تكفون انصحوني صرت ضايعة بين كلام امي وزوجي

اخواتي انا في ضيق ما يعلمه الا الله من ليلة البارحة
ادعي ربي واستخير واكيد جيت هنا استشير اخواتي فالله..
لان بعد ما استشرت امي واختي توهوني اكثر :44:

الموضوع بالتفصيل : اني توظفت
راتبي الحمد لله حوالي 10 الاف يعني مره كويس

زوجي راتبه 6200 كان اكثر بس سحبوا منه بعض البدلات ف صفي ع 6200

يقسط للبنك 2700
و قسط ثاني 700

يبقى من راتبه 2800
اجار البيت 1700
اقساط ديونه للناس 1000 شهريا


طلبني اساعده فالمصاريف والاقساط اللي لغير البنك..
وبعد نقاشات طويلة عريضة ..

اتفقنا انه يقسط 1500 للناس بدل 1000 عشان نخلصها بسرعة ونرتاح
مع اني قد قلت له انت تسلفتها انت ترجعها مالي دخل انا بس رحمته وحسيت الوضع مره ما يسمح اني ارفض اساعده لان اجار الشقة غالي حسبي الله على اصحاب العقارات غرفتين بذالسعر!

المهم صرت اعطيه 1500 يدفعها للناس ..
و هو عليه مصاريف البيت وكذا..

المشكلة ذالشهر اعطيته 1500 و فوقها 2000 وهو طالع يطلبني و هو داخل يطلبني لانه سلف واحد من اصحابه 500 و اعطى واحد ثاني 200 كان متسلفها منه..
انا ضقت ما صارت كل شوية اعطيني اعطيني ولما قلت له كذا تضايق وبطل يطلبني ,,
امس ماكان في محفظته الا ريالين ويبغى يروح لاهله يعبي بنزين ويحلق و يشحن جواله و طلبني
ورفضت اعطيه قال اوك باطلع اشوف ركاب اوصلهم
وطلع ولا لقي ورجع ماد بوزه ونام من امس العشاء الى اليوم الساعة 2 ونص !!
رفع ضغطي

وصحي قال بطلع اشوف ركاب وطلع ولا لقي و رجع نفس الشي ع باله ينام قلت له اعطيك 50 تكفيك قال ماتكفي ومشكورة تركته وطلعت بس ماخلاني قلبي رجعت قلت له كم تبغى قال لا ولاشي ومن هنا من هنا اعطيته 70 و مشى ..


الحين انا اساعده من ورى اهلي ليه لان امي واختي سوو لي سالفة لانهم يعرفو انه مديون وطول الوقت يوصوني ما اساعده وما اعوده وانه حيتعود و انه بيتكل عليك في كل شي ولا عطينه و بيلعب بفلوسك ومن ذالكلام .
واخاف اندم اني ما سمعت كلامهم..خصوصا لما صار يطلبني كثير :(
قبل يومين قالي ابغى منك فلوس اعطي ابويه لان ماعنده ولا شي ومستحي منه !!! تضايقت من كلمته شايفني بنك اعطيه واعطي ابوه , تذكرت كلام امي يوم تقول بيتكل عليه بيقول في كل موقف راتبها موجود.


مع العلم انه ما يقصر معاي ابدا في شغل البيت متعاون معي و هو الي يوصلني لعملي ويرجعني منه وقبل لا اتوظف كان ابدا مو مقصر لدرجة لما احتاج شي و ماعنده يروح يتسلف ويعطيني و لا يدخلني في اموره المادية ابدا و يسدد فاتورة جوالي و دايم مصروف في شنطتي .. بس وقتها ما كان يدفع ايجار.

ابغى رايكم ونصيحتكم لي الله يرضى عليكم ..

انا حكيت لكم الحال بالتفصيييييل و اي سؤال حرد عليه بس انصحوني وادعو لي :(