!!! تـنبـيـــــــه !!!

السلام عليكم ورحمة الله وبركاته

لاحظت حركة منتشرة لعضوات في المنتدى وحبيت أحذركم منهم

تجيك مثلاً وحده وتمدح في كريم يفتح ويبيض لو تحطينه على تكرونيه قلبت برصاء !!!
ولا الثانية ... تبين كريم يكبر ... ويصغر .... ويسمن .... وينحف ... طبعا ً عالخاص !!!!
وإذا سألتيها عن اسم الكريم قالت وحده تسوي هالخلطه تبون رقمها عالخاص !!!

وللأسف بعض الأخوات وبدافع البحث عن الجمال وحب التجمل على طول تشتري هالكريمات
وتستخدمهابغض النظر عن مكوناتها وعن مصدرها ...
تلقين اللي مسويتها ما معها حتى شهادة الإبتدائي !!

يا أخوات لازم نتأكد من المصدر ونعرف مكونات الخلطات قبل لا نستخدمها وتطلع نتائج عكسية
يروح عمرك وأنتي تعالجين منها .

اذكر لكم واحد عطار يعالج مرض السكر عن طريق أعشاب ...
بأسعار جداً مرتفعة وبعض مرضى السكر قالوا والله استفدنا من خلطاته وخفض علينا السكر ...
ولما حللوا خلطاته طلع يطحن حبوب السكر اللي ما يتجاوز سعرها 50 ريال ويبيعها على هالضعوف بأسعار خياليه !!

شفتوا وشلون يلعبون على الناس بلا حسيب ولا رقيب ...
ولو تضرر أحد من الناس وراحوا يشتكون وزارة الصحة .. ما عندكم أحد
بيقولون والله القانون لا يحمي المغفلين !!

يا كثر اللي راحو بسبب هالخلطات ..
واللي سببت لهم فشل كلوي واللي تليف بالكبد و و و .........

نجي للنقطة الثانية واللي هي أقل ضرراً من الأولى ..

لما تسأل وحدة عن محل ولا مشغل ولا كوافيرة ..
تجيك وحده وهاتك مدح مهوب صاحي ولا يفوتك وبيروح نص عمرك و ووو

ولما تفتحين ملفها الشخصي تلقينها مسويه له دعايات في كل موضوع لغرض شخصي !!!

وترى هالحركة منتشرة وبقوووة ولاحظتها لأكثر من عضوة
ولو تبون معرفاتهم كتبتها بس أخاف يحذفون موضوعي !!!
ولا تدرون خلوه عالخاص مثل حركاتهم .... :07:
خلكم ذهينين مع كل وحده تتعاملون معها ... ولا تخذون رأي وحده وتطيرون في العجه !!!
تريثوا >>> ترى متعوب عليها هالكلمة
وما فيه مانع تاخذين لك لفه على ملفها الشخصي ..
وتسوين يو تيرن وتطلعين .... أجل وشوله حاطين هالخدمه ...
استفيدوا منها بدال ما تراقبون لكم فلانه ولاعلانه ... !!!

نجي للنقطة الأخيرة ..
وهي التعامل مع بعض التاجرات في المنتدى ..
أنا ما أقول كلهم ..لا ...
كثير من التاجرات معروف عنهم الأمانه وبشهادة البنات اللي تعاملوا معهم ...
وسبق وحصل لبعض الأخوات حركات النصب من تاجرات مجهولات وحبيت احذركم منهم !!
وبما اني ما تعاملت مع أي تاجرة ياليت الأخوات يفيدونا بتجاربهم عشان ناخذ حذرنا منهم .
وانتبهوا للأسعار كل وحده لها سعر والمنتج واحد !!

هذا اللي عندي واللي عندها إضافه ما فيه مانع تذكرها للاستفاده :26: