بسم الله الرحمن الرحيم
اليوم سويت لكم تقرير عن غساله الصحون ويرلبول البيضاء الجديده
اول شي اشتريتها من الزقزوق للاجهزه المنزليه ب 2900 ريال قبل شهر ونص تقريبا
فيها شاشه صغيره توضح الوقت وخاصيه نصف الحموله لبرنامجين من الست برامج الي هي الاقتصادي والحساس
وهي تفرق عن اللون الاستيل بان الاستيل فيها رشاش زياده عن البيضا مكانه في الخلف من اسفل دائريه للضخ المضاعف للمويه والاستيل نصف الحموله تشتغل على كل البرامج وزايده بالسعر
والحمد لله البيضا ممتازه وتنظف تمام
هذي صورتها مع المنظفات الي استخدمها فيها
طبعا بالبدايه جربت المكعبات ثلاثه بواحد الملح والصابون والملع سوا بصراحه شي لايوصف معاها من ناحيه النظافه واللمعان لما تخلص الكميه الي عندي راح احول على المكعبات
والحين نشوف الغساله
وهنا انا حطيت المواعين الي كانت عندي وسخه بالغساله وماهي كثيره وقتها لان طريقتي كل شي استخدمه من اول اليوم على طول انزل منه الاكل وامرر بعضه تحت الصنبور عشان ينزل منه بقايا الاكل الصلب مثل قطع البصل الصغيره او الارز
وهنا صينيه التيفال فيها بقايا زيت من الاكل والصفايه والفناجيل كان فيها ايس كريم ناشف
وهنا بعد الغسل
وهذي الصينيه والفناجيل والمصفى
طبعا مو واضح مره النظافه واللمعان بالصوره مثل على الطبيعه
طبعا الغساله فيها ستة برامج هي من اليسار
اول شي البرنامج الحساس الي علامته رقم 6 بالانجليزي يتحسس عن نوعية المواعين الي بالغساله ويغسلها
ثاني برنامج الشطف وهي مثلا اذا المواعين حطيتيها من بدري وبتشغليها بالليل وماتبغي الاوساخ تمسك فيها تشطفها ومدتها 16 دقيقه
ثالث برنامج الي هو حق الكاسات الزجاجيه واي شي زجاجي مثلا انا ماقد استخدمته الى الان بصراحه لان الاواني عندي لما اغسلها تكون مختلفه مو كلها زجاج ومدته 100 دقيقه
رابع برنامج الغسل السريع الي عليه صورت ساعه مدته 44 دقيقه بس ما استخدمه كثير لانه مافيه شطف بالبدايه قبل الغسل بالصابون ويكون للاواني البسيطة الاتساخ والاواني غير الزجاجيه ماكانت تنشف يكون فيها بلل وقطرات مويه فعشان كذا ما استخدمه كثير
خامس برنامج الي هو الاقتصادي الي عليه حرف e وهو افضل برنامج عندي وتقريبا هو الي استخدمه يوميا مدته ساعتين ونص تقريبا ينظف جدا وينشف عجبني الصراحه فمعتمده عليه
آخر برنامج الي هو الكثيف الي عليه صورة قدر حق الاواني الشديده الاتساخ وفيها زيوت كثير مثلا انا ماقد استخدمته وقته طويل ثلاث ساعات لان الاقتصادي اغناني عن تجربته بصراحه ممكن استخدمه برمضان عاد تعرفون كلش دسم
اما بيمين الشاشه فهي صورة البرامج الست الي باليسار طبعا وتحت كل واحد موضحين درجة حراره المويه
وطبعا الاواني الحساسه والي لها طرف بالذهبي والفضي او الوان تستخدم لها اقل درجه حراره لانها مع الوقت تنمسح
اما بالنسبه للتوصيل المويه موصلتها بالصنبور الي خاص بالسخان لان ماركبت سخان بالمطبخ وتصريف المويه المتسخه طلعته على مجلى الغسل مباشره لان الغساله بجنب الحوض مالها مكان بالدولاب ومرتاحه للوضع
وانا اشغلها مره وحده آخر اليوم قبل انام اكون مجمعه فيها كل مواعين اليوم توفير للمويه والصابون والكهربا
يلله عليكم يا اخوات انكم تلحقو تشترون الي ناويه عليها قبل رمضان وغثا النحاس
وما اابي منكم الا انكم تدعولي بالتوفيق دنيا وآخره وبصلاح ذريتي
واي سؤال انا حاظره
وآسفه كثير على الصور المقلوبه غصب عني ان شاء الله لصار عندي وقت اعدلها