تكفون..ساعدوني في مصيبة أهلي ورفضهم.. وش أسوي؟

السلام عليكم
كيف الحال يا بنات.. شحالكم.. أنا اول مرة اكتب هنا في المنتدى وهالمعرف خاص بزميلتي لكن اكتبه فيه حالياً
حبيت أعرض عليكم مشكلتي وياليت تساعدوني
أنا بنت عمري 37 سنة وماتزوجت ومن عايلة محافظة وذوق واخلاق وربي ما امدح نفسي.. ودارسة ومكملة تعليمي ولله الحمد.. لكن بدون وظيفة للأسف :44:.. وهذا اللي متعبني لا زواج ولا وظيفة ..
طبعا وحده بعمري الخطاب اكيد قليلين ..وياماتقدم لي اشخاص قبل لكن الاهل يرفضون أحيانا لاسباب مقنعة وأحيانا لاسباب واهية جداً..ويتقدمون ناس وينرفضون وانا مدري... مثل الأطرش في الزفة..والله المستعان

المهم راح أدخل بمشكلتي على طول.. صار لي اكثر من خمس سنوات ومحد تقدم لي ..
من فترة بسيطة وحده من صديقاتي ذكرتني لناس..وفعلا تقدموا.. لكن أمي رفضتتتتتتهم للأسف بدون مايسألون عن الشخص وبدون علمي.. وما أدري وش سبب الرفض ؟؟لكني عرفت من صديقتي هالشيء لانها كانت تجيب لي الاخبار أول بأول
مع أن الشخص ماعليه ..عاقل وملتزم وحافظ للقرآن ومطلق لكن عيبه عياله معه.. وساكن في الشمال.. وحنا بالرياض يعني بعيد شوية عنا ... لكن هذا مو عذر لان وحده من عماتي ساكنه أصلا بالشمال....وهالشي أنا متقبلته وما أعتبره عيب سواء العيال او السكن ... أنا يهمني رجال يخاف الله فيني ومحترم ..

المهم... زميلتي كلمتني من يومين تقول الناس ناويين يتقدمون مرة ثانية ..لكني أعرف الوالدة راح ترفضهم مثل مارفضتهم قبل ويكون نفس الرد.. لان مافيه أحد أقنعها وكلمها وأثر عليها..

وأنا مهوب عارفه أفاتحها بالموضوع.. بتقولي وش عرفك وحتى لو قلت لها زميلتي قالت لي .. راح تظن أن أهل الخاطب كلموني من وراها.. وراح تزعل كثييييير وتحط بخاطرها ويمكن تعاند بعد وماتتقبل هالزواج..
وحتى لو كلمتها.. وبكيت وكسرت خاطرها .. وقلت لها أسألوا عنه وشوفوه...بتقول انتي ماتعرفين مصلحتك وعلشان يسكتوني احتمال كبير يقولون ايه سألنا عنه لكنه مايصلح.. مع أني متأكدة مليون بالمية أنهم ماسألوا..


وقتها وش بسوووووووي؟؟ أقولهم أنتم كذابين ماسألتوا عنه ؟؟!!!!!!


أنا عارفه أمي حنونة و تحبني و يمكن خايفة علي أني أتزوج مطلق وعنده عيال وبعيدة عنهم.. وعلشان تخليني أشيل هالفكرة راح يقولون سألنا عنه وطلع مايصلح... بس مو لهدرجة خوفهم علي

أنا خلاص كبيرة وأعرف أتخذ قراراتي وقد المسؤلية.. وش بقى من عمري... ماصار أحد يتقدم لي... ودي أفرح بطفل أو طفلين أطلع فيهم بهالدنيا ..


لا تقولون لي خلوهم يكلمون الوالد... الوالد مزاجي وأشد من الوالدة وحتى لو تقبلهم راح يستشير امي وراح تقوله لا أنا مو موافقة وبتحط ألف عيب وعيب ويتكنسل الموضوع
وماعندي إلا أخ واحد كبير..متزوج لكنه للأسف شايل نفسه منا بعد الزواج ولاهامه أحد.. و 4 أخوات أكبر مني ... لكنهم على نفس مبدأ الوالدة تقريباً.. الزواج عندهم شيء ثانوي لانهم ماحسوا باللي محروم منه.. يقولون لي تزوجتي زين ماتزوجتي عادي وش فيها.. هذا أنتي ماكله وشاربه...هذا بنات كثير ماتزوجوا
أفكر أفاتح وحده منهم.. لكن خايفة تكون بصف الوالدة ..
من جد محتاااااااارة .. هل أقول لزميلتي خلاص قولي للناس مافيه نصيب وأسكت :icon33:... وإلا أتكلم وأدافع وشلون بس أتكلم وأفتح الموضوع؟؟:44:
تكفوووووون ساعدوني وأهم شي أدعووووووووووووووو لي..