بنات ابي نصيحتكم والله بموت من القهرررررررررررر ابي مساعدة منكم
انا خلصت البكالوريوس بامتياز والحمدلله وهدفي اكمل مشواري الدراسي في بريطانيا لكن مشكلتي في اقناع الاهل وخاصة اني من عائلة بدوية محافظة جدا ولو البنت تنطق طاري السفر ( تنقص رقبتها بساطور )
انا عائلتي مكونة من أم ( ربي يحفظها لنا ) واخين واحد عمره 25 والثاني 20 سنة واختين
ولنا اخوان من اب (كبار في السن ) << والموت منهم
والمشكلة الاساسية من اخوان الاب (لانهم مايعترفون بشيء اسمه دراسة اصلا ) فكيف لو اقول لهم اني بكمل دراستي برا !!! زين مايدفنوني حية
انا فكرت في خطة امشيها عليهم
امي واخوي اللي عمره 20 سنة موافقين يروحون معي وماعندهم مانع وخواتي بعد
لكن اخوي الكبير (25 سنة ) كل يوم اناقشه في الموضوع وهو كل يوم برأي ( خاصة انه ملتزم ومتشدد ) ومثله مثل اي شخص ثاني خايف علي والخ
طبعا دراستي ماراح تتجاوز سنة وحده بالكثير وانا حصلت على قبول من الجامعات واللي يقهر ان اموري مع القبول ماشية تمام التمام والحين عندي قبول من 3 جامعات على سنة 2010
والحين نجي للخطة الجهنمية اللي مفكرة فيها بس ابي توجيهاتكم
فكرت اني ارتب اموري وكل شي على اساس اني خلاص بسافر مع امي واخوي الصغير وبالنسبةلاخوي الكبير (25 سنة ) هو مو موافق بس بضطر ما اطيعه في هالموضوع ومع الايام بيرضى .. بس اخواني من ابوي شلون اقنعهم !!! (وعلى فكرة علاقتنا معهم مو لهناك يعني في السنة يمرون علينا مرة وحده والاتصالات من العيد للعيد وبس لانهم في بلد وانا في بلد ) لكن عندهم جواسيس علينا وينقلون اخبارنا لهم << مسوين علينا استخبارات ..
ففكرت اني اخلي امي تكلمهم وتقول لهم انها بتسافر معي عشان انا مريضة وبروح اتعالج في لندن ^_^ ومانجيب لهم طاري ماجستير ولا شي (بنضحك عليهم ) عشان يقولون قلعة وادرين هههههه وبهالطريقة اكون تخلصت منهم
لكن في امور ثانيه افكر فيها
اول شي باستعرض لكم نقاط قوتي ونقاط ضعفي ( عشان اخذ نصايحكم )
نقاط قوتي :
1- الحمدلله انا ماعندي عائله كبيرة ( عمامي ميتين - خوالي بعيدين ولا لهم خص فينا ولا جد ولا جده ولا احد ) وهذي اعتبرها نقطة قوة تساعدني يعني المشكلة تنحصر بس في اخواني من ابوي .
2- امي واخوي بيكونون معي وهذي ميزة
3- مصاريفي المالية كلها بتكون متغطية ( لان شغلي بيعطوني تفرغ دراسي وراتبي بيمشي كامل + راتب من الدولة )
نقاط ضعفي :
1- انا ذكرت اني من عائلة بدوية محافظة جدا ولا عمره بنت طلعت وسافرت برا من عائلتنا ولا حتى ولد يعني بكون انا اول وحده تشطح هالشطحه الكبيرة
2- انا شخصيتي خجولة جدااااا لابعد الحدود وما اعرف انخرط مع العالم او اعتمد على نفسي واحس الخجل بيقيدني لاني انا على طول في البيت وما اطلع منه ووحدانية لا صديقات ولا قريبات انا حتى السوق ما اطلعه ولا احبه ولا احب اكون علاقات مع الناس حتى الجوال ما استخدمه حياتي كلها بين الدراسة وقراءة الكتب وتصفح الانترنت فقط حتى التلفزيون مااشوفه ..
