضان
الحين أعضاءنا الحلوين
وش رايكم لو كل واحد جاب لبيته صندوق لو صندوق ببسي ولا صندوق بردقان
صدقوني مومهم المنظر بقد ماهو مهم اللي فيه كل ماجاكم خبرأو موقف فرحكم تحطون فيه لو ريال !
صدقوني ربي ماراح ينسى هالريال بالعكس ربي راح يعتبرها أعظم من كونها ريال واحد بس !
وأصلا راح يتضاعف عند ربي لأنه يعتبر من القرض الحسن !
زي مافي الايه الكريمة ( مثل الذين ينفقون أموالهم في سبيل الله كمثل حبة أنبتت سبع سنابل في كل سنبلة
مئة حبة والله يضاعف لمن يشاء والله واسع عليم )
وقال : ( من ذا الذي يقرض الله قرضا حسنا فيضاعفه له أضعافا كثيرة ، والله يقبض ويبسط وإليه ترجعون )
ماأقول في الاخير .. الا ( ربي اني لما انزلت الي من خير فقير : )