تكفون بنات حالتي مزرية ( تزوجت وقصتي عجيبة )

انا أرملة من عمري ٢٩ سنة والحين عمري ٤٨ عشتها لاولادي وقبل سنة ونصف تزوجت من رجل بعيد عني مسافة يعني هو بمدينة وأنا بمدينة أخرى ، وزواجي ليس مسيار لكن بحكم ظروفه اتفقنا على كل شيء ولما تزوجت أخلف وعوده ، ما اعترف بي لأهله ولا لزوجته يعني زواجي سر ولا استأجر لي بيت ، كل ما يجي يسكني في فندق ولا ينفق عليه ولا شي ورضيت عشان حسيت أنه حنون ، لحد ما شافني اتعلقت فيه وصار ما يسأل عني ولا يهتم ولا اي شي من حقوقي ، للأمانة هو ما أذاني واذا جاء اليومين بعد شهر او اكثر يعاملني معاملة جميلة وياخذ حاجته مني ويفسحني ويمشيني ، وبعدها إذا رجع مدينته ما ادري عنه شي الا انا اركض وراه ، اتفقنا على الجية كل عشر ايام ولكن صار يماطلني وكل شوي تطول المدة الين صارت لشهرين ، وحاولت انا اسافر له وحصل لكن تخيلي كان يجيني بالفندق ياخذ حاجته ويروح ينام عند زوجته وحطيت له عذر ان زوجته ما عندها علم بزواجه وتحملت وبعدها سحب شهر كامل عليه لأني صراحة كنت مستمتعة معه وهو كمان مستمتع وعرف نقطة ضعفي وصار ما يكلمني مدة طويلة واذا رسلت ما يفتح رسايلي يعلقها ٦ أو ٧ ساعات ، واذا فتحها ما يرد وأنا ازيد اجري وراه حسيت انه يتلذذ بتعذيبي وأشياء كثير صارت ما ذكرتها ، لكني بالاخير ما حسيت بقيمتي معه رغم اني حاولت اسعاده بشتى الطرق وفهمته إنك مهملني ومو معطيني حقوقي إلى أن وصلت لحالة نفسية مزرية وطلبت الطلاق وطلقني طلقة واحدة وبعد شهر رجع يبكي وقال انا احبك وابغى ارجعك ورجعت ونفس الحكاية عدم اهتمام ولا تقدير وتهميش وتطلقت مرة ثانية ويقول لي الطلاق ابسط حقوقك فحسيت انه بايعني ، لكن الطلقة ما وقعت لأني حائض ونفسيتي جدًا تعبانة وماني قادرة انساه ، هل قراري صح في طلب الطلاق وهل هذي علاقة سامة ؟؟

صحيح هو أذاني وعاملني معاملة لا ترضي الله من سلب حقوق وعدم احترام وتقدير وتهميش وعدم تواصل وكثير أشياء ولا أدري ليش يعاملني بهذي الطريقة مع إني حاسة إنه متعلق فيه لغرض لنفسه ، لكن يشهد الله إنه ما عمره تلفظ علي ولا رفع صوته ولا زعلني بكلمة ولما يجي اليومين اللي حاسبها لي يعيشني ملكة ، لكن إذا رجع ما يعاملني معاملة الزوجة اللي تستحق كل شي محسسني بالرفض والدونية واني ما لي حقوق واني ولا شيء بس ماني فاهمة ليش هالشخصيتين يعاملني فيها ..

وربي محسسني إني ولا شي البهيمة أحسن مني وما ادري ليه متعلقة فيه تعبت نفسيتي الآن ومو متخيلة انه استغنى عني وراح يتركني ، وبما إني كبيرة بالعمر اقول خايفة يفوت عليه العمر وما الاقي احسن منه ، مع انه مخلي كرامتي مع الأرض ..
وعشان طلبت الطلاق لأني مو قادرة اتحمل ، قاعدة اكلم نفسي واقول يمكن تسرعت ويمكن ما فهمت هو يبغى ايه ومحتارة ماني عارفة اوأرسلت له رسالة اعتذار وانه الطلاق ما وقع انبسط واتفقنا اني ما عاد اطلب الطلاق ولا ارفع للمحكمة وقال ان شاء الله اتعدل واجيك واصبري علي وصار نفس الشي بتحجج بعمله لانه عسكري وانا مقدرة وضعه وانتظره الحين ، وربي بس اخاف اصبر ويكون يلعب علي وبالاخير يطفش واتعب انا ونبعد ثاني ..
لو تعرفون كثر ايش نفسيتي منهارة منه خلاني دايم ابكي وتوقفت حياتي ما عاد لي رغبة بأي شيء والحين بنات انا ضايعة ابغى ارجع لحياتي القديمة واعيشها مثل قبل ملني عارفة كيف اتصرف لاني وعدته ما عاد اطلب الطلاق لكن موضوعنا كما هو ما تغير ولا راح يتغير ..

دلوني بنات وش اسوي عسى الله يفرجها عليكم من اوسع ابوابه في هذا اليوم الفضيل وبنات تعاطفوا معي لا تكونون عليه وضدي الله يسعدكم ..