تعقيبا على زوجي لا يبالي بعروسته.....وآخرتها

السلام عليكم ورحمة الله وبركاته....

أخواتي الغاليات لي أكثر من 8 أشهر بعد موضوعي الأول وأنا أحاول بس الحالة تزيد مع الأسف بأطرح عليكم مشكلتي..
وهذا الرابط الأول والشكر للأخوات اللي ماقصروا وردوا علي باللأولhttp://forum.hawaaworld.com/showthread.php?t=739716#Scene_1

زوجي مهوووس بشي اسمه أصدقاء ويدور أحد يعبره وإلا يعطيه وجه عشان يقول أنا معزوم وإلا بطلع ويترك البيت طبعا قدر الإمكان يصرفني عند أهلي عشان ما يأنبه ضميره وإلا أدق عليه وأقول خايفة لوحدي ..ولما أرفض أروح بالأول كان يغصبني ومؤخرا صار يطلع حتى بدون ما يقول مع السلامة وإلا بتروحين لأهلك ويقعد ما يدق ولا يسأل أو يطمن ولما أتصل فيه مايرد وإذا رد بعد كم اتصال كلم بغير نفس يخليني أندم إني دقيت ..

المشكلة مو في طلعاته لأن كل الرجال كذا بس زاد عن الحد الطبيعي تخيلوا والله من الساعة تسع الصباح يوميا حتى الساعة وحدة ونص ثنتين في الليل وإذا جاء صار مرهق وفيني نوم وموفاضي يعبرني وإلا يسولف وأنا إنسانة إجتماعية أموت بالسوالف والجمعات وسعة الصدر

تقولون إفتحي نت ماعندي موراضي يدخله وجالسة أكتب لكم من بيت أهلي مع العلم إنه مدخل لأخوه وبنات أخوه بإسمه وهم مراهقين...وأن أبي حل لي معاه كيف النت مو ضروري

كل هالوقت مع أصدقاءة تخيلوا يطلع مع واحد قبل الدوام ويواعد الثاني فترة الغداء والثالث المغرب وفي الليل يسهر في الإستراحة مع الشباب واليوم اللي ماعنده دوام فيه يروح يحرس الإستراحة جعلها تحترق وياليته اجتماعهم على خير إلا على معاصي الله يهديهم

لنا سنة متزوجين أول الوقت كان يطلع مرتين ثلاث في الإسبوع ويوم بدت تزيد معاه كلمته ما فاد تركته وجلست في بيت أهلي ورجعت بعد فترة وتفاهمنا وقال خلاص بحدد أيام معينة لهم وبعد إسبوعين من النكد وعقدت الحاجب والتنكيد كل ما جلس رجع لأول وأردى وزادت به الحالة إلى الوضع هذا

أكثر شي يغيضني لما أكون أنتظر وقت يناسبه أحتاج أروح محل ويعطيني موعد بعد إسيوع أو اثنين وأجلس أنتظره إذا جينا بنطلع دق عليه أحد (( أيا كان من أصدقاء أو ولد أخت أو بنت أخو أو زميل قديم)) يقول طيب جاي ألحين ويطلع ويتركني ويقول خلاص مو لازم ولا ضروري ماراح تموتين لو ما خلصتيه

والله يا بنات بعدين أكتشف إنه راح يوديهم سوق وإلا مكان ولا قال تروحين معاهم والمصيبة إن عندهم أخوان وآباء وأعمام وأخوال غيره مو متزوجين وجالسين معاهم بس يشوفون هالمتزوج يحب النحشة من البيت وأنا يرفض يوديني إلا بطلعة الروح يقول ما أحب هالأماكن روحي مع أهلك

حتى الروحة مع أهلي بشروط ولا أطلع لأي أحد معاهم لازم تحقيقات ومتى بتروحين ومتى بترجعين ومن بيوديكم وليش ..وهلم جرا حتى صرت أكره أتصل عليه أسأله وأكره أروح لأهلي عشان ما أمسكهم بالبيت

