اخباركم عسولات
مبروووووووك لينا والحمدلله على السلامه
قلوبه شدي الهمه واخلصي شايله همك
رموله اذا عالاكتئاب حدث ولا حرج تخيلي مزاعله زوجي ولا اكلمه من اكثر من شهر المشكله ما اذكر انه زعلني في شي :(
بنات واحد من عيالي سره منتفخ كنه بالون قريت عنه انه فتاق
والثاني طلع له زي الورم اسفل البطن جهة اليسار يطلع ويرجع يختفي وقريت عنه انه فتاق اربي ويحتاج عمليه لطفك يارب:44:
واليوم بوديهم اطعمهم الشهرين واشوف وش تقول الدكتورة ما ادري اشيل هم ايش ولا ايش
الله يعين

ام لمار

بديت بالعصير تقريبا اول الشهر السادس

نونو مون
لا الشوربات والفواكه اللي بالخلاط بالرضاعه اللي فيها ملعقه اخذتها من سنتربوينت واحيانا احط فيها السيريلاك
والزبادي والسيريلاك والبسكويت والمهلبيه بالصحن والملعقه اشتريتها من سنتر بوينت


بنت المملكه
زين سالتيني..وبرجع اكتب هالملاحظه بجدول الاكل
بالنسبه للشهر السادس كنت اعطيهم الحليب اكثر والوجبات فقط وجبه وحده باليوم لانهم مابعد تقبلوا الاكل
اما وجبة خضار او فواكه وماخليها تشبعهم يعني لاخلصت يصيحون لاني خفت يكرهون الحليب
على اول السابع صاروا وجبتين واخره 3 وجبات

الان جدولي هذا طبقته لهم لما دخلوا الشهر الثامن صرت اعطيهم اربع وجبات...
والحليب حاليا يشربون تقريبا 5 رضعات باليوم والدكتوره قالت على وزن عبودي وجمانه يكفيهم خمس رضعات او 6
اما جوانا عشان وزنها اقل فتاخذ اكثر رضعات الحليب واحرص اني اقلل لها كميه الاكل

ولاحظي انا ماشااءلله عندي ثلاثه يعني ماقدر كل يوم اعطيهم الاربع وجبات تمر ايام تعب وطفش وشغل اكتفي بوجبتين والباقي حليب
بس المفروض الان اعطيهم الاربع حسب كلام الدكتوره

وبالنسبه لاوزانهم الزياده الطبيعيه انا والله مو حريصه انهم يسمنون اهم شيء الصحه والعافيه..واضمن انهم ياكلون الاكل الصحي اللي ينفعهم ويغذيهم

لاني متعقده من ولد اخت زوجي...عمره 3 سنين وعايش على الحليب وعصير البرتقال لانه يوم كان صغير مايعرف غيرهم وتعود وصار عنده فقد شهيه الان وماياكل

وانتي لسى هالاسبوع عطيهم العصيرات يكفي مره باليوم عصير لمده اسبوع كل يوم عصير شكل
والاسبوع الثاني عطيهم الفواكه و مسحوق الرز
والثالث عطيهم الخضار وهكذا

عموما مدري دكتورك وش وجهة نظره
لكن اللي اعرفه انه من بعد الشهر السادس الحليب لايوفر للطفل كل احتياجاته من العناصر الغذائيه خصوصا الطبيعي
الصناعي على الاقل يكون مدعم باغلب العناصر والفيتامينات

بنات
انا لي اسبوعين نفسيتي مرره تعبانه وجيت عند اهلي ابغى اغير جو بس ماتغير شيء كل يوم اصيح بسبب وبدون سبب

صح فرحانه بعيالي بس مفتقده نفسي و زوجي وحياتي الخاصه وحريتي ببيتي

من حملت وانا بين المستشفى وبيت اهلي وبعد الولاده جلست شهرين بعدين رحت بيتي شهر بعدين رجعت لاهلي اسبوعين
وعلى هالسيره بين كل فتره وفتره اجي لاهلي اريح شوي

اذا جلست ببيتي انام بالغرفه مع عيالي مستحيل اخليهم لحالهم والصبح عندهم الخدامه واحيانا اجيب خدامه خالتي هي ساكنه تحت عشان تساعدنا وانا انام بغرفتي بس زوجي يصير راح الدوام
واغلب وقتنا انا بعالم وهو بعالم اخر احسه يكره البيت عشان الشغالات وصياح عيالي و24 ساعه هيصه وحوسه بهالبيت

لاتقولين خليه يتعود هذولا 3 بسم الله عليهم مو واحد اقول بكيفه ...وهو دوامه من الصبح الى العصر ومتعب جدا هذا غير مشاوير المستوصفات واغراضهم اللي ماتخلص وهات وجب ولاتنسى..وهو وحيد امه والمسؤل عن اهله يعني ماقدر اظغط عليه اكثر

بس انا نفسيا خلاااااااااااااااص ..وكل مرحله اكتشف انها اصعب من اللي قبل

شوي اقول ليش ماقترح عليه اسافر 4 او 5 ايام واخليهم عند امي وخالتي من حقي ارتاح شوي عقب هالتعب كله
وشوي اقول لا هذي انانيه اروح ارتاح واخلي عيالي واشقي فيهم غيري بعد

مدري تعبت وبس


وش اسوي

بنات اذا جو يطهرون عيالكم اشترطو يحطون عليهم بنج موضعي ترى حرام يحسون بالالم والدكاتره ولاهمهم تخيلويقطعون منكم شي بدون بنج

بنات اشوف بقسم اعروض التجاريه يمدحون قهوه دعوه شخصيه حقت انفاس يقولون توخر البطن احد منكم جربها..؟؟

كل الغلا اذا في احد راضي يمسك عيالك فمن حقك انتي وزوجك بهالسفره اصلا بترجعين بنفسسيه حلوه وبتنعكس على عيالك