تعقيب على موضوع احس حالي متورطه ومشتته

الحين انا نفسي افهم انتم ليش تخلطون الامور مع بعضها ناس تقول طبخك لاهل زوجك وحموانك وكرفكم لهم !!
طيب انا متى شكيت من هذا الحال قبل سنه و4 اشهر رمضان العام كانت فتره وعدت شكيت من ظروف ذاك الوقت والحمدلله انحلت خلاص موضوع وانتهى ...
ناس قالت انتي تحملين وزوجك مو راضي وفيه وفيه ايش عرفكم بس لاني نزلت موضوع قلتلكم فيه ردت فعل زوجي وقت عرف حملي طيب انتم تعرفون ضروفي تعرفون سبب حملي ورى بعض عشان تلوموني ،،،
زوجي رافض رفض قاطع اي موانع ويفضل العزل الطبيعي وماتنفع معانا مره تصيب ومره تخيبه وكلها بقدرة الله عندكم علم بالمشاكل اللي سويتها ووصلتها لاهله واهلي عشان بس مانع لانه يوعد يساعدني ويجيب شغاله واذا طاح الفاس بالراس انكر وعوده وعلى كذا ما استفد شيء طيب الحل اخذ موانع من وراه جربتها بمجرد ما اكتشف الشيء هذا قطع عني المصروف وصار يجيب كل شيء للبيت علشان ما اطلبه فلوس يتحجج بأن كل شيء متوفر ...
يعني ما استفدت شيء وكلت امري لخالق السماوات والارض والحمدلله على كل حال .
وبالنسبه لامنيتي في حملي بالبنت فيها شيء كفرت من مجرد امنيه مهو انا ما استخدم موانع وكذا كذا راح احمل لو قدر الله لي هذا الشيء لان هذي رغبة زوجي هو مانعني من الحمل بأستخدامه للعزل ومتى ما بغى طفل بطل عزل بيدي يعني والا اطلب الطلاق والا امتنع عنه يعني بنظركم اسود عيشته عشان ما اجيب طفل زياده هذا مقدر ومكتوب وزوجي ما اقدر عليه .
جايبن تلوموني لاني الوم اهلي واخواتي ايه الومهم اذا انهم طول الشهور اللي فاتت يوعدون بالمساعده ووقت حاجتي لهم يطردونا اصلا كل الناس قاعده تتكلم ليش ما اروح بيت اهلي كالعاده ليش ماهم راضين يستقبلوني من بعد وفاة ابوي الله يرحمه كل شيء تغير حتى نفوسهم تغيرت ماعد يطيقون بعضهم بعض ويعطون وعود وتعالي وعلينا الصغار وجيبي البيبي عندنا نهتم فيه اذا ماقدرتي واذا حصل الحاصل وجاء وقت الجد تنكرولي وتقولون ليش الومهم ..
واللي تقول احمدي ربك زوجك صابر ومستحمل وكأن الغلط غلطي انا المتحكمه في الانجاب والفروقات بينهم ماكأن زوجي السبب الرئيسي فيه وقبل كل شيء قدرة الله وارادته لهذا الشيء وقت شكيتلكم من تصرف زوجي وقت ماعرف بحملي هذا لانه ماتوقع يحصل بهذي السرعه لانه كل مره يوعد بالشغاله ويوعد بالمساعده ووقت الجد انكر وعوده بعد ماحاجيته فيها زعل واستغل الفرصه عشان ماافتح الموضوع مره ثانيه وهو اصلا كل همه نفسه الحين زعلان ليش حامل في بنت ويحلف ويتوعد اذا ماجبتله ولد انه يتزوج بالله هذا واحد متأذي من الاطفال ورى بعض الا بالعكس ولو همه كان جابلي موانع الدنيا كلها والا سمع لتوسلاتي له عشان ننظم بينهم على الاقل ..
وتجيني وحده تقول اذيتي زوجك احمدي ربك انه مستحملك انتي وبزارينك هو اصلا مافكر لاني شايله المسؤوليه كلها ماعليه الا يصرف وبس خاصه مع طبيعة عمله ..
وبعدين انا فتحت الموضوع بكبره طلبت فيكم برنامج معين امشي عليه وقت نفاسي حبيت استفيد من افكاركم ماطلبت منكم مجلدات في التوعيه بالأضرار الاجتماعيه من الانجاب ورى بعض *
شكيت لكم معاناتي مو عشان الاقي طبطبه والا الاقي لوم وكلام خارج عن الموضوع موضوعي واضح ((( كيف اتصرف مع اطفالي وقت نفاسي كيف انظم وقتي لاني قررت اعتمد على نفسي والله لايحوجني لاحد ))) ماقلتلكم انصحوني اوقف خلفه والا ارجع الزمن 11 سنه ورى واعيد ترتيب الخطه ...
اتمنى قبل ماتخلطون الامور في بعضها وتروحون للملف تشوفون المواضيع وتجلسون تعلقون على اساسها انكم تلتزمون بالرد على الموضوع نفسه وفي حدود السؤال المطروح مالها داعي التنبيش والكلام في مواضيع ثانيه لها شهور وسنين ممكن تكون انحلت وخلاص انتهت ترجعون تعيدون وتزيدون فيها طيب خلاص انتهت مشاكلي الضروف ماتدوم على حالها طوال العمر والمشاكل تجي وتروح مو شرط اني ذكرت موضوع قديم ومشكله قديمه انها تبقى معي طول العمر ..
وعلى كل حال شكرا لكل وحده ردت والله يعطيكم على قد نيتكم انا ماخصصت احد بكلامي هو موجه لكل وحده ردت فيكم وخلطت بين المواضيع .
شكرا لكم جميعا 🌹