تقريري : طاولة تغيير الحفاظ هل هي مهمة أم مجرد كماليات ؟

بسم الله الرحمن الرحيم

عملت هذا التقرير المتواضع من مجهودي الشخصي لأني أنا كنت بحاجته
ف قلت أنزله لكم يمكن تستفيدون .. و بالنهاية تقدرين تقررين هل إنتي بحاجتها و إلا لا ؟

- طاولة تغيير الحفاظ -

يمكن البعض وقع في حيرة ؟
هل هي مهمة ؟ أو عملية ؟ و إلا مجرد كماليات ؟
خصوصاً إن إحنا عندنا الدارج نغير عادي بأي مكان مناسب مو مثل الأجانب
ضروووورية عندهم و تعتبر من الأساسيات ..


من وجهة نظري تعتمد بالدرجة الأولى على الحالة المادية
أيش يخليني أقرر أشتريها أو لا ؟؟؟ رتبتها لكم حسب الأولويات ..
1- الحالة المادية : أقل شي راح تكون ب 300-500 ريال و توصل 1000 ببعض المحلات
2- عندك مساحة بالشقة ؟ مهم يكون لها مساحة إذا مافي .. بلاش منها مع العلم
إن النوعية البلاستيك منها تنفع تنحط بالحمام ..
3- ولادتك عملية ( قيصرية ) ؟ مو بالضرورة تحتاجينها لكن اللي مافي أحد يساعدها وقت
النفاس بتفيدها الطاولة أو أي سطح مرتفع عشان ما تتعب من الانحناء المتكرر
4- التصميم اللي حابته هل هو متوفر ؟ لأن في أنواع بلاستيك و خشب و في شي يجي
معها بانيو , و طبعاً الرفوف و الأدراج تسهل عليك الترتيب و كل شي يكون قريب منك
الحفايظ و أدوات النظافة و الزبالة تكرمون و الأدوية ..

هذي بعض التصاميم المتوفرة من خلال بحثي مع الأسعار :

- النوع الأول : من سنتربوينت السعر بحدود 500 ريال يكون بلاستيك أو حديد مغلف
ببلاستيك ..
في منه موديلين : مع بانيو أو بدون بانيو








- النوع الثاني : خشبي من ايكيا متنوعة الأسعار ما بين 300-600 ريال
كلها بدون بانيو .. و ملاحظين إنها خشب غالباً ما تنفع بالحمام مع الموية و الرطوبة

http://ar.ikea.com/sa/ar/catalog/categories/departments/childrens_ikea/18701/
تصاميمهم مختلفة في شي يتثبت بالجدار للي ما عندها مساحة و ممتازة للحمام
و في المكتبي و في الطاولة العادية ..

- إذا كان عندك مساحة شاغرة و حابة تستغلينها من دون شراء الطاولة ؟
ممكن يكون فيه مغسلة رخام عريضة أو عندك أي طاولة أو حابة تغيرين على كنبة
أو سرير مرتفع



من المهم يكون متوفر عندك هذا الشي مريح لجسم البيبي لأنها محشية
خصوصاً لما تغيرين له على مكان صلب زي مغسلة أو طاولة
و يحميهم من الطيحة و يمنع تسرب الفضلات على المكان اللي تغيرين له فيه ,,
و إذا كان بلاستيك ممكن تفرشين عليه منشفة ناعمة عشان ما يبرد جسمه
متوفرة بكل محلات تجهيز الأطفال : ايكيا , سنتربوينت , الممحلات العادية زي الهرم و غيره



و في شكل ثاني يكون الوجه زي المنشفة و من الخلف يكون بلاستيك بحيث من الوجه الأمامي
يتشرب الفضلات و البلاستيك كون عازل و مقاوم التسريب .. ينفع للتغيير على مكان طري
زي الكنبة أو السرير أو الأرضية المفروشة .. متوفرة بنفس المحلات السابقة ...



و بالتأكيد لازم يكون عندك سلة متنقلة فيها أغراض البيبي .. أنا أشوفها تختصر موضوع الطاولة
فقط ابتكري سلتك الخاصة ممكن تشترينها جاهزة أو من أي صندوق أو سلة عندك تبطنينها و تحطين
فيها كل اللوازم من حفايظ و عدة نظافة ..


و ممكن توفرين دولاب الرفوف هذا بمكان تغييرك المعتاد يلم كل الأغراض



بالنسبة للبكريات ... ممكن يتسائلون عن سبب كل هذا التنظيم و الترتيب .. ؟؟

تغيير الحفاظ من الأشياء المتعبة خصوصاً إنها بشكل متكرر خلال اليوم ..
تخيلي نفسك تغيرين للطفل على الأقل 4 مرات باليوم لمدة سنة و نص أو سنتين !
غير إن أدوات النظافة و الغيارات كثيرة و تتكركب باستمرار

عندك : حفايظ , لبس , منشفة , بودرة , كريم عادي , كريم تسلخات , أدوية , مناديل مبللة
علبة مناديل , مقص أظافر , مشط إلخخخ .. ف لازم تكون مرتبة و في متناولك ..

أنا لما كنت بكرية ما سويت شي كنت أغير ع الأرض و لا زلت , لأن هذا اللي شفته
في عايلتنا محد اشترى طاولة !
بس بعد ما تعبت مع بنتي و مريت بظروف مرض و عمليات و آلام ظهر و تعلمت التنظيم
و الترتيب حبيت أشتريها .. و أبطل العشوائية اللي كنت فيها ..

مع العلم إن الحسنة في التغيير ع الأرض : مافي تكلفة مادية , و لا عانيت من طيحات !
ف ركزوا على موضوع الطيحات لا تغفلون عنه ..

و أما أبرز عيب ,, كنت موزعة الأغراض شي ع الطاولة و شي ع الأرض ساعات ألمهم
في سلة و إذا تكركبت تركتها هههه ..


تم بحمدالله ..