نتفة ورد

نتفة ورد @ntf_ord

عضوة شرف في عالم حواء

تقريري المفصل عن سفرتي لسويسرا 🇨🇭

تقارير مصورة

السلام عليكم واسعد الله مساءكم بكل خير حبايبي ..
طبعا هذي اول مشاركه لي بهالقسم .. حبيت انزل هالتقرير حتى افيد البنات اللي يبغون يسافرون لهالدوله .. وطبعا اللي شجعني اكثر انه انزل التقرير عن سؤال عضوه عن هالدوله فحبيت انزل الموضوع هنا لكي يستفيد الكل ..
طبعا رحلتي كان العام وبصراحه كانت مليانه مغامرات ومتعه ع اني ماطولت ورجعت وانا ماشبعت منها ..
الرحله كانت 8 ايام فقط ولي عوده لها باذن الله
خطه الرحله كانت ..
يوم في جنيف _6 ايام في انترلاكن_العوده جنيف
طبعا كل الحجوزات اللي حجزتها عن طريق البوكينج كنسلناها اول ماوصلنا هناك لانه ماعجبتني جنيف ابدا جتني ضيقه اول ماوصلتها ماعجبتني يمكن تعجب غيري .
طبعا حنا حاجزين فندق رمادا بجنيف الفندق نظيف وميزته جنب المطار تقريبا 3 دقايق وانتي بالمطار واستاجرنا سياره عن طريق موقع ناسيه اسمه زي البوكينج تقريبا استلمناها من المطار .. طبعا الافضل تستاجرون سياره خاصه لكم اريح لكم للتنقلات هناك ماينفع تكاسي والمرشد السياحي رفضته لانه ابغى اخذ راحتي بالسياره .. طبعا فندق رمادا في جنيف فندق راقي وجميل فطورهم نظيف وغرفهم كمان نظيفه .. حجزنا غرفه وحده فقط مع حمامها اعزكم الله ب350 ريال
طبعا حنا جلسنا ليله فقط وصلنا 10 الصباح ومن بكرا الساعه 6 الصباح افطرنا ومشينا على انترلاكن
انترلاكن هي اسم منطقه وهي عباره عن مجموعه قرى وبلدان تندرج تحت اسمها زي مثلا القصيم وعسير ..
المدن اللي زرتها في انترلاكن (كاندرستيج وجراندوالد وثون واندرستون (مو متاكده من اسمها) ولوتربرونين )
طبعا قريه كاندرستيج قريه جميله وهاديه قضيت فيها احلى 3 ايام مرررره استمعت فيها وبرسلكم صور لها تجنن تجنن تجنن وكل شي قريب منها مثلا البحيره الزرقاء تبعد عنها 5 كيلو الى 10 كيلو بس وبحيره اوشن سي موجوده في هالقريه بس تطلعين لها بالتلفريك فوق وبارده شوي وفيه التوبوجان (عربه التزلج) ومطاعم مررره حلووه .. القريه هاديه واخلاقهم حلوه ع اني رحت بشهر مافي سياح بس مررره محترمين وكنت بنقابي يعني مااكشف .. حجزنا في فندق اطلالته تجننن اسمه بلومليسالب(هذا الفندق والمنطقه عامه جيناه بالغلط طبعا حنا حاجزين جرينوالد وكان اسم الفندق بلومليسالب طبعا القارمن نكبنا هناك ولا يلقط اقمار صناعيه فاستخدمنا القوقل ماب القوقل ماب ماطلع لي اسم الفندق اللي في جريندوالد طلع لي منطقتين اللي هم كاندرستيج وبحيره ثون طبعا قلت بحط اللي بكاندرستيج لانه ماذكر اني حجزته قريب من بحر .. المهم رحنا له ودخلت ع صاحبه الفندق وعطيتها ورقه الحجز قالت مو هذا الفندق تقصد اللي بجريندوالد قلت لها ماطلعه لنا قوقل ماب وحاولت هي الله يسعدها تتصل باصحاب الفندق بس ماردو طبعا المشوار بعيد بين جرينوالد وكاندرستيج يمكن ساعتين والطريق ضيق وصعب وجريندوالد منطقه مرتفعه مرررره باعلى الجبال.. طبعا قلنا لها خلاص نبي نلغي حجز هذاك الفندق ونحجز عندك قالت مو مشكله واتصلنا ع البوكينج وقدر يلغي حجز اللي من بكرا لكن اللي بنفس اليوم راح علينا قيمته ويمكن خيره لنا
