.
.
السلام عليكم ورحمة الله وبركاته
قبل فتره كنت ناويه اشتري غسالة اتوماتيكيه .. ودخلت عالم حواء والانترنت بشكل عام وزادت حيرتي بقووه
لقيت انواع كثيره للغسالات .. شي بعامود .. وشي فتحه علويه وشي فتحه اماميه
زادت حيرتي على شكل الغساله اكثر من حيرتي باسم الشركه
وكل الخوف اني احط فلوسي في شي واندم عليه لاني بكل بساطه ما راح اسوي في البيت مستودع غسالات نتيجه تجارب فاشله :09:
طبعا انا عائلتي 3 انفار ..
فاستبعدت الغساله ام عاموود عشانها كبيره حتى شكلها يخوف في شقتي :09:
(طبعا لازم تحطي في عين الاعتبار الحجم على الاقل لازم تعبي الملابس في نصف حمولة الغساله.. على ما قراءت في النت)
وكان الخيار بين الفتحه الاماميه والعلويه
الفتحه العلويه ..
1- يقولو تصرف مويه كثير وانا مو مقتنعه بهالنقطه اذا كان حجم الغساله يناسب حجم العائله ..
2- لازم لها سباكه مويه حاره وبارده
3- فيه كذا تجارب تقول انها ما تنظف ذيك النظافه.
الفتحه الاماميه كان خياري عليها ..
1- دايم بالافلام الامريكيه والمسلسلات الاجنبيه نشوفهم يستخدموها فقلت اكيد انها عمليه مرره <-- هههه
2- مدموج معاها سخان يعني ما يحتاج لها الا مويه بارده فقط.
3- تنظف من قلب
فبعد مشاورات ومحاورات وقراءات واستخارات هههه .. قررت اشتري ارستون
عشان اطقم مع غسالة المواعين ههههه
ولان بعض المدن العسكريه معتمده اجهزة ارستون في تاثيثها لكبار الضباط (فاكيد حكومتنا ما حيأثثو شي اي كلام :42: )
طيب نجي لشرح غسالتي عشان اللي تفكر تشتري تقارن وتكون فاهمه وش احتياجاتها قبل لا تتهور :42:
موديل غسالتي
أرستون AR6L105
وهذا شكلها
طبعا نجي للوحة الاوامر تبعتها
في البدايه نحط المنظفات في الدرج الخاص وهو يجي في الجهه اليسار للوحة التحكم
في الجيب رقم
1- نحط الصابون ونحط معاه فانيش اذا تبغي
2- نحط الملطف مثل كمفورت
3- نحط الكلوروكس السائل
واذا كان المبيض عباره عن بودره فيه درج نركبه على الجيب رقم 3 ..
بس على كلام البائع يقول الافضل المبيض السائل عشان تطولي عمر الغساله <-- والعهده عليه
وهذا مكان الجيب اللي يتركب في مكان المبيض
بعد ما نحط المنظفات نجي لاختيار نوع النظام من هنا
وموجود اختصار لكل نظام في لوحه موجوده فوق علبة المنظفات
وشرحها كالتالي
دورة غسيل يوميه وهي مافيها خاصيه التنقيع .. يعني تغسل على طول
رقم 1 .. غسيل القطنيات او الملابس البيضاء .. وهي تحتاج صابون وكلوروكس وملطف
رقم 2 .. غسيل القطنيات الملونه الوان ناعمه .. برضو تحتاج صابون ومبيض وكلوروكس
رقم 3 .. غسيل الاقمشه الصناعيه .. تحتاج صابون وملطف
رقم 4 .. غسيل سريع وتنشيف في نص ساعه .. يحتاج صابون وملطف
رقم 5 .. غسيل سريع وتنشيف في ربع ساعه .. يحتاج صابون وملطف
الدورات الخاصه وهي دورات يكون فيه خاصيه التنقيع .. عشان كذا تطول حبتين
رقم 6 .. للغسيل الابيض المتسخ جدا وهي تغسل على درجة حراره عاليه جدا توصل 90 درجه مئويه .. تحتاج صابون وكلوروكس وملطف
رقم 7 .. دوره غسيل ليليه وهي تنقع لفتره طويله وتقريبا هي اطول وقت في الانظمه كلها تاخذ تقريبا 4 ساعات من ضمنها التنقيع .. وتحتاج لصابون وملطف فقط
رقم 8 .. دوره خاصه بملابس الاطفال ولاحظت انها تغسل الملابس في ماء غزير عشان تشيل كل بقايا الصابون حتى ما تسبب حساسيه لجلد الطفل .. تحتاج صابون وملطف
رقم 9 .. نظام القمصان والبلايز وصراحه ماقد استخدمته .. يحتاج صابون وملطف
رقم 10 .. للملابس الحريريه والاشياء الخفيفه اللي تحتاج غسيل باليد .. يحتاج صابون وملطف
رقم 11 .. للملابس الصوفيه تغسل الصوف بعنايه خفيفه .. يحتاج صابون وملطف
دورات التنشيف فقط
A .. شطف بالماء فقط وتنشيف .. تحتاج ملطف
B .. شطف خفيف بالماء وسريع وتنشيف .. تحتاج ملطف
C .. تنشيف فقط مدته ربع ساعه ..
