تكفون احتاج مشورتكم في مشكلتي الزوجيه

عندي مشكله واتمنى تقولولي رأيكم بكل صراحه..مشكلتي زوجيه نفسيه ..بصراحه ماعرفت اوصفها لأنها مأثره على نفسيتي طول مدة زواجي 5 سنوات..وللأسف زوجي مايدري عن هالشي ..

عمري 25 أنا الحمدلله متزوجه من 5سنوات ..زوجي اكبر مني بفارق بسيط ..عندنا طفل ..حياتنا جميله وهادئه وزوجي انسان طيب ومتفهم ومميز والحمدلله ..


بأيام الملكه كنت أكلم زوجي عن اخوي اننا خطبنا له قبل زوجته الحاليه ولظروف خاصه ماتمت خطبته ولما خطبنا زوجته الحاليه ..بلغنا اهلها بالسالفه واننا خطبنا وماتمت الخطبه ومن هالكلام..


هو قام يسأل ليش بلغتوهم دام ماصار شي وكدا ..أنا حسيت ان السالفه فيها شي..وضغطت عليه وقالي انه هو قبل لايخطبني
يمكن ب سنه او اقل ..انتقل لمدينه ثانيه لظروف عمله ..وهالمدينه فيها عمه اخو ابوه والعلاقه بينهم مو مره قويه ..يقول
كلمته بنت عمه وهو استغرب من هالجرأه لان حنا ماعندنا كدا ..وصارت بس تكلمه تسلم ومن هالكلام ..وبعدها بكم يوم قالتله
ان بنت عمه الثانيه تبيه وودها تكلمه..كلمته وكلمها وماأدري وش طبيعية الكلام اللي صار بهالوقت ..هو يقول كلام عادي حق تعارف
بس..

اللي صار بعدها ان عمته كلمته وقالتله انت لازم تخطبها والبنت تبيك وهي مو مرتاحه عند اهلها ..فهو يقول انا حسيت ان الكل منتظر مني هالخطوه..

وكلم اهله وخطبها وماصار نصيب لأن عمه عقله متحجر وديكتاتوري طبعآ هدا على كلامه ..

طبعآ الفتره اللي هو نقل من مدينتنا لعمله في المدينه الثانيه وهالكلام كله ماأخد الا شهر ونص ..لأنه بس كان منتدب ..وبعدين صارت سالفة
الخطبه لما رجع ..


طيب انا بداك الوقت بعد ماقال لي السالفه ..صرت أسأله يعني انت تحبها ..وهو كان يتكلم عادي ويقول لا اصلآ انا ماامداني حتى اتكلم معاها
والحمدلله الموضوع ماتم اصلآ ماكنت مرتاح .. بس انا ماقلتلك لأني عارف انك ممكن تغارين وانا ماحبيت اخلي هالشي براسك ..


طبعآ من 5 سنين وانا ماعاد فتحت الموضوع مع ان براسي اسئله كثيييره ..احس كبريائي مايسمح لي وغيرتي ماتخليني أقدر ادكره فيها لحظه ..
لكن دبحتني الغيره كل هالمده ..ادا شفته سرحان قلت انه يفكر فيها ..وادا سمع اغنيه قلت اكيد تدكرها ..وادا جاء طاري عمه بمكان اقول اكيد تدكرها
وانا ارتبك وقتها لأبعد حد ..



انا مااعرفها ولاشفتها ابدآ لكن اقسم بالله هالموضوع مجنني ..احاول اتخلص من غيرتي ووسواسي مو قادره ..جبت رقمها وحسابها بتويتر وكل شي عنها ..
اتابعها عالواتس واشوف آخر ظهور لها ..واحيان الشيطان يخليني اشك بزوجي وهو بريء..


علاقتي بزوجي جدآ مثاليه ..يحبني جدآ وأحبه .. يداريني بكل طريقه يقدر لها من اول زواجنا الى اليوم ..يراعي مشاعري ..
يلبي طلباتي والحمدلله ..وابدآ مافي شي يدل انه كان يحب او انه كان متعلق بإنسانه ثانيه .. ولا قد بدر منه اي تصرف يثير شكي ابدآ ..من ايام الملكه وهو
يداريني ويراعيني .. بس الموضوع مسيطر علي بشكل كبير .. ودي اسأله اكثر واكثر راسي مليان استفسارات واسئله تحتاج اجابات
عشان ارتاح .. بس مو قادره اتكلم ولا اجيب هالموضوع ..

ولله يمكن تقولون ماعندي سالفه لكن اقسم بالله طفشت مع اني الحمدلله على قدر كبير من الجمال والثقه بالنفس وقايمه بزوجي
بس الوسواس دبحني .. واخاف يزيد الموضوع ويتطور ويأثر على علاقتنا ..


تكفوووون شورو علي ..