السلام عليكم..
أخباركم كروشات .. الله يسهل عليكم وتجيبون أحلى نواني وفأتم الصحة والعافية
أنا سبقتكم وولدت من شهر تقريباً .. وكانت ولادتي قيصرية فالمدينة الطبية بالرياض
ولدت فنهاية الأسبوع ال38 لأني عانيت فهالحمل مع سكر الحمل وكانو ينوموني وأطلع على مسؤوليتي وأحاول أضبط السكر فالبيت وما يتضبط .. وما صدقت انهيت الأسبوع ال 38 عشان يولدوني الدايت كان صعب مره وانا ما اعرف أجلس جيعانه :icon33:
المهم يا حلوات ولادتي كانت مجانية لأني متابعة عندهم من بداية الحمل مع الاستشاري د خطاب.. ويوم العملية الصباح جابولي لبس العملية الأخضر اللي يخوف وأخذت شاور ولبسته وجو يركبون الإبرة اللي فالوريد عشان المغذي والبنج بعدين .. ممرضاتهم الفلبينيات روعه لكن الهنديات والماليزيات مالهم داعي بس يتبسمون طيبات لكن ما يتقنون عملهم وحده ماليزية رفعت ضغطي حاولت تركب الإبرة فثلاث أماكن فيدي وما عرفت ولما حلفت ما تجرب مره رابعة جابت وحده فلبينية وصلحتها وجلست تهاوشها..
على الساعة 7 نزلوني العمليات وغطوني بس بالشرشف الأبيض وما رضيو آ’خذ طرحتي عشان غرفة العمليات معقمة وممنوع فيها .. القهر لما دخلنا العمليات كان فيه كثير رجال أطباء وممرضين وكل ما اغطي وجهي يجي أحد يكلمني أو يسألني واضطر أكشف .. واللي كملها جابولي استشاري التخدير السعودي اللي جلس مقابلني وجلس ساعه يشرحلي كيف البنج النصفي والكامل ويحاول يقنعني بالنصفي لأني طالبة بنج كامل عندي آلام فظهري وما كان عندي استعداد آخذ ابره فظهري.. خلص كلامه وشوي الا جايبلي واحد هندي المساعد حقه وقالي ترى هو اللي بيخدرك وقت العملية ورجع الهندي يعيد نفس الشرح :mad:
ودوني مكان العملية وبدأ الجد وبديت اتشهد وأحس بالخوف خاصة يوم بداو يربطون يديني ورجولي .. والوضع مازال كما هو رجال معبين الغرفة والممرضات مكشفيني ويجهزوني للعملية .. وضع محرج وخوف وما فيه أي احترام لخصوصية المريض .. انا جربت الجامعي قبل ما فيه هالفوضى ..
ورفضت يركبون القصدرة حقت البول الله يكرمكم إلا بعد البنج .. قلت يسوون اللي يبون إذا تخدرت هي خاربة خاربه
وتشهدت وعطوني البنج .. الله يرحم ضعفنا فعلا الانسان ضعيف
صحيت فقسم الإفاقة فالعمليات وبجنبي ممرضة افريقية حنونه مررره يوم بديت أحس الألم على طول جابتلي ابره ولما شافت أموري تمام طلعوني التنويم.. ألم العملية لا تسألون عنه لا يطااااااااااااق الله لا يضيع أجرنا ..
كان فالعمليات الإستشاري خطاب ودكتورة رجاء وهي اللي سوت العملية .. وجاتني بعديومين وشرحتلي كيف كانت العملية ..
فالتنويم كنت طالبة غرفة خاصة ب 650 ريال فاليوم >> يابلاش غرفهم حلوة ونظيفة ونفس غرف المستشفيات الخاصة
زوجي كان عند باب العمليات وطلع معاية للغرفة وكان مصور ولدي >> نسيت أقولكم اني جبت ولد
نظام المدينة الطبية لازم رضاعة طبيعية وحتى لو والدة قيصري يجيبون النونو عندك ويساعدونك ترضعينه .. وما يودونه الحضانه إلا فالضرورة أو إذا سرتي تعبانه مره
ممرضات التنويم عسسسسسسسل وخدومات مره بس وحده حقدت عليها ..
أصرت علي أروح الحمام الله يكرمكم وأنا لسه فيني دوخه من البنج وأقولها دايخة تقول بأساعدك وفالأخير أغمى علي فالحمام ولما صحيت لقيت كل ممرضات القسم عندي فالحمام ولبسي كله دم وكانو مرتبكين وانا قمت اصيح اش هذا الدم وأبكي .. أتاريني طحت والدم من ابرة المغذيه انفكت مع الطيحه .. بعد يومين لقيت يدي مزرقه من فوق اتاريني طحت عليها وما دريت إلا بعد كم يوم من المهدئات اللي كنت آخذها وبنات اللذين يقولون ما طحتي الممرضة مسكتك وجلستك ..يدي للحين تعورني زين اللي ما انكسرت
فكرت اشتكيهم بس حرام الممرضة اللي طيحتني كانت اطيب وحده فيهم وزاد اهتمامها فيني بعد الطيحة شكلها حاسة بالذنب ..
بعد 3 أيام بالضبط قالولي خروج .. استغربت فالجامعي القيصري تجلس اسبوع !!
فرحت مررره وطيران على بيتي :) ..
لاحظت فالمستشفى ما يعترفون بتطهير البيبي .. يعني اطلعي ودبري عمرك..
غير كذا بعد أول موعد بعد الولادة يسكرون ملفك ..
البيبي ما يتابعونه فعيادات الأطفال ويطعمونه عندهم.. لا... تسير تطعيماته فمركز صحي حكومي على قولتهم..
الغرف المشتركة يجمعون المرضى فغرفة وباقي الغرف فاضيه يعني تلقين غرفة فيها 4 حريم والغرفة اللي بجنبها فاضية !! احسها حركة من الممرضات عشان ما يدورون على الغرف ويتعبون ..
وجباتهم ياربي لك الحمد والشكر الله يعز النعمه ..أسوأ مستشفى من ناحية الأكل ..
هذي تجربتي معاهم ان شاء الله تستفيدون منها أنا نزلتها لأني تعبت أدور معلومات عنهم قبل ولادتي وما لقيت ،،،،،،
الله يسهل عليكم وييسر لكم ولادة طبيعية وأطفال كاملي الخلقة يا رب
أم يزيد ورهف @am_yzyd_orhf
محررة برونزية
يلزم عليك تسجيل الدخول أولًا لكتابة تعليق.
ام الحلوه ليلاس
•
الحمدالله على سلامتك والف مبروك
الصفحة الأخيرة