تقبر قلبي شو بتنحب يا أغلى رجال بحياتي

بسم الله الرحمن الرحيم


يا صبايا يا حلوين ..
صار لي فترة عم لاحظ بالمجتمع وبشكل كبير : كثرة شكوى الزوجات من أزواجهم وكثرة التفكير بالطلاق!!


بدي احكي شوي بحكم خبرتي البسيطة ..
لكل انسان في الحياة سلبيات وإيجابيات .. ربما تكثر السلبيات أو تكثر الإيجابيات
الزوجة العاقلة هي التي تركز نظرها إلى الإيجابيات وتبرزها وتمدح زوجها عليها ..


- مثلا .. زوجك كريم
شوفي هالنقطة عنده وخليها دائما ببالك ، وكل ما صدر منه موقف كرم قوليله يخليلي ياك ربي شو أنك كريم وحنون وبتهتم فيني
ربي يسعدك يا أحسن رجال بالعالم ..


- زوجك عزم أهلك واهتم فيهم
قوليله: يا روحي أنت والله كتير فرحت منك اليوم وحسيت أديش أنت بتحبني وبتهتم بأهلي وبيّضت لي وجهي أمام أهلي ربي يبيض وجهك دنيا آخرة وما يحرمني منك يا ألطف رجال ..


- زوجك عصبي لكن ما بيرفع يده عليك ولا عمره ضربك
قوليله: صحيح أنك عصبي بس بصراحة أنت مميز وبتمسك حالك عند الغضب ، صح بيرتفع صوتك شوي وبتعصب لشغلات بتكون أحيانا صغيرة
بس عنجد أنت ما شاء الله عليك بتضبط حالك وما بتتصرف أي تصرف غلط ، وهالضبط لأعصابك أكيد رح يأثر عليك يوم من الأيام وتصير أهدأ .. تقبر قلبي شو بتنحب يا أغلى رجال بحياتي ..



هي بعض الأمثلة ، باختصار امدحي زوجك دائما ، وخلّي نظرتك إيجابية
يعني لما تشوفي زوجك عصبي مو يكون نظرك سلبي أنو هو عصبي ، خليك إيجابية وقولي الحمد لله بعصب بس ما بيضرب


كوني إيجاااابية


انظري لكل الأمور بإيجابية
قولي بعقلك زوجي مو مدمن ، ما بيضرب ، ما بيسرق ، ما بيترك الصلاة
بشكل عام هو منيح
لذلك ابدئي انظري للإيجابيات تبعه وامدحيه عليها
يا جماعة والله المدح سحر ، المدح بخلّي الرجال يحس أنو زوجته انسانة عاقلة وبتقدّر أبسط الشغلات منه وبتشكره عليها
طبعا هالشي بخليه يزيد من الشغلات المنيحة ليسمع هالكلمات الحلوة منك


أختي لما انخطبت وقرب عرسها صار شوي خلافات بينها وبين زوجها مشان العرس ، وكانت متضايقة منه لأنو بكل شي بدو يسترخص مع أنو حتى القاعة رخييييصة كل أجارها ثلاث آلاف ونحن رضينا وما كلفنا عليه بشي
بس هو عقلاني وما بحب التبذير بشغلات مالها داعي
المهم هو قال لها عدد محدد للمعازيم ، وأقاربنا يا دوب عزمناهم وما بقي مجال تعزم صاحباتها
فقالت لخطيبها أنو أنا في عندي عشرة رفقات مشتهية اعزمهن ، قال لها مو مشكلة اعزميهن
وكمان كم شغلة طلبتها منه ووافق عليها
فقلت لأختي كوني إيجابية وامدحيه على اهتمامه بمشاعرك ، قوليله انبسطت منك باهتمامك بمشاعري مشان العرس وخليتني اعزم رفقاتي وعملت وعملت .... خليه يحس أنك بتقدّري أبسط موقف منه وبتعتبريه اهتمام منه فيك ، بالتالي رح يصير يحب أنو يفرحك لأنو أنت انسانة تستحقي وبتقدري الشي البسيط .


كمان الاهتمام .. اهتمي بزوجك وبالشغلات اللي بحبها زوجك
مثلا هو بحب نوع من الحلا ، اعمليه ، ولما يجي عالبيت حطيله الحلا وقوليله عملته مخصوص كرمالك يا حبيب قلبي لأنك بتستاهل كل شي حلو يا أحلا الحلوين
مثلا قبل ما تنامي اكويله لبسه وحطيه وحطي معه جرابات وعطري اللبس ، ولما يقوم ليروح عالشغل بلاقي هاللمسات منك بيفرح كتير


الشي المهم كمان .. لا ترسمي بعقلك شيء معيّن عن الحب أو الاهتمام وبالتالي لما ما تلاقيه تعتبريه أنو ما بحبك ومو مهتم فيك
مثلا في بنت انخطبت وهي كان بعقلها أنو النظرة بتعبر عن الحب ، وكانت تستناااا من خطيبها أن ينظر لها هالنظرة الغرامية اللي بخيالها !
لكن للأسف هو ما أعطاها هالنظرة ، وكانت عم تشتكي أنو زوجها ما بحبها !!
ولما سألتها بعض الأسئلة اكتشفت أنو زوجها بيعشقها بس هي ما عم تعرف تفسّر المواقف ..
وبنت تانية كانت متخيلة الاهتمام أنو ياخدها عالمطاعم ويجيب لها وردة ويجيب لها هدايا ، ولما ما لقت منه هالشغلات تحطمت!
ولما حكت لي عن بعض مواقفهم وكيف مهتم بمشاعرها أظهرت لها كم هو مهتم فيها وهي ما عم تفهم ..


المهم باختصار
انظري لإيجابيات زوجك وابرزيها
امدحيه
اهتمي فيه
لا ترسمي بعقلك مثالية وتنتظريها


تعلموا الكلام الحلوووو والغزل والمدح
وربي يسعدكم جميعا
هذا اللي اجا ببالي هلأ ، وربما ارجع لكم بموضوع تاني إذا اتذكرت شغلات جديدة ..