تكفون أبغى حل لمشكلتي مع أولادي

السلام عليكم ورحمة الله وبركاته 
يسعدكم ربي والله أني أحبكم مثل خواتي وما يمر يوم إلا ولازم أتصفح عالمي الخاص ( عالم حواء ) واستفدت منكم الكثير الله يوفقكم 
ادري الموضوع اللي باطرحه مو مكانه هنا بس قلت اطرح مشكلتي وشوفوا لي حل الله يوفقكم 
بعطيكم قصة حياتي فتحملوني شوي هههههه
انا من يوم  عمري سبعة شهور توفي والدي الله يرحمه ولما صار عمري سبع سنوات توفت أمي رحمة الله عليها وربوني خواتي فديتهم ولما كبرت انتقلت لاخواني المهم كانت اختي الكبيرة من أبوي شوي قاسيه علي بس حتى على أولادها بس الكل كان يشيد بتربيتها الحسنة والحمد لله كبرت وكملت دراستي وتزوجت ولله الحمد والآن انا معلمة بفضل الله أولاً ثم بفضل إخواني وأخواتي وعندي ثلاثة أطفال بس مشكلتي أني أحس تربيتي لها دور وتأثير على شخصيتي فانا قاسية على أولادي جداً وأضربهم على أتفه الأشياء وهم صغار أكبرهم عمره ست سنوات وأنا والله ابكي بعد ما اضربهم وحاسه ان هذا غلط بس ما اقدر اتحملهم حتى ولدي الكبير يقول لي ماما أنتِ ما تحبينا زي خالاتي يحبون أولادهم بس عادي حتى لو ما تحبينا إحنا نحبك ، حتى وأنا اكتب لكم الحين خنقتني العبرة وإذا زعلت من أبوهم أو أهله لأنهم جنبي أحط حرتي فيهم مع أني ما أحس بالذنب إلا بعد ما اضربهم بس الله يسامح اختي الكبيرة لانها كانت تضربنا هي أثرت علي ولاني عشت يتيمة ما حسيت بحنان الأم والأب الله يرحمهم لذلك ما قدرت اعطي أولادي الحنان فعلاً صدقت المقولة ( فاقد الشي لا يعطيه )  حتى والله أحس أنهم يقارنون حياتهم مع حياة الأطفال اللي في عمرهم بس ما شاء الله أمهات الأطفال اللي في عايلتنا كلهم عاشوا عند أمهاتهم وآبائهم إلا انا الوحيدة في العائلة اللي عشت يتيمة وحتى زوجي متضايق من قسوتي عليهم يقول اللي ما يعرفك ما يصدق انك أمهم يقول زوجة أبوهم وإلا عدو لهم وأهله بعد لاحظوا الشي هذا فيني 
شريت كتب عن الحنان واللعب معهم بس ما أحس أني وصلت للشي اللي انا ابغاه ، حتى انا بديت أقارن نفسي بالأمهات الأخريات ما أحس أني أنفع أني أكون ام 
أتمنى منكم تعطوني نصائح وحلول تشعرني بحنان وعاطفة على أولادي ما أبغى ينقصهم شي عن الأطفال بالذات بالعاطفة والحنان لاني عارفة إذا استمريت معهم كذا بكره يكبرون ويربون أولادهم على القسوة زي ما صار معي 
رجاءً من اخواتي العزيزات ما أبغى تجريح اللي فيني كافيني (قل خيراً أو اصمت ) 
😘😘😘