صاحبة الفندق حرمه محتررررمه وحجزنا بسعر روعه ب300 ريال وسوت لنا خصم كمان ..
بحيره ثون موجوده في ثون تبعد عن كاندرستيج مشوار نص ساعه الى ساعه رووعه الجلسه قدام البحيره وفيه كهوف ومغارات مررره ممتعه موقعها قدام البحيره بس سجلو بقوقل ماب كهوف ومغارات تطلع لك ع طول اذا رحتي لهالكهوف روح لمكتب فوق قبل تدخلون الكهوف تعطيكم الموظفه كتاب دليل السياحه في سويسرا مررره روعه وفادنا جدا ..
القريه اللي اسمها اندرستون او زي كذا اسمها هذي منطقه جميله ومتطوره فيه ركوب الاحصنه وفيه قطار يطلعك فووق الى مرتفعات يونغفرو وفيها اسواق ومطاعم وكوفيهات وفيها فنادق اذا تحبون السكن في المدن .. انا عن نفسي فضلت السكن في الريف احلى واروق والمناظر حلووه قدام عيني حتى اسعار الفنادق في الريف ارخص اخذنا فندق في ثون امام البحيره اسمه بيوتيهوتيل سعره رووعه ب250 ريال فقط .. فندقنا هذا قريب من كل شي منطقه اندرستون (مو متاكده من اسمها ترا يمكن غلط 😅) تبعد عن الفندق حوالي 10د يعني نطلع لها ونرجع لفندقنا وللهدوء والروقان ..
منطقه لوتربرونين تجنن طبيعتها تبعد عن ثون مشوار نص ساعه تقريبا حلوه قريه تعتبر كنا حاجزين كوخ مطل ع شلال يونغفر بس كنسلناه ماعجبني ابد مو قد المدح اللي قريت عنه .. الاكواخ صايره بين جبال صاكه عليها والشلال فقط قدامك مكان مخيف ومكتوم والاكواخ جنب بعض اول ماتشوفين تحسبينه زي مخيمات اللاجئين وخفت اسكنه لانه فيه اجانب وعلى بعضنا والابواب خشب يقدرون يكسرونها والمكان مو آمن ..
طبعا حجزنا كان فقط في كاندرستيج 3 ايام وبحيره ثون 3 ايام وكل شي قريب منهم صارت تمشيتنا بينهم ..
طبعا في سوبر ماركت جميييل مانتقضى الا منه اسمه coop متكامل واسعاره حلوه ..
طبعا المحلات عندهم تقفل 6 المساء فكنا نخلص اغراضنا قبل هالوقت .. اما المطاعم تتاخر ماتقفل وع حسب كل مطعم ..
النهار طويل هناك الغروب حدود الساعه 9 مساء ..
هذا تقريري المفصل وراح انزل لكم الصور لكل منطقه وبحاول ادرج فيديو مع انه مايضبط بس بحاول ..
اتمنى اني افدتكم .. دمتم بود❤
23
9K

يلزم عليك تسجيل الدخول أولًا لكتابة تعليق.

تسجيل دخول

نتفة ورد
نتفة ورد
قريه kanderstage الساحره
نتفة ورد
نتفة ورد
نتفة ورد
نتفة ورد
kanderstage❤
نتفة ورد
نتفة ورد
اطلاله الفندق Beuthotel على بحيرة ثون ❤
البحيره الزرقاء Bluesee
نتفة ورد
نتفة ورد
اطلاله من مرتفعات يونغفرو Juongfru