سبق ونزلت لكم موضوع عن روحتي قبل رمضان لعائله(ام وبناتها ايتام ) محتاجه في قريه وشفنا العجب بوضعهم ياااااارب لك الحمد على النعم اللي احنا فيها وكتبت موضوع ابي الكل يعرف قدر النعم اللي احنا فيها مهماااااا مرينا بضاقات ماليه .. هذا رابط الموضوع
http://forum.hawaaworld.com/showthread.php?t=3717000
للمعلووووووميه ماكتبت هالموضوع للمباهاه او الرياء او اي سبب ثاني لاوالله ربي يعلم بنيتي وودي احمسكم بعد ماتقرون الموضوع تدورون على عوايل محتاجه وتكونون مصدر رزق لهم بعد الله وتشوفون اوضاعهم بعيونكم وتلمسون فرحتهم والله والله فررررررحه وراحه تحسون فيها ماتتخيلونها بعد ماتفرحون احد محتاج ,,,,المهم عزمت انا ووجي نروح لهم مره ثانيه وهذا انا مثل ماوعدتكم بتنزيل موضوع سفرتي لهم بالتفصيل الممل و بالصورالحمدلله ربي يسر اجازة زوجي بدري ويعلم ربي انه ماتقصد ياخذ اجازته هذي الا عشانهم ولوجه الله تعالي وهذا اللي يسرها له والا دوامه معقد .المهم من بداية رمضان وانا احاول من اللي حواليني حمواتي وجيراني وصديقاتتي وامي اجمع لهم كل شي نظيف وبحاله ممتازه وماقصروو الله يسعدهم ويكتب لهم الاجر والله حتى الشرابات وصلتني لهم وكنت احس بفرحه وانا جالسه اكوي واطبق اللبس في الشنط وارتب الاغراض بالكراتين مع اني تعباااااانه من الحمل والصوم وشغل البيت ولاعندي شغاله بس والله كنت احس بنشاط وراحه وانا اسوي الشي لهم ياربي لك الحمد اللي سهلت لنا هالموضوع ..
المهم كل شي يخطر في بالكم وصلني لهم لبس بطانيات ربطات شعر جزم الله يكرمكم شنط اكسسوارات مكياج جاكيتات شتويه مبالغ ماليه ادوات كهربائيه اموال كللللللل شي يارب لك الحمد المهم راح زوجي وشحن الاغراض وشي معنا بالطياره وصلنا جيزان وريحنا وبعدين استلمنا الاغراض واشترينا بعض الادوات الكهربائيه لهم من هناك ورحنا لقريتهم والله والله يابنات زوجي وعامل البقاله ينزلون الاغراض واقسم بجلال الله االام عيونها دموووووووع من الفرحه وبس رافعه يدينها وتدعي بشكل يقشعر جسمك منه فعلا تحسين الدعوات من قلب وكنت حاطه المبالغ اللي جتني من حمولتي وامي ووحده من الاخوات هنا بالمنتدى ارسلت معي مبلغ لهم وحطيت المبالغ في ظروف على اساس كل ظرف باسم اللي مرسله الاول لان المبالغ تختلف فحبيت كل شخص له دعوات كل مافتحو ظرف لان اكيد فرحتهم بالمال الكبيره بتكون اكبر ..
ماشاءالله كانت الاشياء كثيره على صغر بيتهم ولما طلع زوجي والعامل والله يابنات ماتتخيلون شكثر فرحت البنات وهم يفتشون في الاغراض ويقيسون في الاكسسوارات والجزم ويورون بعض لاشعوريا نزلت دموعي ماقدرت اتحكم فيها والله قلبي يعصررررني من الالم عليهم وحمدت ربي على النعم اللي احنا فيه وامهم بنت حلااااااااااال اجوديه وهاديه وباين انها تخاف الله وراعية دين حتى في دعواتها تقول احنا بخير وجانا خير زياده وهم والله مايلاقون اللقمه بس سبحان الله القناعه ماليه قلبها ..المهم عطتني 456 ريال قلت ليش ياخاله قالت انا استحيت من زوجك ولافيني شدة اوصل البقاله بعيد علي بس ياليت تعطونها صاحب البقاله له 8 شهور يطلبني ولاعندي اعطيه ويوم ربي فرج علي بعطيه حقه لايدعي علينا وقلت لها اننا ان شاءالله بنحاول ندل الجمعيه الخيريه عليهم بنروح لجيزان ونشوف المطلوب ونرجع لهم مره ثانيه معنا احد من الجمعيه عشان يشوفون وضعهم وطلبت مني اذا رجعنا لهم اجيب لها ماكينة خياطه تبي تستفيد منها وتخيط للي بقريتهم وتصرف على بناتها برزق حلال والحمدلله راح زوجي للجمعيه وكلمهم عن وضع العايله لكن للاااااااااااسف والله الناس ماتخاف الله الام ماعندها اوراق ثبوتيه كلها مع الظالم عمهم ومستحيل يعطيهم اياها لانهم هو مستفيد منها ورفضو الجمعيه الخيريه انهم يسجلونهم لان ماعندهم اثباتات وعذرهم انه يمكن مايكونون سعوديين ؟؟؟؟؟؟؟؟؟؟؟؟؟ حسبي الله عليهم وغلطتنا عطيناهم الاغراض قبل يجون الجمعيه لانهم شافو الاغراض ويقول ماااااااشاءالله كل هذا عندهم حالتهم زينه غيرهم محتاج اكثر مايلاقي مويه قال زوجي هذي الاغراض احنا جبناها من اهل الخير في الرياض والا قبل نجيهم ماعندهم شي والله العالم لو مانجيهم مره ثانيه يمكن مايلاقون اي شي ياكلونه بس واللله قلوبهم حجررالمهم الحمدلله اننا وفرنا لهم اللي نقدر عليه ولا راح نخليهم ان شاءالله كل فتره بنروح لهم وكلم زوجي اصحابه شغالين بجمعيات خيريه وشرح لهم الوضع وتطوعو ثنين منهم يروحون مع زوجي يكلمون اللي هناك وبيحاولون يطلعون للام صك اعاله وانها مالها اي دخل مادي ولاعندها رجال وبيضيفون بناتها لاسمها تصير تستلم هي بنفسها بدون تدخل العم بس ياااااااارب يسهل هالامر لانه شوي صعب لان الام يمنيه ومو بالساهل يمشون الموضوع بس بيحاولون والله يقويهم ويعطيهم على قد نياتهم .. وبكل الحالتين الحمدلله زوجي اخذ عهد بينه وبين ربه مايتخلا عنهم ويجيهم من فتره لفتره ويدل اهل الخير عليهم الين تتحسن ظروفهم او يتزوجون بناتها وينسترون والله يكتب لنا ولكل اللي ساعدهم التوفيق والستر وتيسير الامور ويشفي وليدي من اللي فيه يااااارب وويسر ولادتي ..
للاسف ماعرفت انزل الصور من جوالي ان شاءالله بخلي صديقتي تضبطها وانزلها لكم تشوفون الوضع بعيونكم ..
والحمدلله واالله اني فرررررررر حت بمسجات من بعض الاخوات يشكروني على الموضوع ويقولون انه شجعهم يدورون على عوايل محتاجه عندهم بنفس مدينتهم وتواصلو معهم شخصيا وعطوهم المقسوم و الله يكتب لي ولهم الاجر يارب ..
وارجوووووووكم يابنات اللي يحمسها الموضوع ويقوي عزيمتها وتدور احد محتاج لاتنساني من دعواتها والله احتاج دعواتكم
بشفاء ولدي وتيسير ولادتي ويكون حملي هذا ذكر كامل الخلق والخلقه لانه اخر حمل لي وعندي5 بنات وولد مريض :44: الله يبلغني بعافيته ويحفظ لي عايلتي من كل شر ويسعدنا بتحقيق امانينا ...
ماتت فرحتي @matt_frhty
عضوة فعالة
يلزم عليك تسجيل الدخول أولًا لكتابة تعليق.
غدو محمد
•
الله يسعدك دنيا واخرة ويجزاك خير ويسهل ولادتك ويشفي ولدك ويشفي جميع مرضى المسلمين...
الصفحة الأخيرة