تكفون عطوني حل مليييييييييييييت

السلام عليكم ورحمة الله وبركاته

تكفون يابنات حواء ساعدوني عطوني حل

مشكلتي تتلخص بانه

امس يوم زيارتي لاهلي لانه نهاية الاسبوع وانا دايم بهاليوم زوجي يوديني لهم ويجي اخر الليل ياخذني منهم

على الساعه 1 صباحا لنا 6 سنوات على هالحال مافي شي جديد

امس على الساعه 12 بالليل يعني قبل الموعد بساعه اتصل توقعته يقول جاي اخذكم بس لقيته يقول تعالي مع السايق الهندي (( تذكروا الساعه 12 بالليل ))

وانا ما معاي الا ولدي عمره 5 سنوات قلت له السايق نايم وفعلا هو نايم لانه خلاص من الساعه 11 ينام لانه مافي احد بيطلع او في مشاوير

قلت له تعال انت قال بيجي صاحبي مقدر اجي قلت تعال قبل يجي خذنا مع العلم ان بيت اهلي مش بعيد بس خفت اجي مع السايق بالليل تدرون المستهترين والمراهقين كلهم بالشوارع خصوصا بالاجازه الصيفيه لامدارس ولاشي يعني بطاليه

قال يمكن صاحبي يطول قلت مهما طول ماراح ينام عندك او خلنا ننام عند اهلي سكر التلفون بدون اي كلمه
((( ترى هو عادي عنده اسهر عند اهلي ومرات نطلع منهم على الساعه 5 الصباح ناخذ الفطور من اي مطعم ونرجع لبيتنا ))

جانا الساعه 2 بالليل وهو يزاعق ويهاوش وللاسف يقولي (( انتي كذابه السايق مو نايم )) ويعلم الله انه نايم بس مو راضي يصدق

سكت وطنشته مارديت عليه قلت له كلمه وحده انا ماكذبت لو تبي تصدق او ماتصدق شي راجع لك

انا اللي قهرني ان بعد عشرة 6 سنوات يكذبني وماعنده ثقه بكلامي صدمني وانقهرت

انا ما اجمل نفسي قدامكم انا عوبه ولساني طويل بس والله على الحق بس وارد الكلمه بعشر بس من كلمته ماقدرت اقول شي كانه معطيني كف على وجهي

دخلت انام وتركته بس لقيت ولدي ياقلبي عليه يوم شافني منقهره راح له وقاله يالبطه يا ابو كرشه ليه تزعل ماما

صراحه برد شوي من اللي بقلبي

تكفون يابنات انا الحين ما اتكلم معاه وناويه اطنشه كم يوم واوريه ان الله حق واندمه على كلمته

بس قولوا لي وش رايكم بالسالفه بكل صراحه وماراح ازعل من احد لو مو غلاتكم وثقتي فيكم ياخواتي ما شكيت لكم :(