وبعض ربعه يصرفونه بس مايقول حتى أول كان يقول بطلع مع واحد وبعد ما اتفقنا على تحديد أيام الطلعات ونكث صار يقول عندي شغل وأبغى أطلع ويسفهني إذاقلت وين أو مع مين.. وإذا قلت متى بتجي قال ما أدري إذا بغيت أجي دقيت وأجلس أنا على أعصابي إذا كنت في بيت أهلي وإذا في بيتي أهون بس أموت من الطفش والقهر والصياح أحس إنه جايبني أحرس الشقة ما كأني متزوجة وأقول لو ماخذه مسيار أصرف أقلها ما يتحكم فيني

ومؤخرا كل ما طلبت شي للبيت قال ماعندي مع العلم إنه ماقد دفع شي لي من تزوجنا إلا أول أسبوع من زواجنا عجبني حلق إكسسوار واشتراه.. حتى واحنا بالمحل لما آخذ شي للبيت يقول إذا أنت معاك فلوس ولا ترا أنا ما معاي وأرجع الأغراض إذا كان ما معاي لأني موظفة على بند وراتبي يالله فاتورة جوالي والأجار أدفع النص ويقول خلص راتبه بعد 5 أيام من ياخذه ويبدا يصرف مني

أحس إن الرجال مو قد المسؤوولية ومبسوط بطلعاته يقول ما راح أجي ولا آكل في البيت ولا يتقضى حتى الأثاث ماحطينا شي غير غرفة نوم وجلسة لنا يقول بعدين أنا ما معاي وإذا تبين إشتري أنت وما نستقبل ضيوف أبد...وكل مابديت أجمع جت مناسبة ولدوا زوجات أخوانه وتزوجت وحدة من جماعتنا ومن جماعتهم ويروح اللي عندي هذا إذا أمداني أجمع..:icon33:

المصيبة اللي قصت ظهري طبعا جت الإجازة وخلصت ألحين وأيام إجازاته اللي أخذها قضاها مع الربع إياهم ولا وداني ولاشي انتهت إجازتي وإجازته ولما بكيت الإسبوع الماضي وقلت حرام آخر يوم بإجازتي والعالم كلهم طلعوا واتمشوا واتهنوا وسافروا وأنا ما تحركت حتى أهلي راحوا وما خلاني
أروح معاهم قال إنتي عارفة أنه ماعندي قدرة قلت أنا ما قلت بروح برا زي أخواتك وزوجات أخوانك والناس بس بروح آخذ عمرة يوم وبرجع سفهني وطلع ويقاله رجع بدري 11.30 وقال تبين أبو ريالين يالله غيره ما عندي ورحت وخلاني أحاسب من عندي وكالعادة أخذ الباقي..

وألحين يقول بسافر أنا والشباب ألحين صار عندك فلوس وأمس تقول ما معي :(

مشكلتي بدت من تزوجته تحولت من فراشة إجتماعية متألقة ومحبوبة إلى شخصية كئيبة بائسة أي حاجة تكدرها وتصيحها

أبغى حل جذري تكفون يا صاحبات العقل والحكمة مع العلم إني مو مقصرة عليه بشي واهتم فيه وأداريه قالوا جربي تطنشينة وتهتمين بنفسك جربت صار يطنش أكثر وأكثر ويتجاهلني جربت أجيه بأسلوب وأحاول أحنن قلبه بالأول كان يسمع مني ويحاول يداري ويقول وجهة نظرة بس بطريقة تهديني ومؤخرا صار يسفهني و إذا قلت خل نتفاهم قال:بدت الدندرة
والله إني إنسانة متفهمة ولاقيني من جد ..


شوروا علي يا بنات تكفون وش أحسن طريقة وإذا فيكم أحد مثل حالتي أو مجرب وأعتذر عن الإطالة:26: