ومضة خير @omd_khyr

عضوة مميزة

تكفين أنت ويــنك فيه بهالحيــاة مسابقة كاتبة اجتماعية ..

يالله أن تحيهم ..

ياهلا والله وغلا ..

يامرحبآ هيل عداد المطر والسيل ..

بكل من دخل موضوعي وشرفه ..

تفضلوا خواتي ..

كل وحده تختار لها مكان وتتفضل تجلس فيه ..

الين أخلص هذرتي عليكم >> يعني شكلها مطوله الأخت :09:

والقهوة جايه بالطريق ..

هاااااااه ..

جلستوا .. ارتحتوا ..

الا بالمناسبه على طاري اختيار المكان ؟؟

اخترتوا لأنفسكم مكان ؟؟

مو بالبيت ..لا ..

ولا بالمجلس .. لا

ولا بموضوعي .. لا

بالحيـــــــــــــاة !!

وينكم فيه بهالحياة ؟؟

وش قدمت لنفسك ِ ؟

وش هي طموحاتك ِ ؟

وش سوووويت ِ؟؟

وش سووويت ِ ؟؟

كم كتابآ قرأت ِ ؟؟

وكم فائدة من مدرسة الحياة تعلمت ِ ؟؟

كم سُنة ً أحييت ِ ؟؟

وكم للمعروف ِ والخير ِ دللت ِ ؟؟

وكم وكم وكم ؟؟؟؟

أنت ِ - طال عمرك - اللي تحددين لنفسك المكان و المكانه

بالدنيا والآخرة أكيد !!

( فمن يعمل مثقال ذرة خيرآ يره * ومن يعمل مثقال ذرة شرآ يره )

لاحظي يعمل >>أنت تعملين مش غيرك ..

أنت تبذلين مو أحد ثاني !!

تدرون مشكلتنا وين ؟؟

مشكلتنا أننا ارتبطنا ارتباط وثيق بالأعذار !!

أنا ما كملت دراستي لاني تزوجت وخلفت و .........

أنا ما قريت لانه وقتي ضيق ووو ........

أنا ما سويت مشان هيك وهيك .......

وهيك شي مليون عذر قدامك !!!

يعني ياريت يابنات ياريت نطلق الأعذار

طلاق بائن بالثلاث !!

ونفتك بئا >>وشلون تجتمع :hahaha:

خلاص ابدئي من ألحين ..

ابني لنفسك ..

من ألحين حددي لنفسك هدفك وخططي له ..

ووووو انطلقـــــــــــي ..........

انطلقـــــــــــي .............

واتركي الأعذار أهم شيء ..

ولا تنتظرين بكره عشان تبدأين بالحفظ ..

أو يوم السبت عشان تبدأين بالريجيم >>يهالريجيم اللي مبهذل الحريم :(

ولا السنة القادمة عشان تكملين الدراسه ..

لا من الان أسألي وابحثي وشوفي ........

مكانتك في الحياة انت تحددينها !

تبين أعلى المراتب بالدنيا والآخرة ..

اذن اعملي .. وأقرأي .. وطوري نفسك ..واجتهدي ..واصبري .. واستمري ..

واستمتعي بكل هالأشياء ..

تفلحي باذن واحد أحد ..

والله تبين تكونين على هامش الحياه ..

مافيه أسهل من هيك خيتو ..

أبد الزمي بيتك .. واقفلي على نفسك غرفتك ..

وناااااااااامي وريحي دماغك ..

شايفة الأمر سهل جدآ ..

بس لا تعتقدين انه بيوم راح أحد يذكرك !!

أو يستفيد منك !!

أو يدعو لك بعد موتك وهوما يعرفك !!

ولا تعتقدين أنه الجنة وهي اعلى الأمنيات ..

تنال بالتمني والتسدح والتبطح ..

لا ياوختي لا ...

كل شيء فاضل بالحياة يبي ضريبه ..

ودائمآ افرحي بالانجازات اللي تسوينها ..

مهما كانت صغيرة ..

مثلآ .. قرأت نص ساعه في كتاب مفيد >>انجاز

جلست مع والديك تبرين بهم >> انجاز

أدخلت السرور على مسلم >> انجاز

تصدقت ِ بريال >>انجاز

حافظت على وردك اليومي من الأذكار >>انجاز

الانجاز يقاس بالفائدة والحسنات المجنيه ..

لا بعظم الانجاز ..

ودي يابنات قبل اخلص هذرتي>> ياذا الهذرة اللي عييت تخلص :22:

أضرب مثل واحد على أكبر المنجزين

في واقعنا المعاصر ..

اللي رسم لحياته سيرة خالدة .. نهايتها بحول الله جنات عدن ..

امام الدنيا في زماننا الشيخ العلامة ( ابن باز رحمه الله )

فيه أحد منكم ما يعرفه

طبعآ لا ..

قد مره ذُكر الشيخ في مجلس ولم يترحم عليه

طبعآ لا ..

قد مره نقل عن الشيخ كلام غير مفيد أو غير لائق

طبعآ لا ..

كل ما ينقل عنه من جواهر العلم ..

ودرر الحكمة .. رحمه الله رحمة واااسعه ..

هنيئآ له كم ينتفع الناس بعلمه .. وكم يُترحم عليه ..

في مشارق الأرض ومغاربها ..

والحسنات تترى لقبره آناء الليل واطراف النهار ..

فما أكثر طلابه .. وما أكثر مصنفاته ..

رحمه الله...

شايفين هذا مثال من واقعنا ..

لشخص عظيم حدد هدفه في الحياة ..

وانطلق لتحقيقه حتى وافته المنيه ..

بنات ..

أتمنى والله من كل قلبي ..

كل وحده فينا تسوي شويات تمارين عقليه ..

وتحرك الركود في حياتها ..

وتبدأ بهالحظه بالتغيير الايجابي ..

وتحدد لنفسها الموقع اللي ترضاه لنفسها ..

على خارطــــــة الحيـــــــاة الكبيــــــرة ..

وسلامتكم ..

أبشركم خلصت هذرتي :icon20:

وسمو حياكم على القهوة اللي بردت :unsure:

في أمان الله ..:icon35:

ومضة خير ..

يلزم عليك تسجيل الدخول أولًا لكتابة تعليق.

تسجيل دخول

candi99 • 14 سنة

رائع
كلامك درررررررررررر

في دنيتي من اكون • 14 سنة

يارب أنك تحيهها من ملفها الحمدللة شربنا قهوتس وسولفنا ونبسطنا ألاي ماتلقين لمشكلتي حل مخلصة من متوسطة ولا كملت دراسة الثانوية قاعد ةأربي أولدي

عائشة المشرقة • 14 سنة

كلام جميل و علئ الرغم انك اضفيتي عليه جانب فكاهي الا انه يبقئ كلام عميق و له مكانة عميقة في حياتنا

الله يبارك فيك و في قلمك المبدع يا غالية

روح الفن • 14 سنة

بسم الله الرحمن الرحيم

أجل صغائر الأمور تصنع العظام
وكم نأمل أن نرفع شعار لا للأعذار

وكأن الشخص يرصف الحجر ليتعثر
فينسحب و يعتذر أويعيش بالتمني ويتقهقر

لنتوكل على الله من الآن لا غدا أو آخر الأسبوع أو بداية الشهر
لنشمر الساعد ونستعد للمواجهة فالحياة تأخذ غلابا

شكرا غاليتي ومضة خير على استنهاض الهمم
و دمت ممن يعانقون القمم

والسلام عليكم و رحمة الله و بركاته

شجرة*الدر • 14 سنة

يالله تحى ومضه وهذرتها الدرر
كلام لاغبار عليه
تدرين وش مضيعنا
بكرة بسوى
وبكرة بابداء
ولاجاء بكرة قلنا بكرة

ومضة خير @omd_khyr

** تكفين أنت ويــنك فيه بهالحيــاة **مسابقة كاتبة اجتماعية ..

تكفين أنت ويــنك فيه بهالحيــاة مسابقة كاتبة اجتماعية ..