السلام عليكم ورحمة الله وبركاته
انا الحمدلله غيرت مطبخي واحلى شي سويته هو اني ركبت غسالة الصحون
رغم صغر مطبخي 3 في 3 متر فقط
سعرها 1250 للاستيل والبيضا 1100
اشتريتها من سوق الصواريخ بجدة
بداية صورة المحروسة
ماشاء الله تبارك الله
كيفية تسليك الغسالة
تحصلي ثلاث اسلاك بالغسالة
الصورة توضح
اللي باليمين لو تكبري الصورة هو لي حنفية المويه اللي تدخل بالغساله
والنص سلك فيش الكهربا
واليسار لي تصريف المويه من الغساله
وهذي صورة الجدار خلف الغسالة
كل شي واضح
زي منتو شايفين لي التصريف داخل بدولاب المغسله دحين اقول لكم ليش
شايفين دخل بانبوب تصريف سويناه خصوصي له عشان نتفادى مشاكل في المستقبل
وانتي تقدري تشبكيه مع تصريف المغسله او تدخليه على طول في حفرة التصريف بالارض
المهم يكون بارتفاع مايقل عن 40 سم اعتقد والا يسبب مشاكل
حتقولو ليه ماسويتي التصريف اللي بالجدار ورا الغساله
لن حجمه كبير وبارز شوي ولو عملته ورا الغساله كان الغساله خرجت عن مستوى الدولاب ويخرب الشكل الجمالي
نجي للانظمة من اليمين
اول زرار عاليمين تشغيل الطاقة
اذا ضغطناه تولع اللمبات
بعده زرار صغير فوقه لمبتين
الزرار لتشغيل الغسالة او ايقاف تشغيل الغسالة
والمبتين اللي فوقها الملمع والملح
اذا خلصت تنور
بعده زرار ثاني صغير لبرامج وانظمة الغسيل السته اللي على يسارها
عن طريقه تختاري النظام اللي يعجبكي
وراح اتكلم عن كل نظام بالترتيب من فوق لتحت
الاول
مدته 150 دقيقه يستخدم 12.3 لتر مويه
(قبل غسيل على 50 درجة حرارة الموية طبعا-غسيل 50-شطف70-تجفيف)
الثااني
مدته 130 دقيقه يستخدم 23.1 لتر
(قبل غسيل 50-قبل غسيل-غسيل 65-شطف-شطف-شطف55-تجفيف)
زي منتو شايفين النظام للمواعين و للقدور والصواني المتسخة كثيرا
يعني اقوى نظام بالغسالة
الثالث
مدته 160 دقيقه يستهلك 15.9 لتر
(قبل غسيل 50-غسيل 50-شطف-شطف65-تجفيف)
الرابع
مدته 155 دقيقه يستهلك 16.9 لتر
(قبل غسيل-غسيل50-شطف 65-تجفيف)
الخاامس
مدته 80 دقيقةيستهلك 8.6 لتر
(غسيل 40-شطف 70-تجفيف)
مكتوب بالكاتالوج انه للصحون اللتي من الضروري ان تشطف وتجفف فقط
وفي خانة الصابون ماتحطي شي
السادس
حبيب قلبي
مدته نص ساعه فقط ويستهلك 12.2 لتر وصابونه 20 جرام من البودرة بس
وبقية الانظمة تقدري تستخدمي مكعب او بودر ويختلف كمية البودر من نظام لنظام
بس انا افضل بالانظمة الثانية المكعبات لانه قوي وينظف مضبوووط
(غسيل 40-شطف-شطف45)
وزي منتو شايفين قلة وقته لنه بدوون تجفيف
ولاحظت التجفيف بالانظمة الثانية ياخذ وقت طويل مدتها ساعه تخيلووو
الانظمة من اليساار
الزر الاول 2/1
هذا اذا كانت مواعينك قليلة و استخدمتي رف واحد في الغسيل
اللي هو الرف العلوي
والزرار اللي جنبه هو لتأخير الغسيل
يعني تبغي الغساله تشتغل بعد 3 ساعات او 6 او 9 او 12
والصور اللي بالاخير
دورة الغسيل وقت الغسل
يعني وقت ماتكون شغالة تقول لك هي في اي مرحله
(قبل غسيل-غسيل-شطف-تجفيف)
طبعا هالكلام كله من الكاتالوووج وهو مكتوب بالانقليزي فقط
انا ترجمته لكم عشان يستفيدو العضوات والزائرات
اعرفكم تموتوووون تشوفون صور قبل بعد
المواعين قبل
شايفين كيف الوصخ والزفرر
صورة ثاانية لعيونكم
دخلت المواعين بالغسالة
وزي ماتلاحظو قلبت بعض الصحون شديدة الاتساخ على وجهها عشان تنظف زززين
قفلت الغسالة وشغلت نظام النص ساعه
وبعدين رحت غسلت على ايدي اللي ماقدر ادخلها الغساله
قدر الضغط والصحن الكبير