تغيروا فجئه

اهل زوجي تغيروا علي فجئه مدري ليش مثلا اذا جيت واجيب معي شي كيك قهوه زي كذا تجلس معي وحده من البنات والثانيه تطلع وعمتي تسلم وتروح غرفتها تتأخر مره انا ماحب اطول يعني لما جت قلت بالآذن يالله بمشي قالت الله يستر عليك
وبزياره ثانيه رحت لهم كأنهم مطنشيني الخوات يتكلمون مع بعض ووحده من رمضان ماقابلتها يعني اذا جيت تكون ماهي موجوده وهالسنه حجت ارسلت لها اذا بتجين عند اهلك بجي اسلم عليك المهم كانو يوم الجمعه مسوين لها غدا وراح زوجي والاولاد قالي تعالي قلت لا محد ناداني بعدين هذا غدا عائلي المهم قال اختي ام جود هناك اللي انا ارسلت لها ماقلت شي قلت اذا تبيني بترسل لي بعدين ارسلت لي بعد العصر ترا انا جيت عند اهلي اذا يمديك تعالي قلت ان شاءالله المهم واروح لهم كذا يعني الخوات يسولفون مع بعض ونا مطنشيني بعدين قالت ام جود والله الدوام تاعبني ومعطيني حصص كثيره قلت لها الله ييسر لك بعدين قالت والله استاذه خلود قالت الحمدلله ارتحنا من وحامك هالسنه قالت لها لا تعديت مرحله الوحام انا قلت لها ماشاءالله انتي حامل قالت ايوا لي في الشهر الخامس قاموا خواتها يطالعون في بعض قلت ماشاءالله الله يقومك بالسلامه طبعاً كانو جالسين معي البنات بس امهم كانت تحت في الحوش نادوها بس ماجت يوم جت بنزل من الدرج قالت انتي هنا قلت ايه بس بمشي قالت بنت حماتي انا مو قلت لك انها موجوده سكتت عمتي ويوم جيت بطلع قلت يالله فمان الله سوت نفسها تكلم بالجوال سمعتها كانها تتكلم قلت تتكلمين علي قالت لا روحي وسوت بيدها يعني روحي صراحه زعلت حسيتهم مايبوني كذا من غير سبب .. جلست اذكر مافي سبب زعلتهم فيه مره اقول يمكن عشان خبيت عنهم خطوبه اخوي انا صح خبيتها عنهم قلت ان شاءالله اذا تم بعلمهم بعدين علمتهم وبرضوا هم خطبوا لأخوهم اول شي اختي بعدين سابوها وراحوا خطبوا ثانيه بس ماتمت ومرات اقول يمكن عشان سافرت وزوجي عطاهم مفتاح البيت ونا صراحه ماكنت راضيه بس كنت مقفله كل الغرف بس خليت الصاله عشانها مفتوحه شقتنا لها بابين مفتاح الباب الثاني الاحتياط معاهم الحين مفتاحي ضايع ماودي اقولهم احسهم بيزعلون زياده بالذات عمتي..ومره قالت لي هالسنه بتدرسين قلت ايه ان شاء الله قالت وش منازل ولا انتظام قلت نفسي انتظام بس بدوام منازل قالت وولدك ترا احنا مابنمسك لك الحضانه خلاص قفلناها للعلم كانوا فاتحين حضانه وادفع لهم فلوس يعني مو بلاش قلت لها خلاص عادي مو مشكله بدور له حضانه ثانيه بس والله حبيت اخذ رايكم هل يحق لي ازعل ع هالتصرفات ؟؟وعادي اذا قلت لزوجي وش فيهم اهلك تغيروا ولا لا ؟