تكفون بنات ممكن تسمعوني دقايق

بسم الله الرحمن الرحيم
السلام عليكم ورحمة الله وبركاته .... مساء الخير حبيباتي ... كيف حالكم ...ان شاء اللة تكونون في اتم السعاده
واسأل الله ان يجمعني واياكم في مستقر رحمته وان يجعلنا ممن تحاببنا فيه حتى يظلنا الله في ظله يوم لاظل ألا ظله ....
حبيباتي في الله انامشكلتي اولاً اني ماعندي احد في البيت اقدر اشكي له ويفهمني ، يعني ما عندي خوات وامي ماتوافقني كثير يعني ماتفهمني ، مالقيت احد اقدر احكي له إلا انتم

انا بنت مثل كل البنات اتمنى ربي يرزقني بالزوج الصالح ومن اهم شروطي انه يكون ملتزم ، تقدم لي كثير وكنت ارفض بحجة الدراسه وانا في الواقع ارفض لأن الي متقدم لي تبدوا عليه مظاهر التقصير من حلق اللحيه وغيرها وكان ابويه الله يرحمه ويغفر له مايعارض رأيي ابدا أسأل الله ان يرحمه ويغفرله ويسكنه الفردوس الاعلى من الجنه الله يحرم عليك العذاب ياغلى الناس ويجعلك في روضه من رياض الجنه ....
المهم اني تخرجت وتقدم لي ولد عمي وماهو ملتزم يعني يحلق لحيته ويسبل ثوبه ويسمع اغاني ويشوف الدش ومثل كل هالشباب وطبعا ماوافقت لأنه ماهو الانسان اللي اتمنى يكون شريك حياتي .....اللي استغربت منه ان امي واخواني وجدتي وتقريبا كل الي يعرفوني وجاهم الخبر قالوا لي ليه وافقي عليه يمكن معد يتقدم لك احد وانتي كبرتي وماأدري ايش وكلام خوفني صراحه ...... بنات انا عمري 22 واحس انه توني صغيره وبعدين ولد عمي فوق انه ماهو ملتزم اصغر مني او يمكن كبري وانا ابي واحد اكبرمني وملتزم ...وولد عمي هذا ماهو متوفر فيه اي شيء من صفات الانسان اللي كنت اتمنى اني ارتبط به ....
انا احس ان اخواني وامي منحرجين من عمي واهله عشان كذا يبغوني اوافق خصوصاً انا بلغناهم رفضنا اكثر من مره وما زالوا يحاولون حتى ان عمي تعهد انه يخلي ولده يربي لحيته ويقصر ثوبه ( كأني بزر يلعبون علي ) يابنات وش اسوي اوافق عليه ولا ارفض ماأدري والله محتاره الله يرحمك يأبويه الله يرحمك ماحسيت بالخوف والحيره إلا من بعدك الله يرحمك ويغفر لك يالغالي ... بنات تكفون دلوني محتاره أخواني يقلون انه طيب وتقدرين تغيرينه وأنا أعرف الولد واحنا صغار كان غبي وعلى نياته بس ما ادري ماكان هذا حلمي والله اني محتاره ارجوكم بنات شيروني هم يبغون الرد في الصيف ( علشان يمدي الاخ يطول لحيته ) والله ماأدري معليش بنات طولت عليكم وشكلي غثيتكم سامحوني بس والله من حيرتي


انتظر ردودكم بفارغ الصبر