3- انا هادية واكره الصخب والانفتاح على العالم وما احب الانفتاحية الغربية (وهذي النقطه خايفه منها ) صحيح اني محافظة على نفسي لكن اخاف نشوف مناظر مزعجه من الاجانب وخاصة اننا ولا عمرنا سافرنا دول اجنبية
4- اخاف امي تزهق وتتملل بسبب انها ماراح تقدر تطلع ( احس هالدول ماتصلح لحريمنا الكبار ) وانا طول الوقت في الدراسة وماراح اقدر اقعد معها كثير ( اخاف تطفش مسكينه )
-- اخوي الكبير (25 سنة ) يقول لي هذي انانيه منك تاخذين امنا سنة كاملة وتحرمينا منها
( حسيت كلامه صح ) بس انا قلت له مو شرط امنا تقعد معي سنه كاملة ممكن 4-6 شهور لين تتطمن علينا وتضبط امورنا وبعدين ترجع ( امي بصراحه ودها تقعد معي تقول طفشت من الحر هههههه وبصراحه هي بعد مسكينه جيراننا هنا كلهم اجانب وما احد يسير عليها ويونسها ومثل ماقلت مالنا اقارب ) والحين ابي اخذ رايكم
انا اللي احسه ان رفض اخوي الكبير (اخوي من امي وابوي) هو عشان اخواني الكبار اللي في بلد ثانية لانهم بدو لاخر درجه ومايرضون ابد بسالفة ان بنت تسافر واحس اخوي هذا خايف منهم وخايف انهم يلومونه او يقولون له كلام يجرحه ( هو طبعا ما وضح لي ان هذا السبب الرئيسي بس انا متأكده انه هو ) هو رافض بحجج ثانيه مثلا يقول لي بريطانيا دولة مو أمنه وصارت فيها جرائم بسبب العنصرية ضد العرب وان هالدولة خطيره يعني يبي يكرهني في الموضوع بأشياء ثانية بس ما قال لي انه خايف من اخواني الكبار مع اني متأكده انه لو اخواني الكبار مثلا( طبعا في الاحلام ) كانوا موافقين كان اكيد هو وافق ومارفض ( ادري فيه )
الشين في اخواني الكبار اللي من ابوي انه يكرهونا وشفنا الويل منهم لما عشان وياهم بعد وفاة ابوي وما افتكينا منهم الا لما رحنا بلد ثانية ومع ذلك فارضين وصايتهم علينا ويتدخلون في امورنا واخبارنا توصلهم عن طريق جواسيس علينا مثل ماقلت لكم في الاول وهم عمرهم مانفعونا بشي جابوا لنا كل الامراض النفسية
حتى انا ذكرت اننا منعزلين عن الناس والسبب هم اخواني من ابوي دمروا نفسياتنا صاروا اخواني الشباب شخصياتهم ضعيفه واحنا البنات خوافات وانطوائيات ومو جرئيات ومالنا صديقات وربع
من صغرنا كانوا يضربونا لما نلعب يقولون لنا لا تزعجونا ويقعدون يتكلمون علينا ومايخلون شي مايقولونه يضحكون على اشكالنا ويستهزأون فينا وامي بس كانت تدافع عنا وتهاوشهم وهم بلا فايده ( اعمارهم فوق الاربعين )
حتى اذكر ان واحد منهم كان يمسك يد اخوي وهو طفل عمره سنتين ويحرقها بغوري الشاهي وهو ساخن ويقعد يضحك (عمره حوالي 45 سنة وتزوج متأخر وجاب طفل يموت عليه وسبحان الله ربي وراه في ولده وانحرق ولده بالفرن )
الحين ذكرت لكم نبذة عن ظروفي ونبذه عن حياتي وعن المحيط اللي عايشه فيه
شنو نصايحكم لي هل اتمسك بإكمال دراستي وتحقيق حلمي وخاصة اني كنت الاولى على دفعتي حتى اللي يدرسوني كلهم قالوا لي لازم تكملين دراستك وماتوقفين ( بلادي مافيها التخصص اللي ابيه) بالرغم من رفض اخوي ؟
أو اني اتناسي الحلم واتناسى الطموح عشان اخواني من ابوي مايزعلون على اخوي ويسبونه ويتكلمون عليه ؟
انا بين نارين نار ارضاء رغباتي ونار الخوف على اخوي منهم