تكفون ياخواتي ادخلو اباخذ رايكم بشي يخص ابو بنتي ياليت الجميع يدخل ويدلي برايه

بسم الله الرحمن الرحيم

السلام عليكم ورحمة الله وبركاته
خواتي فيه شي رغبت اني اشوف رأيكم فيه وهو يخص ابو بنتي طبعا انا والحمدلله مطلقه من تسع سنوات
وعندي بنت يوم اتطلق كانت توها مكلمة السنة تقريبا توها ماشية والحين احمد ربي واشكره بسنة رابع ابتدائي
ماودي ازعجكم بالتفاصيل لكن باختصار ابو بنتي رجال والنعم جزاه الله خير اعطاني يوم كنت معه ولا قصر معي وطلاقي منه ماكان لسبب منه لكن لسبب مني انا ولو استقبلت من امري مااستدبرت كان شلته على راسي لكن الجهل وسوء التصرف واني ماقدرت الامور قدرها والحمدلله رب العالمين هذا يوم انا معه
طبعا هو تزوج بعد ماطلقني بشهرين وانا الحمدلله معي ببنتي وكان اول ماطلقني يشوفها كل تقريبا اسبوعين همن تزوج وصار يجي يشوفها تقريبا كل شهر ويجيب 500 ريال شوي شوي صار يشوفها كل شهرين بعد ماعدت بنتي سبع سنين بعدين من تقريبا العام صار يجي يشوفها كل ست شهور طبعا انا منيب موظفة طبعا شوفته لبنته تقريبا حوالي ساعة يوديها لبقالة او لسوبر ماركت يعني مايوديها لااهله ابد وتقريبا ماعمرها شافت احد من قرايبه الا مرة او مرتين ولا بيته ولا اخوانها يمكن الا مره وبالسيارة طبعا تصرفاته كله له رب يحاسبه عليه انا ماعلي منه ويالله يصلح حالي وحال بنيتي ويفتح علينا والحمدلله انا وبنتي مندمجين بحياتنا وقليل نجيب طاري ابوها لكن الشي اللي يخصني اني ماابي بنتي تكره ابوها ابدا ولا تنفر منه وابيها تحبه وتتودد له بالكلام الطيب مهما يكن هو ابوها والله يسخره لها ويسخرها له وانا لاحظت ان بنتي ومع تباعد فترات شوفتها لابوها وانها خارج حياته واهله واسرته كانه غريب طبعا واذا طلبت مني شي اقولها اذا جا لمك ابوك قولي له تقول لا ماابي خلاص طبعا اخر الزيارات لها كان دايم يسالها عني مره طبعا هي ماتقولي الا بعدين والا يسالها اسئلة كنه يبي يعرف اخباري وانا متاكده والله اعلم مهوب بقايا عشرة او شئ من هالقبيل ماابي اظلمه لكن هو كرهني وحقد علي طبعا اثناء زواجنا بعد الطلاق خلاص كل شخص راح لحال سبيله والله يسهل على الجميع واضرب لكم مثال

يقوله امك عنده جوال تقول ايه قال كم رقمه ؟ قالت ماحفظته وماابي اظلمه لكن يمكنه يبي يشوف رقمي مميز ولالا
وانا على ذمته سوى لي ليزك لعيوني لان نظري ضعيف ماطلبت منه ولاشي هو اللي سوى لي ويساله يقوله امك تلبس نظارات ؟ وتراوه سمعت انه بعد ماطلقني قال لخواته واهله اني سويت له وسويت له حتى عيونه سويت له عمليه ماغصبته انا والحمدلله

واخر مره قلت له يابنيتي وري ابوك شهاداتك ( مخليتها تجمعها بملف )واذا شفتي ابوك حبيه وحبي راسه وقولي وينك يايبه من زمان عنك ؟ تدرون وش رد !قاله من هو اللي يقولك قولي لي ؟؟

وقلت له اذا وداك للبقاله قولي يايبه ودني للمكتبه اجيب دفاتر وابشتري مريول ( ابيها تتعود تضبط امورها بنفسه وتتعامل مع ابوها وابتطمن عليها ) قال من اللي قالك ؟؟

وغيرها من المواقف


يااخواتي سبحان الله مهوب من كريم فعل الرجل انه ينزل نفسه لحرمة مسكينه ويحط راسه براسها ماتضرر من الطلاق وتعب منه وانكسر الا انا هو الحمدلله عاش حياته ولاكانه مطلق
او انه احتمال ولا ابي اظلمه الله يغنيني عنه بغناته اني ماتزوجت انتظره
انتظر رحمة ربي والله اللي مهوب مخليني ولا بنتي وبيخلف علينا الخلف الصالح بمنه وكرمه

واحتمال انه بس استشراف واطلاع وتطفل يبي يشوف هاللي ماله حس وينه يعني ؟سبحان الله والله ماانتظر منه حمد ولا شكر الشكر لله وحده بس اقل شي قال جزاه الله خير اللي مااذتني ببنتي وشالته عن وانا تزوجت وشفت حياتي !!

ليش يحقد علي وسبحان الله ماكفاه الطلاق ؟ خلاص كل شي انتهى والحمدلله بس ماابي بنتي تاثر وتيتم وابوها حي رايكم ياخواتي باللي صار هل هو حقد ؟ وفقط ودي انبه لنقطة تخصني وهي اني مالي رغبة ابدا باابو بنتي ابد ولو كتب الله وتقدم مع انه مستبعد وانا ايضا تغير تفكيري ونظريتي من زمان والان لن ارده مباشره لكن استخير لاني ماادري وين الخير فيه لكن الحمدلله بنتي كبرت ومافيه شي اعود له من اجله

وسؤالي الان فقط عن تبرير لتصرفاته وارجوا رؤية الوضع بعين الواقع لابعين المثالية اما العودة من غيرها ارجو انها ماتكون ذات اهتمام نقطه ارجو تغافلها تماما فهي بعيده وانا اعرف بذلك
واطلب من ربي يأجرني في مصيبتي ويخلف لي خيرا منهاويرزقني زوجا صالحا مصلحا مباركا ويسخره لي ولابنتي آمين
اللهم لاتشمت بي عدوا ولاحاسدا