تعقيب على موضوع بنات تكفون ساعدوني انا في هم مايعلم فيه إلا الله

بنات الله يسعدكم على كلامكم ونصايحكم لها


وهذا ردها على بعض البنات الي يقولون خنقه وغيره


بنات الله يسعدكم افهموني علاقتي فيه جدآ قويه وانا تاركه له مساحه ومو خانقته صح كل يوم نتكلم لأن نشتاق لبعض وهو الي يطلب ادق عليه ويزعل اذا طولت بس وقت مايكون مشغول ما ازعجه ليه تقولون اني خانقته


والي تقول وينه عني تزوج وخلف وتوه ينتبه لي بنت خالته قدامه هو اكبر مني وقت زواجه كنت صغيره عمري ١٣ ومحد يتزوج في ذا العمر وللأمانه انا ماكنت افكر فيه هو دخل حياتي وكان يحاول يكلمني بأي طريقه اذا شافني في مكان وعلى رقمي وسنابي كان يلاحقني فتره طويله وبعد محاولات منه رديت عليه واخذنا ٨ شهور مع بعض حبينا بعض وخطبني وهو الي مأجل الزواج كل مره اقوله نتزوج يقول مو فاضي وعملي مشغول فيه ومسافر من مكان لمكان ومو مستقر يجي فجأه يقول عندي لك مفاجأه انا قررت نتزوج في اليوم المحدد واذا قرب الوقت طلع له شغل وتأجل كل شي


بنات انا ماعاد احس بالأمان معاه بس باقي احبه واحس حياتي بدونه مستحيله واحس اني معميه فيه بصراحه


دائماً افرح إذا قال قرب زواجنا اتجهز واعد لليوم وقبله بكم يوم يطلع شي يكنسل الزواج اقصد الملكه مره وعدني في يوم نملك وتجهزت وكل شي قال اسف عملي اتصلو فيني عندي شغله ومسافر ضروري اخلصها واعذريني دوامي ماهو بكيفي ومن ذا الكلام


وصلت لمرحله اقوله تعال خذني معاك حتى بدون حفله يقول وين اخذك قلتله اي مكان في العالم اهم شي اكون معاك لو سمحت قال انتي تحسبين انك مثقله علي او شي عشان تقولين لو سمحت ترك الكلام وركز في ذي الكلمه وترك المضمون


والي تقول كلمي حد من اهلك اغلب اهلي مو موافقين وقالوا قرارك وانتي حره اخوي مستحيل يسمح لي افتح معاه الموضوع يقول اختيارك وراجعي نفسك فيه امي بعد متردده فيه تقول لأنه دخل السجن بسبب ديون ماعاد ينفع خلاص بس هو خلص ديونه وطلع والحين حالته الماديه ممتازه بس مايشوفون إلا الماضي
وعشان تفهموني انا اكلمه من ورا اهلي لان مابينا عقد قران ملكه بس خطبه
وانا عن نفسي حبيته كثير والحب هذا اتعبني نفسياً بنات اوقات احس الموضوع مو طبيعي تعلقي فيه مو طبيعي اذا طول عني انجن بعده اجلس في عزله لحد مايرجع احس دنيتي كلها متعلقه فيه ومستعده اضحي بكل حياتي عشانه كل هذا وربي يشهد غصب عني انا اعاني من تعلقي فيه احس نفسي مو طبيعيه وحتى هو قاله قال الحب الي انتي وصلتي له انا ما اقدر اوصله انتي ضحيتي عشاني بس انا ما استاهل لاني سربوت ومافيه خراب ماسويته حتى هو شايف حبي كثير عليه وانا نفسي مو مقتنعه بتصرفاتي احسها غصب عني كلامه معي جدآ مستفز
وبقولكم شي انا قابلته كذا مره بدون علم اهلي فهمتوني واحس حتى امه تحاول تبعده عني خالتي تقولي انتبهي لنفسك ولدراستك وعيشي حياتك ودايم تسأل عن اخباري احسها خايفه علي وماتدري كيف تصارحني بس تلمح انه ابعدي عن ولدي هذا
وباقي التفاصيل في موضوعي الأول
ما ادري فهمتوني و بس احتاج منكم نصيحه ودعاء والله يسعد قلب كل من تعنت وردت