صباح/مساء الخير
كيف حالكم بنات انا دايم اقراء بعض المواضيع
واحتار كيف اساعد هذي بكلمه وكيف اطبطب على هذي بكلمه واحياناً اعجز عن الرد
واكتفي بالدعاء وانا ما اعرفكم اقسم بالله وانتم ماتدرون عني والله
عموماً
في بعض المواضيع
وحده تشتكي من زوجها (وانا ماني احسن منكم بالعكس اردى )
وحده من اخوانها
وحده من اخت زوجها
ووحده من ام زوجها
و
و
و
والواضح ان كلهم تربطنا بهم علاقات قويه وطيده
خواتي انا بقولكم قصة امي
لعل وعسى تكون لأحد منكم قدوه بالصبر
ومافي ولا اظن انه يكون في قدوه مثل الرسول صل الله عليه وسلم
بس لعل وعسى
امي يابنات ذاقت العذاب وكان مافي اي حل ولافي اي شي غير الصبر (رغم ان الفرج كان فليل امام معاناتها ولليوم وهي صابره )
والدي من طلع على الدنيا وهو مسجون
ربتنا اطفال ١٢طفل
تدبر اكلنا من الضمان الاجتماعي عززت ثقتنا بانفسنا ماحسينا ان لنا ابو مسجون محد كسرنا ولا احد عايرنا ان ابونا مسجون ماعمر احد فينا نقصه شي ننام بأحسن الفرش وحنا ماندري اصلاً امي منين جابتهم
ننام وهي سهرانه تفكر يمكن بكرا ينقصنا شي او لا
بس حنا ماندري نايمين
كبرنا وكبرت مشاكلنا ومع ذالك مانقصنا شي
ماني عارفه هو تدبير من امي ولا محافظه ولا ولا ولا
كبرنا وابوي لسا بالسجن
اخوي الكبير من كان عمره ١١سنه امي طلبت احد اخوانه سياره بفلوسها وشرت سياره وخلت اخوي يسوقها
لو تشوفون اخوي وامي كيف تعلمه السواقه
متخيلين تحط تحته مخدهعشان يلحق يشوف السيارات اللي قدامه لان جسمه صغير مره مايساعد يسوق سياره
(للمعلوميه اخوان امي وخواته تخلو عنها من انسجن ابوي قالو لها اتركيه وتعالي عندنا ورفضت وهم بدوله ثانيه وعايشين عيشة ملوك بكن امي رفضت وقالت ما اترك ابو عيالي وعيالي انسوا اعيش واكل تراب ولا اتركهم )
كبر اخوي وكبرنا وصار لنا ابو مع امي يودينا ويخاف علينا وينصحنا ويضربنا اذا اخطينا
صار عمره ١٩
وارسلته امي للجيش وجلس ٩اشهر بالدوره
ولما رجع رجع لنا انسان حنون جداً قلبه اطيب قلب
بس
الله كان يبي امانته (توفى اخوي )
مابقى كان توه واعي ع الدنيا
توفى اخونا الابو اللي علمنا العيب والحرام والحب والاخوه
وكبرنا شوي ومسك اخوي الثاني العهده
وكان اقوى وبنفس الوقت احن علينا من نسمة الهوى
يجيبنا ويودينا وتوظف ويعطينا ويشريلنا ويسفرنا
ماحسينا بنقص افضل من ناس كثير عندهم ابوهم وامهم
بس بعد هالمره الله ربي ما اراد انه يكمل معنا
وكأنه يختبر صبرنا
يارب لك الحمد والشكر ياربى لك الحمد والشكر والرضى التام
يارب انت خلقت وانت اخذت ونحن لا حول لنا ولا قوة الا بك
(توفى اخوي الثاني )
توفى وكسرنا توفى اخونا وابونا الثاني
اااخ ياكسر قلبي
ورجعنا الى نقطة الصفر
البقيه صغار
لكن الحمدلله كلنا تزوجنا افضل الرجال انا واخواتي
واكملنا الحياة مع امي خففنا العبئ
اللي بقوله يا اخواتي
ان كل شي هو ولا شي الا ان تفقدي
اخوك مرتين وابوك مرتين
وسندك بالحياه وسترك
كل شي ولا شي اذا تنازلتي لام زوجك ورحمتيها لان خذا ولدها ولا راح تحسين بشي داخل صدرها عامليها افضل معامله وربي راح تشوفين من الخير اللي يذهلك
وكل شي ولا شي لو سديتي اذنك عن اخت زوجك بتكسبين راحتك وبيفتر حيلها هي وتمل منك وتتركك
وكل شي ولا شي لو فزعتي لاختك او اخوك لأن والله مالكم بالدنيا الا بعض خلي اخوك يقسى عليك واكسبي مكانه عند الله منتي خسرانه شي الدنيا فانيه
اضحكي بوجه اختك اللي تغار منك تتغير الانفس وتحبون بعض
لكل شي في حل بس ركزوا على مشكلتكم
حطي الحلول قبل تشاركينها مع الناس فكري كثييير
وحطي كلمة (الله بين عيونك)
ضحي
ضحي كثير عشان الله
عشان عوض الله
يووووه يابنات يازين عوض الله والله والله مرينا بمصايب تهد جبال بس نتفه من عوض الله تنسيك اوجاع اوجااااااااع
توجهوا لله استخيروا في كل اموركم مشاكلكم
الله مايضيع حق احد ولا وجع احد ولا تضحية احد ولا اي شي تسوينه لله
لو تتعدين نمله ولا تدوسينها لوجه الله لك عند الله شي
احمدوا الله كثيراً
هونوا مصايبكم خلوها ولا شي
لا تستغفلكم الدنيا والشيطان ويعظم هوشتك مع زوجك .هو مخطي تجاهلي
لا يستغفلك الشيطان ويعظم مصيبتك مع بنتك او اخوك او ابوك او ام زوجك او اخت زوجك
ارضو انفسكم
عيشوا حياتكم وتجاهلوا الفقر والجوع لأن اللي كاتبه الله بيصير
وكل يوم رزقه حطي راسك ع الوساده وقولي بكرا بيرزقني الله وبس .
(نقطه:انا ما اقول هالكلام من راسي انا مريت بالجوع والفقر والشتات ويمكن للحين اعاني لكن قناعتي ورضاي بأمر الله كبيره الله لا يحمل انسان فوق طاقته وهذا اللي يمكن يخليني اصبر واتجاهل والان انا ببيت امي وناقصني اغراض ويمكن جوعانه بعد بس فرحانه اني اقوم واصلي وفرجانه اني اكلت اليوم وفرحانه اني سمعت ولا احد ضرب عيالي فرحانه اني ضحكت فرحانه اني سويت فطور لأمي وانبسطت مني هي اشياء صغيره بس كبيره عندي لاني غصب طيب اقنعت نفسي ان هذا الصح وهذا اللي مفروض يصير واني ممكن اموت باي لحظه ولا سويت شي حلو او كدرت اللي حولي )
بالنهاية اقولكم يارب يارب يارب يقرجها علي وعليكم وعلى كل مسلم ومسلمه متكدره او ضايق من شي او صعب عليه شي
والله يعوض شباب اخواني الجنه
ويرحمهم ويرحم اموات المسلمين
ويارب لا تأخذنا من هذه الدنيا الا وأنت راض ً عنا
يارب انت الحق ووعدك حق واسمك حق والموت حق والحياة حق وكل شي ً هو منك حق
يارب رضاك والجنه
والسلام
جزاك الله خير حبيبتي أروع موضوع