تعلقت بدكتور الاسنان يارب اشفيني

بنات من منكم صار لها مثلي
عشقت دكتور كنت اراجع عنده وحبيته بشكل مااقدر اوصفه لكم
صار لي اكثر من 4 سنوات وانا على هذا الحال
دلتني عليه صديقتي وقالت انه دكتور ممتاز روحي له وياليتني مارحت
من 4 سنوات وانا اقول كل يوم انساه بالعكس ازيد واتعلق فيه
هو جدا محترم وخلوق بس كان يتكلم معي اول مره وعاملني بحنيه اعتقد لاني جايه لحالي وتعلقت فيه
بس حتى لو ماعاملني هذه المعامله اعرف اني ابتعلق فيه بحكم ان قلبي خالي واتعلق بأي احد
عمري مارحت وانا ماني محتاجه ابدا بس افكر اروح حتى لو اشوفه من بعيد
وصلت في اني افكر اروح اخر دوامه حتى اشوفه اذا خرج بس الوقت يكون متاخر على الساعه 11
وافكر اني اروح مبكر قبل لايداوم بس الاستراحه خاصه بعيادته واكيد الممرضه بتناديني بحكم اني لحالي
وافكر اروح بوقت الصلاه علشان اشوفه اذا خرج يصلي بس تأكدت انه يصلي بغرفته مو بالمسجد
وطول وقتي وانا على قوقل ابحث عن صوره وجدت صوره بتويتر وطلعت رقمه من البرنامج وافكر اني اكلمه بس اسمع صوته
واتاكد انه رقمه ماقصدي علاقه ابدا لاتفهموني غلط وكل وقتي وانا ارقبه بالواتس
واذا صحيت وكان وقت صلاه مااصحى الا بعد ماتفوت الصلاه طول وقتي وانا عايشه باحلام اليقظه وافكر فيه
مو تفكير جنسي ابداا والعياذ بالله
المشكله اني كبيره ماني صغيره عمري 35 غير متزوجه احس التصرفات والتعلق الزائد تصرفات مراهقات
ماادري كلامي صح ام لا
يااارب اشفيني على الاقل ابي احافظ على صلاتي حتى ذكر الله نسيته لان بالي مشغوول