تغيرت نفسيتي ونيتي بسببه

السلام عليكم

كل عام وأنتم بخير


مشكلتي لها شهرين لما صحى زوجي الصبح وراح لمجلس الحريم ولقى فيه غبار على الديكور مع إني أمسح لكن تغبر الغرفة لأني أفتح الدريشة
أنا كنت منسدحة على السرير جاء قالي عن الغبار قلت إن شاء الله بمسحه وفجأه زعل وقام يقول أنتي الظاهر بتحديني على شيء ما ابيه . تفاجأت أنا من كلامه قلت له روق يابن الحلال المفروض ما تقول لي كلام مثل هذا على شيء تافه . وسألته قلت أنت ماتحبني ؟ وزاد أمره . وقمت رحت أسوي فطور . وطول ما هو يفطر جالس يتحلطم من ضمن كلامه يقول : انه تورط فيني والله يعوضه
وأنا والله العظيم إني ما نطقت ولا كلمة وحابسة نفسي عشان ما أبكي قدامه
وأنا كنت طالبته قبل الهوشة يوديني للسوق ووداني السوق وهو زعلان ندمت بعدها اني رحت السوق وهو زعلان لأنه سمعني كلام بالسيارة يسم البدن . لدرجة إني بكيت وهو ما يدري نقابي صار مويا من دموعي . كان يقول لي واحنا بالسيارة كلام انصدمت منه ومازال تأثيره فيني للحين يمكن هو نسى الكلام اللي قاله لي بس أنا ما نسيت للحين
كان يقول لو أتركك (يقصد أطلقك ) أعرف وش أقول . وأنتي وسخة بالوراثة ( جرحتني حيل هالكلمة ولحد اللحين ما سألته وش يقصد بهذي الكلمة ) . وانتي تسأليني أنا أحبك وإلا لا . أنا ما أحبك وأنا ما أدنق راسي لأحد ولا تحسبين إني بصبر عليك ( اتوقع إنه يقصد إني أطلقك وأشوف غيرك ).وكلام كثييييييييير . أنا انصدمت فيه كل هذا يطلع من الساكت

والله إني أبكي وأنا بالسوق . عاد بعد كلامه ارتاح إنه قال هالكلام الوقح لي . وصار ما كأنه قايل شيء

أنا مابي أدخل معه بهواشات لأن والله ما عليه من شيء يطلق ولا عليه من أحد على قولته يعرف وش يقول
ومرة ركبت السيارة وأثاري العباية عليها بقايا أكل ما انتبهت له ومهي كثيرة . وكنت رايحة لأهلي يعني مني رايحة لناس أغراب قال أنتي تفشلين . استغربت من كلامه وزعلت صراحة قلت ما لك حق تقول مثل هالكلام الفشلة تصير لو أخلاقي زفت وإلا هذا شيء عادي أنا رايحة لأهلي مو لأغراب

من تزوجته للحين ما عمره قال يا حياتي أو كلام حلو قلت له مره ليه ماتقول يا حياتي أو قلبي يقول ماعرف للكلام هذا . هو يعرف يتكلم كلام حلو بس ما وده يقوله لي عشاني ما استاهل

أنا أول كنت أقوله أحبك وعمري لكن بعد الكلام اللي قاله لي صرت ما أقولهن ولا أسأله أنت تحبني أو لا . صرت أخاف منه
والله العظيم إني كنت على نياتي . اللحين ضحكي وكلامي صار مجاملة . صرت كل ما أضحك معه أتذكر كلامه .
وودي أنتقم منه بعد هو وده يطفشني عشان يشوف غيري
وسخة بالوراثة ماني قادرة أفوتها له . لأنه لو يقصد أهلي راح يدفع الثمن غالي
أنا صح أسكت بس إذا انفجرت خلاص امحي كل شيء
ساكتة اللحين عشان أمي وأبوي مابيهم يعيشون بهم يكفيهم هم المرض الله يشفيهم مابي أزيد مواجعهم هم اللي قاصين ظهري

بالسوق إذا جيت بشتري شيء يقول لي تلقينه بالسوق الفلاني بأرخص من هالقيمة . جيت بشتري ساعة باربع مية قال تلقينها بالبطحاء أرخص من هالقيمة
دائم كل ما جيت بشتري شيء يقول تلقينه أرخص من هالقيمة
صرت إذا بشتري أتنح ماعرف آخذها وإلا لا
وراتبه زين على فكرة يقدر يدفع بس حاسته مو مشتهي
دعواتكم إن الله يعينني ويرزقني