تعقيب على موضوع الاخت (رفض البنت الشاب بعد الشوفه)

السلام عليكم ورحمة الله وبركاته
كتبت هذا الموضوع لاني انا جربت الموقفين
الاول اني انا اترفضت بعد الشوفه
والثاني اني انا رفضت بعد الشوفه
بس الغريب والعجيب انو لمن العريس رفضني
اهلي الموضوع مر عليهم مرور الكرام وماواسوني ولا راعو مشاعري ماكلموني ولا اعطو الموضوع اي اهميه كاني مااحس
بس لمن انا رفضت ايش اقلكم بس ولا كانو حق من حقوقي
خلو الغلط عليا وعصبو وضغطوني بالكلام بشكل ماتتخيلو تعبت نفسيتي ذيك الفتره وكانت فتره اختبارات ماانسا ذيك الايام
حتا لدرجه قالو احنا برينا ذمتنا امام الله وانتي ياويلك ياخوفنا تجيكي عقوبه من الله ماراعو اي شعور
عقوبه ليه انا ايش سويت كفرت ولا سجدت لصنم مااعرف ليه في مجتمعنا اي شي البنت تسوي يتحول كبيره من الكبائر والولد حلال كل شي عليه
سبب رفضي كان عدم راحتي فعلا كل مااتذكر الموضوع اضايق ودعيت واستخرت ربي وهما مو مقتنعين بجوابي
نسو القصه اللي حدثت ايام الرسول انو واحد عبد مملوك كان متزوج عبده مملوكه ومع مرور السنين العبده اعتقت وسارت حره وخلاص ماتبغا زوجها والزوج راح لرسول الله يبكي يبغي زوجته ام عياله راح رسول الله يتوسط للرجل عند زوجته وقال لها ارجعي لزوجك قالت الحرمه أتأمرني يارسول الله اجاب الرسول لا ما آمرك ورفضت الرجوع وراحت في حال سبيلها ليش ماقلها الرسول انتظري عقوبه من الله وهوا كان زوجها وعاشت معاه ايام وذكريات
والقصه الثانيه انو برضو وحده مع زوجها المهم زوجها كان في جمعه مع اصحابو والزوجه بس رفعت الستار وطالعت وشافت انو زوجها اقصر الجاليسين فطلبت الطلاق ولمن سالها الرسول قالت نفس السبب ليش ماقلها انتظري عقوبه من الله
>> القصص هذي في مامعنى الحديث ماني مفتكره النص بالزبط بس اكيد تعرفوها كم شيخ قصها
معناتو الوحده لازم ترتاح نفسيا مع زوجها هذا زواج عمر كامل مو يوم والا يومين
اتذكر كلمة ابويا وهوا يهدد ويقول لاتفكري بزوجك واحد بطال واخلاقو مو كويسه
ابويا كان معجب بالرجال اعجاب شديد لانه خاتم للقران ويحسسني انو احمدي ربك جاك واحد زيه ليه انا ايش فيني وانا الحمدلله حافظه نص القران و ان شاءالله يكرمني ربي بحفظه كامل ليه الولد لو حق يتشرط ويختار والبنت غصب عنها ترضا باللي قدامها
اسمع امي تتكلم مع جارتها على مواصفات البنت اللي اخويا يبغاها وذكرو وحده اخلاق ماشاءالله وموظفه وخاتمه قران قالت امي لا ولدي مايبغا وحده كذا قصدها متدينه قلت في قلبي سبحان الله هوا يختار على كيفه طيب وايش فيها المتدينه والا بس انا اللي تجيني عقوبه من الله وانا استخرت وماارتحت وكلي امر وثقه من ربي انو بيعوضوني خير


ودحين جا لاختي الاصغر مني عريس ومددخن الله يوفقها ويسعدها وابويا وافق والفرحه شاقه حلقه الله يهنيه وامي مبسوطه ماشاءالله ويشهد الله انو مافي قلبي اي ذره حسد الله يسعدها ويهنيها ويسخرهم لبعض بس استغرب اهلي وتناقضهم ماني قادره افههم
علا ايام خطبتي سوو مذيااع الكل عرف ويوم الشوفه حفله سارت عزيمه وحضرو ناس لين ماالعريس خاف وهج
ودحين علا اختي ماقالو لمخلوق الا بعد الخطبه الرسميه والتحاليل


ادري البعض بيقول اني حاسدتها لكن يشهد الله اني ادعيلها بالتوفيق والسعاده بس تناقض اهلي مجنني كل مااتذكر هجومهم عليا ابككي قهر ليه مايحسو فيني محتاجه احد ييسمعني نفسي اقلهم الكلام هذا كله اللي قلتلكم هوا بس انا اعرف ردة فعلهم بيقولو عني حقوده وحسوده وانا ماني ناقصه
ااااااسفه طولت عليكم بس موضوع الاخت حرك فيني ذكريااات احاول اتناساها اتمنى من كل ام تراعي مشاعر بنتها وتوقف معاها في كل لحظه نحتاج احد يسمعنا ويد حنونه تمسح علينا اتمنى منكم يا اخواتي دعوه في ظهر الغيب ❤