السلام عليكم ورحمة الله وبركاته
اليوم حابة اكتبلكم تقريري عن فندق أنجم في مكة ..
الفندق مررة عجبني ، ديكور الفندق تركي وأسلوب الفندق كمان تركي ..
موظفين الفندق من جنسيات مختلفة لكنهم كلهم من مواليد السعودية في الأتراك وفي الأفغانستان وفي الهنود لكن ماشاءالله الكل يتكلم سعودي كويس واكتشفت إنهم كلهم من مواليد السعودية ..
طبعًا ما صورت شي :'( بس صورت من شباك الغرفة عشان صحباتي طلبو مني اشوفلهم قد ايش يبعد عن الحرم ..
الفندق اسمو مو معروف كتير بـ (أنجم) أغلب اللي يعرفو الفندق باسم فندق عبد اللطيف جميل
وهادي الصور جمعتللكم هيا من النت
الفندق من برا
طبعا عند المربع اللي في النص عاليمين وعاليسار في كراسي وطاولات وهادا كوفي الفندق
المربع اللي في الوسط هادا درج ينزلك عالشارع اللي تروحي منو عالحرم
الباب اللي عاليمين هادا الاستقبال
هنا بعد ما تزلي من الدرج عشان تروحي للحرم
وهادا شكل الاستقبال من جوا
وبالنسبة للغرف انا رحت غرفة شخصين وكانو سريرين ملصقين في بعض
زي الغرفة دي بس بدون السرير التالت
وهادي السويت
وهنا شكل السيب حق الغرف
العيب اللي في غرف السويت انو السرير ما يكفي شخصين تحسيه حق نفر ونص :/ يعني ادا وحدة وزوجها راحو لازم الاتنين يكونو نحاف ههههههههه أو تقريبا حق ام وطفل هادي الغرف اللي اخدناها احنا اخدنا 2 عادي ووحدة سويت والعادي كانت احسن من السويت في السرير يعني سريرين ملصقين في بعض احسن من سرير واحد نفر ونص!
طبعًا في غرف تانية في الفندق وكبيرة تقدرو تشوفو صورها في قوقل بس انا مح احط الا صور الاشياء اللي شفتها
طبعًا تدخلي الغرفة حتلاقي عالطاولة اللي تحت التلفزيون فيها غلاية واكواب وشاهي ونسكافة وصحن فيه فواكه ومويا .
الشاهي والفواكه ابدًا ابدًا مو من السعودية ، كلها مستوردة من تركيا .
طبعا نزلت الفطور والفطور كان كلو تركي ..
ويكون في طباخين واحد يسوي البيض ويكون جنبو خضار واضافات وانتي تختاري ايش تبغي من اضافات عالبيض ويسويلك هوا
والتاني يسوي الكريب وقدامك الاحشوات اللي تبي تحشيها
ومحل الغدا غير عن محل الفطور
انا بالنسبة ليا الفطور عجبني اكتر من الغدا لأنو الغدا حسيتو كلو اكلات دسمة مشوي ورز وسمك وقمبري وكان في ايدام بامية وبس اكلت بامية :/
اما الفطور كان في جبنات وسلطات وكان في سجق وبطاطس مشوية والبيض اللي قولتلكم عليه وكان في مارتديلا وكدا
طبعًا الفندق بعد توسعة الحرم حيكون قريب من الحرم مرة مع اني حسيت اني مشيت كتير :/ يعني عشان اوصل للكعبة يمكن مشيت من 10 دقايق الى 15 دقيقة :/ وما تقدري تروحي بالسيارة لأنك خلاص على ارض ساحة الحرم
بس طبعا فندق برج الساعة اقرب للحرم بكتيييييير من فندق أنجم ..
وهادي الصور اللي صورتها من شباك الغرفة
طبعًا محل التكسيرات هادي كلها حيسير الحرم فالفندق تقريبًا حيكون مطل عالحرم ..
وبس هادا تقريري :p
ومع السلامة :26: