تكفون يا بنات أبغيكم تساعدوني في حل حق موضوعي

شخباركم بنات؟؟؟؟

انا يا بنات كانت مشكلتي اني كنت ادرس في جامعة البحرين وما قدرت أواصل فيها بسبب صعوبة قوانينها وكان معدلي نازل المهم ظليت فيها سنتين (2003-2005) بعدين طلعت وعلى طول دخلت جامعة خاصة والحمد لله مرتاحة منها من الناحية الدراسية بس المشكلة ان أبوي دخلة المادي متوسط والحين تقاعد ومصاريف الجامعة غالية يعني سنويا تكلفة الدراسة في السنة بدون مصاريفي الشخصية (40000) ريال وانا تقريبا بدرس في هالجامعة سنتين او سنتين ونص ...وانا بصراحة قلت الى ابوي يصارحني يقولي اذا يقدر مو مشكلة راح ادرس أهو قالي دخلي أهم شي تحصلين لش شهادة وتشتغلين الفلوس مو مو مهمة ... بصراحة دخلت واخواني معارضين (مع ان اختي متزوجة وتشتغل وعندي اخوان اثنين بعد يشتغلون) يقولون ان أبوي يصرف عليج أكثر من ما يصرف علينا وانج بتهزين ميزاينة البيت... اخوي الكبير معارض مع انه الحين متزوج وابوي لما خطب له أبوي دفع له كل مصاريف الزواج أخوي ما دفع ولا شي من جيبه واحنا ما تكلمنا والحين لما ابوي بغى يدرسني عارض...واخوي اللي أصغر مني بعد ما شاء الله شاطر والسنة اخر سنة له بالثانوي واهو يبي يدرس طب في الخارج بس انا واقفة لة حجر عثر لان ابوي ما بيقدر يدرسنا اثنينا وبيظطر يروح جامعة البحرين لان مصاريفها رخيصة... بس يا بنات الطامة الكبرى انج تسمعين اهلج يتكلمون من وراج ويقعدون يقولون الى ابوي هذي ما يصير تصرف عليها أكثر منا...بصراحة دخلت غرفتي والدموع تنزل مني ...

يا بنات انا عندي هواية تصميم الأزياء فكرت اني اشتري قطعة واصممها وبعيدن أبيعها علشان اساعد ابوي في مصاريف الدراسة ويقدر اخوي الصغير يسافر يدرس طب..بس المشكلة القطعة تحتاج فلوس وخياطها يحتاج فلوس يعني اذا طلعت علي تقريبا ب (5000 ) ريال ما عندي ميزانية ادفع تكاليفها وما اقدر اطلب من عند ابوي.. وحتى لو على فرض سويت الفستان او العباية (الجلابية) من اللي بيشتري من عندي الفستان اخاف اخسره ومحد يشتريه... وفي نفس الوقت بيتنا اذا عنده احد هواية ما يشجعونه يحطمونه ويحبطونه...

تكفون ساعدوني في ايجاد الحل جزاكم الله خير