D .. تنشيف خفيف مدته 12 دقيقه وسرعه دوران اقل ..
E .. تصريف للماء فقط بدون تنشيف مدته دقيقتين ..
بعد ما نحدد نوع نظام الغسيل اللي يناسب غسيلي .. نحدد درجة حراره المويه المناسبه لكل نظام مع دورة التنشيف
وتكون الخيارات كالتالي :
رقم 1 .. درجة حرارة المويه 60 او 40 على حسب الوسخ .. دورة التنشيف 1000
رقم 2 .. درجة حرارة المويه 40 .. ودورة التنشيف 1000
رقم 3 .. درجة حرارة المويه 60 او 40 .. دورة التنشيف 800
رقم 4 .. درجة الحراره 30 .. دورة التنشيف 800
رقم 5 .. درجة الحراره 30 .. دورة التنشيف 800
رقم 6.. درجو الحراره 90 او 60 حسب وسخ الملابس البيضاء .. دورة التنشيف 1000
رقم 7 .. درة الحراره 40 .. دورة التنشيف 800
رقم 8 .. درجة الحراره 40 .. دورة التنشيف 800
رقم 9 .. درجة الحراره 40 .. دورة التنشيف 600
رقم 10 .. درجه الحراره 30 .. بدون دورة تنشيف لانها ملابس خفيفه وحساسه.
رقم 11 .. درجه الحراره 40 .. دورة التنشيف 600
A .. دورة التنشيف 1000
B .. دورة التنشيف 800
C .. دورة التنشيف 1000
D .. دورة التنشيف 800
E .. بدون دورة تنشيف
بعد ما نحدد كل شي ممكن نختار بعد الخيارات الاضافيه حسب رغبتك
من اليمين خيار لتاجيل وقت الغسيل مثلا لو تبغيها تشتغل قبل ما تصحي من النوم ههههه تحطي انها تغسل بعد 9 ساعات وهي حتشتغل لوحدها واول ما تقومي من النوم تلاقيها جاهزه بس تنشريها ..
طبعا برضو تصلح للي يركز على ان الكهرب يكون خارج اوقات الذروه وهيك ..
الخيار اللي بعده خيار الكوي .. وهي تقلل من التجاعيد بس طبعا ما تشتغل مع كل الانظمه .. انا جربتها مع القطنيات ومرره حلو يطلع الكوي خفيف وسريع وبعض الملابس اسحب عليها مالها داعي كوي هههههههه
بس ما تشتغل من الانظمه السريعه ومع ملابس الاطفال والصوف (يعني الاشياء البديهيه اللي ما تحتاج كوي ما تشتغل معاها هالخاصيه ) بس بشكل عام الملابس ما تجي فيها ذيك التجاعيد اللي تجي مع الغساله العاديه فرق 50%
الخيار اللي بعده وهو شطف اكثر بالمويه .. وهي تصلح للي جلدهم حساس بس تصرف مويه اكثر
الخيار اللي بعده راح اسميه دعك بالصابون اكثر ههههه
طبعا كلها خيارات اضافيه ممكن ما تختاري شي منها ..
بعدها تختاري خيار تشغيل والغساله حتعمل كل شي وانتي ارجعي بعد الوقت المحدد
طبعا من هنا حتشوفي الغساله واصله اي مرحله
لما تولع النور عند الصوره الاولى يعني هي قاعده تدعك بالصابون ههههه
اللي بعدها الغساله تشطف الملابس
اللي بعدها تنشيف الملابس
اللي بعدها تصريف للمويه
اللي بعدها اذا ولعت يعني خلصت الغساله شغل وحتفك معاك مفتاح الباب عشان تخرجي الملابس وتنشريها
بعد ما خلصت التقرير
انا افضل الغساله اللي تجي لحالها من غير مجفف .. لان الغساله حتطول
ولان عمرها حيكون قصير
ولان مو كل الانظمه حتحتاج مجفف حراري يعني تحسي انك شريتي ميزه ما حتحتاجيها كثير
ولان عمل المجفف الحراري المدموج مع الغساله مو بنف عمل المجفف المفصول لان المفصول ادائه احسن بكثييير
يعني بالنسبه لي انا مخليه المجفف خطه خمسيه هههههه في بيت العمر ان شاء الله لاني مو محتاجته كثير الحين
وسلامتكم واتمنى ان تقريري نال استحسانكم وهذرتي نالت استحسانكم :42: