أعرفكم بنفسي مرة ثانية
معاكم أختكم سارونا من ××× عمري ٣٥ و غير متزوجة
لكن الحمد الله مرتاحة في حياتي و أسرتي و أمي وابوي وأخواني و خواتي احلى شي في حياتي عسي الله يخليهم لي
و يحفظهم يارب ، متعلمة تعليم عالي والفضل كله يرجع لله و لوالدي ولاسرتي،
عندي هوايات عديدة و خذيت بعضها عن دراسة و بعضها بالممارسة،
و فوق هذا عندي شهادة حصلت عليها بدورة حضرتها في امريكا عن كيمياء التجميل
بنات اعذروني من الحين بقول لكم يمكن مؤ كل سؤال راح يصير عندي وقت
اجاوب عليه لكن راح أحاول و اتمنى منكم أنكم تتفهمون هذي النقطة
انا قلت في الموضوع أني راح أتكلم عن الأنوثة من ناحية جمالية و عناية بالبشرة و الجسم
و بنفس الوقت الأنوثة كصفات واطباع وراح افهمكم الموضوع
من هالناحيتين الداخلية و الخارجية علشان تكتمل الأنوثة
لان ما ينفع نركز علي جانب و نترك الجانب الآخر.
قبل حوالي 6 سنوات اختي كانت بهذي الفترة على أبواب الزواج
و طبعا كوني أكبر خواتي كانت تطلب مني بعض النصايح وكنت اسكت لأني ما عندي اي خلفية علمية عن الرجل "كزوج"
وبالإضافة الي أني كنت بين صديقات يعانون من أزواجهم و مشاكل معاهم فخفت على اختي اكثر
(وسوسة الله يكافينا شرها هههههه) و قمت ابحث عن اسلوب تعامل الزوجة لزوجها
و بصراحة الكتب وايد بالمكتبات عطتني معلومات اقدر اقول عنها ****ئية و مكررة و ممله و علشان
اكون صادقة اكثر مع نفسي ما حسيتها تفيد مع الرياييل في زمنا هذا
دخلت لمنتدى ناعمة الهاشمي و اعجبتني في بعض الاشياء اللي تذكرها وبعضها ما حسيت انها تناسب ،
قلت لاختي عن اللي شفته مناسب لها و ماشا الله حياتها ماشية
على اي حال
انا ما توقفت عن البحث و قمت ابحث مؤ علشان اختي بس حسيت ان صار فيني فضول اكثر وأبي اعرف اكثر.
في خبيرة أسترالية في الأنوثة و فن الإغراء
اسمها "ميلينا دين " و صراحة هذي الوحيدة اللي حسيتها مميزة
و اقنعني أسلوبها لانها خذت علمها من دراسة علمية و خبرة،
وانا شخصيا أؤمن في الإثباتات العقلية و العلمية اكثر من ان ينقال لي كلام بدون دليل صعب أني اقتنع فيه.
حطوا في بالكم اولا ان هالخبيرة مسيحية وتعطي النصايح لبنات مجتمعها المنفتح،
الحمد الله في مجتمعنا الخليجي ما عندنا مثل انفتاحهم لكن أشوف ان إحنا في بداية الانفلات الله يستر علينا و يحفظنا
تقول هذي الخبيرة انها قامت تسوي الدروس لان بنات مجتمعها وايد تعبانين من الرجل و استغلالة للنساء ،
يلعب فيها اشوي بعدها ما تشوفه وهالشي حطم وايد نساء عندهم تحطيم نفسي و هي تبي تساعدهم ،
يمكن تجي بنت وتقول إحنا مالنا شغل فيهم اقول لها صح لكن انا أشوف في بوادر بمجتمعاتنا للإنفلات عسى الله يحفظنا،
يمكن في بنات ما يقتنعون مثلا بتعاليم الدين او يتهاونون فيها فا نحط لهم هذي الأمثلة من ناس مروا بتجارب مريرة علشان نتحاشاها و بنفس الوقت نطيع الله في كل شي نسويه.
من دروس هالخبيرة سألت سؤال " منو في اعتقادكم من نماذج النساء في حياتنا الحالية نموذج المرأة اللي تمثل الأنوثة الحقيقية؟"
طبعا جوابي بيني و بين نفسي كان بعض الفنانات،
تقول لا يجي في بالكم "الفنانة كيم كرديشان" او الفنانة بريتني سبيرز او الفنانة الخ الخ الخ لأنهم منحطات !!!!!
انا صراحة بققت عيوني وأقول يعني معقولة هذيلا المشهورات عندهم والأضواء مسلطة عليهم يكون رأيها فيهم جذي؟!!!
اي رأيها جذي فيهم و هي في بلد منفتح و منفلت بعد و بصراحة صدمت ان الكلام يطلع منها
لان كلامها يوافق تعاليم دينا بالضبط لكن أهي تتكلم من ناحية علمية
1- اذا النقطة الاولى
حسب شرحها عن الأنوثة الحقيقية لا تتمثل في التعري و استعراض المفاتن،
ضروري انك تكونين محترمة في لبسج و كل ما كان لبسج ساتر لمفاتنج كل ما كان احترامج لنفسج و لجسمج اكثر
و كل ما كان الرجل ينجذب لج اكثر و يحترمج اكثر حتى الرجل المتصيد اللعوب لو كره فيج التستر الا انه في اعماقة يحترمج
طبعا في بنات يحبون يستعرضون مفاتنهم ظنا منها انها بهالطريقة راح تجذب الرجال لها
و يتقدمون للزواج منها لكن اللي يصير هو العكس تماماً
خلونا نشوف ماذا تعنى المرأة المتعرية في قاموس الرجل:
المرأة هذي في نظر الرجل مرأة احترامها قليل لنفسها لانها ما احترمت بدنها و عرضته حق اللي يسوى واللي ما يسوى،
في هذي الحالة منو اللي راح يلاحق هذي البنت المتعرية؟
شي اكيد اللي بيلحقها هو رجل متصيد و يلعب يبي يقضي حاجته
و يمشي لانه يشوف ان هذا هو مستواها اما الرجل المحترم راح يبحث عن بنت تحترم ذاتها
و هالشي يكون ظاهر في لبسها الساتر وأسلوبها و طريقة كلامها المحترمة
2- المرأة واختيار ألفاظها وأسلوبها
الأنوثة الحقيقية تكون في الابتعاد عن الألفاظ السلبية و السب و الشتم و الألفاظ النابيه
وهالشي اتبعوه في حياتكم لانه مهم جداً
أعطيكم مثال علشان توصل لكم المعلومة
مثال
لنسمي البنت الأنثى حرف "أ" و البنت الدفشة حرف "ب"
مثلا دخلت بنت لبسها مو مرتب و مكياجها معفوس على جمعة بنات و قالت عطوني رأيكم في كشختي
البنت "أ" راح تقول اهلا و سهلا فيج يـــا فلانه لكن لو مختاره بلوزة لونها بيج او زهري
بيكون لونها حلو ولو مختارة حمرة لونها زهري هادي بتطلع عليج تهبل
البنت "ب" راح تقول وعععععععع* اشهالمكياج الزفت* صايرة غول* وبعدين شنو هاللبس الخايس* الخ الخ الخ
لاحظوا حطيت رمز النجمة على كل كلمة سلبية واللي المفروض البنت تحاول تشيلها من قاموسها
3- الثقة بالنفس مهمه جداً جداً ،
طبعا الثقة بالنفس تترجم بتصرفاتج و لغة الجسد مو بس من كلامج لان لغة الجسد تمثل 95٪ من لغة التواصل
4- مرأة تحب نفسها نظرتها إيجابية في كل شي تشوفه
و تحس ان الناس تحبها و تشوف نفسها انها مرأة تستحق التقدير تستحق احسن شي في الحياة
و مرأة قادرة و تشوف انها مرأة محظوظة ، هالشي حتى لو ما تقوله و تصرح فيه راح ينبعث منها
كانها شحنات للناس اللي حولها و راح يشعرون في هذا الشي ،
اما المرأة النكدية واللي تشوف نفسها بنظرة دونية لنفسها و مهزوزة هذي راح الكل يبتعد عنها بما فيهم الرجل
بنات كتبت هذي الجزئية باختصار و كنت حابه أني أدعمها بالصور علشان ما تنشال الصورة عن اذهانكم
لكن قلت اكتب لكم مع الشرح و التوضيح احسن و قلت احط لكم بعض النصايح الجمالية..
و حطوا في بالكم اني ما اقدر اغيركم لكن التغيير كله بيكون في ايدج انتي بعد الله..
و كل اللي اقدر عليه اني احط نصايح من خلال خبرتي
وقراءتي وانتي بدورج تتقبلينها او ترفضينها حسب قناعتج.
شغله ثانية حابه انوه عنها و هو اني انا مو استشارية في العلاقة الزوجية او الأسرية
لكن عندي معلومات متواضعة فيها وانا متأكده ان شا الله انها راح تفيدكم
فا ما احب ابخل عليكم فيها و خصوصا انا اشوف بعض المشاكل اهني بالقسم يكون سبب المشكلة الرئيسي
هو شخصية المرأة واحيانا انصح صاحبة المشكلة لكن مادري اذا اهي مستوعبة نصيحتي او لا
و طبعا نصيحتي تكون على حسب شرح صاحبة المشكلة لمشكلتها,
وبعد و الشي اللي ماراح اعرفه راح اجاوبج بكل صدق اني ما اعرفه ولا راح اتفلسف عليج
موضوعي يا بنات اتكلم فيه عن الأنوثة و ليس الاغراء
اللي يكون بين الزوجة و زوجها, الانوثة الحقيقية اللي لازم كل بنت او زوجة تحاول انها ترجع لها.. ليش قلت ترجع لها ؟!!
الجواب لآن الانوثة هي فطرتنا موجودة فينا من يوم ولادتنا لكن ممكن يكون اسلوب التربية او المواقف غيرتها.
اذا الأنوثة هي ان تكونين انتي في فطرتج اللي ربنا فطرنا عليها بدون تصنع,
يعني مو معناته لبسج للفستان ولانج حطيتي مكياج و كلامج تصنع دلع و مياعة صرتي تمثلين الانوثة!!
هذا بالضبط يوافق الكلام اللي قالتة الخبيرة الاسترالية في الأنوثة "ملينا دين"
الأنوثة هي اللي تجذب الرجل للمراة.. ما اقصد فيه المغازل و
قلة الادب والنظرة الشهوانية ..اللي اقصدة لما تكون المرأة انثي ينجذب لها الرجل باحترام و تكبر بعينة
و ليش احب اركز على شخصية المرأة الانثي لانج اذا تجردتي منها اهني راح تبدأ بعض المشاكل مع زوجج
و حتى مع اخوانج او في مجتمعج
و رسمت هذا التوضيح علشان توضح عندكم الصورة و تستوعبون بطريقة اسهل
بديت بموضوعي عن الصفات و الآخلاق الأنثوية الحقيقية
في بداية الموضوع و الحين بوضح بصورة احسن و قلت احط صور بنات صغار تقيدا بتعاليم المنتدى
لانه تعابير الوجه احسها مهمه علشان تفهمون مقصدي
قلت انا اهم شي في الأنوثة هي الثقة بالنفس
1- الثقة بالنفس:
وما تتمثل بس بالكلام لكن تمثل 95% من لغة الجسد و بحط لكم صورتين علشان تحسون بأهمية هذا الشي
هذي صورة بنوتة واثقة من نفسها
وهذي البنوتة مهزوزة و ما عندها ثقة بنفسها
اما البنت المهزوزة شوفوا لغتها الجسدية واضحة جدا انها
غير واثقة و نظرتها تتكلم ووقفتها و تحسين انها غير مستقرة و بنفس الوقت ما تحسين في الانجذاب لها
ع انها بنوته و طفله تهبل والأطفال بكل حالاتهم يجذبون هههههههههه. لكن اللي اقصدة لو انها مرأة كبيرة و بالغة و غير واثقة من نفسها تحسين ما ودج تتقربين منها