تقدرون تسوون جذي ؟؟ نفس ما سوت البنات هذيل ؟؟

رمضان اللي طاف كنت قاعده مع اختي و رفيجه اختي
وكانت رفيجه اختي توها راده من ( غبقه نسائيه ) جلسه نسائيه فيها اكثر من 20 الى 50 امرأة

تقول رفيجه اختي لما تأخر الوقت تم في الجلسه حوالي 8 او 10 بنات و الكل يسولف
ويتكلم عن طريقه زواجه ...

رفيجه اختي توها مو متزوجه فقاعد تسولف ،، تقول :
وحده قالت ان ولد جيرانهم كان توه مطلق بعد مشاكل مع مرته وما كان عنده اعيال او اي شي
تقول البنت . امي بدت تشتري الحلويات و الاشياء الحلوة و الاكل الحلو . و تطرشه لبيت جيرانا بحجه ومن غير حجه !!

وتروح تزورهم ( كثرت الزيارات ) وتاخذني مرات معاها و انا كاشخه على سنجه عشر ... ومرات ما ترضى تاخذني

المهم كل ما يسألون ما شاء الله الطبخ حلو امي تقول : فلانه هي اللي طابخه !! ( واهو ا جذب شغل مطاعم ) او طبابيخ .

تقول تمت امي طوال شهر كامل تزور الناس هذيل و كانت هنديتنا تراقب بيتهم اذا جاء الرجال ( ولدهم المطلق ) تروح امي وتاخذني معاها و كله راعيه الصالون منقعه عندنا في البيت حق المكياج وغيره

المهم تقول مني ليما مره صدف ( مو صدفه اهي امها مسويتها ) و تقابلت مع الرجال هذا

تقول وصارت المقابله عند باب بيتهم انا داشه كأني بزورهم واهوا طالع !! و السلام عليكم وعليكم السلام

عقبها بفتره قصيره جاءوا يخطبون البنت و ما شاء الله البنت الحين متزوجه وعندها بيبي ومرتاحه حيل مع زوجها .


قصه ثانيه من قصص زواج البنت ...

وحده تقول كنت في الدوام وفي عندنا مراجع انا مميزته حيل و من خلال ورقه عرفت وين عنوانهم وين بيتهم ، ثلاث اربع مرات اروح بيتهم اشوفه متى يرد البيت
مني ليما مره وقفت سيارتي بشارعهم وكانت هذه ساعه وصوله وسويت نفسي ان السياره خربانه !!
شلعت واير من السياره يعني ما تشتغل
تقول وشافني ما عرف اني انا بنفس الوزاره اللي اهوا يراجع فيها !! ووقف ساعدني في عمليه تصليح السياره بس لان الواير انا خاشته ما اشتغلت السياره .
فقلت له خلاص ما لي غير اني ادق على اهلي و سويت نفسي كأن ما عندي تلفون ( بنت مؤدبه ) و دقيت على ابوي من تلفون الرجال و قلت له المشكله وجاء ابوي اخذني

تقول ثاني يوم اقنعت الوالد انه يدق على الشاب عشان يشكره و يعزمه على الغدا او العشا
تقول بالفعل ابوي دق على الرجال و شكره وقال له لازم تجي حنا عازمينك ( ومن الكلام هذا )

تقول بالفعل جاء الرجال و تقول ما شاء الله اول ما دش بيتنا اخواني و ابوي كلهم استقبلوه وحبوه لان اهم تراوالهم انه وقف معاي ( لما سيارتي خربت ) !!

و صار رفيج حق اخوي الكبير ،، وتكررت الزيارات وامي دقت على امه و صار تعارف وصرنا نزور بعض و يجون حفلاتنا و عزايمنا !!

تقول فتره وله خطبوني حق ولدهم :):) والحمد الله كاني قاعده ازهب حق العرس . .

صراحه البنت تسولف وقالت قصص كثيره حق زواج البنات !! انا انصدمت قلت في ناس جذي تسوي ؟؟
قالت لي البنت : ويعني اهي مو مسويه شي عيب او حرام !!

صراحه بنات ؟ تقدرون تسوون مثلها ؟؟